Ityesen I Aiegh 3: Ior Mba Dedoo Cica Cii Mba Yemen sha

Ityesen i aiegh ne hii nena? Mbaapostoli mba Yesu yange mba kpen kera cii, ka ker ken mhii u derianyom u sha uhar la yô, mba ve lu mtuunum ma côôci, mba i yer ér Church Fathers la hingir tagher tagher. Takerada u New Catholic encyclopedia (2003), Tihi u sha 6, peeji 687 la ôr kwagh u atesen ve ér: “Hen shighe la, ve lu tesen ér ka a wanger uma u a dugh ken or shighe u nan kpe la er i gbe u a wanger un la cii yô, maa i na uma la ian i za ember sha tartor.”

Bibilo kaa ér nyi? ‘Saan mba ve lu a ishima i legh legh la iyol, gadia tar ua lu dyako ve je.’—Mateu 5:5.

Shin er Yesu tôndo zwa a mbahenen nav ér una za “sôr [ve] ijiir” sha nahan kpa, shi a tese ér ka mbaperapera cii ve lu yemen sha ga. (Yohane 3:13; 14:2, 3) Yange er msen ér ‘i̱ er ishima i Aôndo shin tar kpaa, er i eren sha nahan’ gaa? (Mateu 6:9, 10) Jighilii yô, mbaperapera mbagenev vea yem sha, shi mbagenev di vea lu shin tar ne. Mba lun iyenge kpuaa vea za tema tor sha vea Kristu, kpa mba hemban iyenge vea zua a uma u tsôron shin tar.—Mpase 5:10.

Shighe kar yô, ior mba ken côôci i tsuaa la gema mnenge u ve lu a mi sha tom ve u eren shin tar la. Nahan lu nyi i eree? Takerada u i yer ér The New Encyclopædia Britannica la kaa ér, “zege côôci la seer tôôn ian i tartor u Aôndo, u ior lu veren ashe a mi la.” Côôci la hii u seer tahav mbu i sha u nyôron iyol ken pati u eren, i kera wa ikyo sha mkaanem ma Yesu kaa ér mbahenen nav mba “ior i tar ne ga” la ga. (Yohane 15:19; 17:14-16; 18:36) Constantine, Orhemen Tartor u Roma la yange na yô, côôci nungwa atesen ve agen, môm ken a yô lu ityesen i sha kwagh u mlu u Aôndo la.

Ôr avur a Bibilo ne kpa nenge: Pasalmi 37:10, 11, 29; Yohane 17:3; 2 Timoteu 2:11, 12

KA MIMI JE NE:

Ior mba dedoo mba hemban iyenge vea lu uma gbem sha won shin tar, a lu sha ga

[Ape i zough a foto ne yô u sha peeji 12 la]

Art Resource, NY