Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 VEGHER U SHA 1

Suur sha Yehova sha Er a Saan We Iyol ken Ivese You Yô

Suur sha Yehova sha Er a Saan We Iyol ken Ivese You Yô

“Un u A er ve sha hiihii la je, A er ve nomsoor kua kwase.”—Mateu 19:4

Ka Yehova * yange hii zuan nomsoor man kwase ivese ye. Bibilo kaa a vese ér, Yehova yange gba kwase u hiihii la, maa “va a mi hen or la.” Yange saan Adam iyol je a kaa ér: “Ngun yô, ka kuhe u ikyuhe yam, ka inyam i inyam yam je.” (Genese 2:22, 23) Nyian kpa Yehova soo ér i saan noov man kasev iyol.

Shighe u ú er ivese yô, alaghga u hen wer hanma kwagh cii una za vough. Nahan kpa, jighilii yô, aluer nom man kwase soo ayol a ve sha mimi je kpa, zayol una ban hen atô ve ga. (1 Mbakorinte 7:28) Ken antakerada ne, u zua a akaawan a Bibilo, a u dondo ve, a saan we iyol ken ivese, shi tsombor wou kpa a saan u iyol yô. —Pasalmi 19:8-11.

 1 LUMUN TOM U YEHOVA A NE U HEN TSOMBOR LA

KWAGH U BIBILO I KAA YÔ: Nom ka ityough ki tsombor.—Mbaefese 5:23.

Wea lu nom yô, Yehova soo ér we u waan kwase wou ikyo, u eren a na sha ue. (1 Peteru 3:7) Yange er kwase wou ér a wasen we, nahan a soo ér we u eren kwagh a na sha icivir man sha dooshima. (Genese 2:18) Kwase wou a doo u ishima je, hemban wan akaa a na ikyo a a ou.—Mbaefese 5:25-29.

Wea lu kwase yô, Yehova soo ér we u cian nomou, u naan un icivir tsung, shi u wasen un ken tom u a lu a mi hen tsombor la. (1 Mbakorinte 11:3; Mbaefese 5:33) Wasen un u eren akaa a a tsough la a ishima i môm shi eren kwagh vea na ken mzough. (Mbakolose 3:18) U eren nahan yô, u doo nomou ishima kua Yehova kpaa.—1 Peteru 3:1-6.

KWAGH U Ú FATYÔ U EREN YÔ:

  • Pine kwase wou shin nomou kwagh u ú er ve u hemba doon un ishima la. Kegh ato zulee, nahan nôngo sha afatyô wou cii er kwagh u ú seer doon un ishima yô

  • Waan ishima. Saa shighe a kar je ve ne fa u eren kwagh u una na a saan hanmô wen iyol ye

2 WAAN MNENGE U KWASE WOU SHIN NOMOU IKYO SHA MIMI

KWAGH U BIBILO I KAA YÔ: Gba u ú waan akaa a kwase wou shin nomou ikyo. (Mbafilipi 2:3, 4) Umbur wer Yehova soo ér mbacivir un ve lu “sar sar a ior cii,” nahan eren kwagh a kwase wou shin nomou sha dooshima. (2 Timoteu 2:24) “Orgen ka nan gba ôron kwagh gagh er mkuma u sanker yô, kpa nombor u orfankwagh yô, ngu ne mkpeyol.” Sha nahan yô, de gbe ôron kwagh gaegh ga. (Anzaakaa 12:18) Jijingi u Yehova una wase u u ôron kwagh sha imo i legh legh man sha dooshima.—Mbagalatia 5:22, 23; Mbakolose 4:6.

KWAGH U Ú FATYÔ U EREN YÔ:

  • Cii man u lam vea nomou shin kwase wou sha ma zayol u vesen yô, vande eren msen sha er u kundu ishima shi u lam gbar gbar yô

  • Hen sha kwagh u ú ôr la zulee, man er i doo u ú ôr la kpaa

 3 HENEN NEN KWAGH IMÔNGO

KWAGH U BIBILO I KAA YÔ: Shighe u ú er ivese yô, u hingir “iyôgh i môm” vea nomou shin kwase wou. (Mateu 19:5) Kpa er ne lu iorov uhar her yô, ne fatyô u lun a mbamnenge kposo kposo sha kwagh. Nahan a gba u ne hen u lun a mnenge shin mhen môm sha kwagh. (Mbafilipi 2:2) Gba hange hange u ne lu ken mzough shighe u ne lu tsuan kwagh u ne er yô. Bibilo kaa ér: “Hanma awashima ka a taver sha mhen.” (Anzaakaa 20:18) Shighe u ne lu tsuan kwagh u vesen u ne er yô, dondo nen kwaghwan u Bibilo.—Anzaakaa 8:32, 33.

KWAGH U Ú FATYÔ U EREN YÔ:

  • De er nomou shin kwase wou kwagh sha zwa tseegh ga, pasen un er ishima i lu u ker la kpaa

  • Cii man u wa ave sha ma kwagh yô, vande lamen a nomou shin kwase wou sha kwagh shon

^ par. 4 Bibilo pase ér Yehova ka iti i Aôndo.