Aver yem sha atineakaa

Mbashiada mba Yehova

Tsua Zwa Tiv

Mbashiada mba Yehova mba Nengen Ivaa Paven Nena?

Mbashiada mba Yehova mba Nengen Ivaa Paven Nena?

Se mba dondon mnenge u Bibilo sha kwagh u ivese man ivaa i paven. Aôndo yange hii kwagh u ivesegh ér i lu mzough u igbekeke hen atô u nomsoor man kwase. Saa shighe u nom shin kwase nan er idya tseegh Bibilo i ne ian ér vea fatyô u paven ivaa ye..​—⁠Mateu 19:​5, 6, 9.

Mbashiada mba Yehova mba wasen noov man kasev ken avese a a lu ken ayôôso yôô?

Een, sha igbenda ne nahan:

  • Ityakerada yase. Mba gberen ngeren ken ityakerada mba vea wase avese u doon yô, kua mba avese ve a vihi je i lu inja er gande u sôron la. Ikyav i tesen yô, nenge ngeren mba ve lu a atineakaa ér: “Na Ishima sha Ivaa You,” “Er Se Deen Ior Kwaghbo Yô” man “Rebuilding Trust in a Marriage” la.

  • Ken mba mkombo asev. Ka se hen akaa a Bibilo i we sha kwagh u ivesegh ken mbamkombo asev, kua sha mbamkohol mba vesen man mba kiriki.

  • Mbatamen. Mbatamen mba ken nongo u Kristu ka ve wase mba ve vese ayol a ve la, sha u tesen ve avur a Ruamabera a vea dondo ve a wase ve yô, er Mbaefese 5:​22-25 nahan.

Doo u mbatamen mba ken nongo u Kristu vea wa Orshiada kwagh ér nana pav ivaa?

Ei. Shighe u i kaa a mbatamen ér ve wase mba ve vôso ayol a ve la u nôngon a mbamzeyol mba ken ivese kpa, mba ne ve ian i tsuan kwagh sha ci ve shin ôron ve kwagh u vea er shin vea er ga ze. (Mbagalatia 6:⁠5) Nahan cii kpa, or u nan tsua u paven a kwase shin nom u nan sha gbenda u Bibilo i tese ga yô, mba ne nan ityom icivirigh ken nongo u Kristu ga, shi Ruamabera tese ér nan ngu sha ian i hiden vôson kwase shin nom ugen ga.​—⁠1 Timoteu 3:​1, 5, 12.

Mbashiada mba Yehova mba nengen kwagh u undun ikyar u ken ivese nena?

Bibilo wa mba ve vese ayol a ve la kwagh ér ve luun imôngo aluer ka nyityôkwagh i ze iyol je kpaa. (1 Mbakorinte 7:​10-16) U fatyô u sôron mbamzeyol kpishi hen tsombor, aluer u ngu eren msen kpoghuloo shi dondon akaawan a Bibilo shi tesen dooshima yô.​—⁠1 Mbakorinte 13:​4-8; Mbagalatia 5:⁠22.

Nahan cii kpa, shighe u mbamzeyol mba vihin tsung, er mba i ter shin heen mban ve dugh ken ivese yô, Mbakristu mbagenev kpishi ka ve tsua u undun ikyar ve u ken ivese:

  • Er shighe u nan venda u suen tsombor u nan sha apera yô.​—⁠1 Timoteu 5:⁠8.

  • Shin nan lu nôngon u wuan ikyar u nan u ken ivese shin gbyiden nan hanma shighe yô.​—⁠Pasalmi 11:⁠5.

  • Mbakristu mbagenev undu ivese ve sha ci u mba hendan a ve taveraa ér ve kera civir Yehova ga. Ikyav i tesen yô, alaghga ikyar u ken ivese nana kighir Orshiada u nan vese la ér nana per tindi u Aôndo sha gbenda ugen, nahan ikyar u i lu kighir nan la nana nenge ér u undun ikyar u nan u ken ivese la hemba kan gbenda môm u tesen ér nan ngu ‘ungwan imo i Aôndo a imo i ior.’​—⁠Aerenakaa 5:⁠29.