Kporom hen Aôndo

A Soo Ér i Kpe Se Iyol

Yosua 1:6-9

KA I girim mbamaren mba lun a dooshima iyol, u nengen ér kpe ônov vev iyol, ve tema kundu kundu a zayol shio. Kape Yehova, Ter wase u sha la kpa a soo ér i kpe ônov nav mba shin tar ne iyol vough je la. Er se kwagh u se er ve a kpe se iyol yô, sha u tesen ér se doo un ishima. Ikyav i tesen yô, time ase sha mkaanem ma yange ôr a Yosua, ma i nger ken Yosua 1:6-9 la.

Hen ase sha foto u i tese ken iyan heen ne. Mose kpen kera yô, Yosua hingir orhemen u he u Mbaiserael, mba ve lu umiliôn imôngo la. Mbaiserael wa iyol i nyôron ken tar u Aôndo tôndo zwa a uter vev ér una na tsombor ve la. Aôndo wa Yosua kwagh. Aluer Yosua dondo kwaghwan la yô, una wase un u lun ken mkpeyol. Kpa kwaghwan ne ngu sha ci u iwasen i Yosua tswen ga. Aluer se kpa se dondo kwaghwan la yô, a kpe se iyol.—Mbaromanu 15:4.

Yehova kaa a Yosua ér a lu taveraa, a taver ishima; a ôr kwagh ne kwa môm tsô ga, kpa ka kwa tar. (Ivur 6, 7 ,9) Sha kpôô yô, a gba u Yosua una taver ishima ve una hemen ikyurior la vough una nyôr a ve ken Tar u Ityendezwa la ye. Kpa una er nan ve una lu taveraa shin una taver ishima?

Yosua una fatyô u zuan a ishimataver ken ruamabera u yange i nger sha iwasen i jijingi la. Yehova kaa ér, “Veren ishima u wan atindi cii ikyo a Mose wanakiriki Wam kaa u yô.” (Ivur 7) Hen shighe la, a̱ shi nan kpa Yosua lu a ityakerada i Bibilo kpuaa, i í hira nger yô. * Nahan kpa, u ngu wer u lun di a lu a Mkaanem ma Aôndo tseegh la una na un mkpeyol ga. Cii man Yosua a zua a iwasen ken ma yô, a gba u una er akaa ahar.

Hiihii yô, saa Yosua una ivin ishima na a Mkaanem ma Aôndo hanma shighe. Yehova kaa ér: “Kpa zer timen kimi tugh man atetan.” (Ivur 8) Takerada ugen kaa ér: “Aôndo yange lu kaan a Yosua ér a umbur Atindi Na sha u ‘kimbir a ivarvase’ shighe u a lu tswen yô, shi ‘henen’ sha a shin ‘gbidyen kwar’ sha a.” Kwagh u una wase Yosua u hemban mbamtaver mba ve lu keghen un la yô, ka u ôron shin gbidyen kwar sha Mkaanem ma Aôndo hanma iyange.

Kwagh u sha uhar yô, gba u Yosua una er kwagh u á hen ken Mkaanem ma Aôndo la. Yehova kaa a na ér: “Ver ishima u eren akaa a i nger kimi cii; gadia ka nahan man ikyôr ia lagh u sha akaa cii [ye].” (Ivur 8) Gba u Yosua una eren ishima i Aôndo ve ikyôr ia lagh un ye. A er nan man a lu nahan ga? Ikyôr ngi laghen kwagh u Aôndo a we ishima u eren la hanma shighe cii.—Yesaia 55:10, 11.

Yosua ungwa kwaghwan u Yehova. Sha ci u nahan yô, a tsa sha won, a civir Aôndo sha jighjigh, nahan a zua a mkom man mkpeyol ken uma.—Yosua 23:14; 24:15.

U soo u zuan a mkpeyol ken uma er Yosua nahanaa? Yehova soo ér i kpe u iyol. Nahan kpa, u lun a Mkaanem nam Bibilo tseegh tsô la kuma ga. Orkristu ugen u a civir Aôndo sha jighjigh anyom kpishi yô, due a mhen ér: “De er Bibilo laa laa ga, kpa de mkaanem mara ma nyôr u ken ishima.” Aluer u ngu ivin ishima you a Mkaanem ma Aôndo hanma shighe shi dondon kwagh u ú hen la ken uma wou yô, “ikyôr ia lagh u sha akaa cii,” er Yosua nahan.

[Ngeren u shin kpe]