Kwagh U Se Hen Hen Yesu

Sha Gbenda u i Doo u Eren Kwagh a Mbagenev La

Doo u se eren erdoo sha ci u nyi?

U eren erdoo a ior kua mba kwagh wou a doo ve ga la kpa? Aluer se soo u dondon ikyav i Yesu yô, gba u se eren erdoo a mba ve ker se ihyom je kpaa. Yesu kaa ér: “Aluer ka mba ne doo ve ishima la tsô vea doo ne yô, ka nyi iwuese á wuese ne a mini? Gadia mbaasorabo je kpaa, mba ve doon ve ishima la yô, ve kpaa mba doon di ve ishima je. . . . Kpa mbaihyomov enev ve̱ doo ne ishima . . . , man né lu ônov mba Uhembansha ye; gadia Wen yô, eren dedoo a mba ve lu a ishughun ga kua mbabov kpaa.”—Luka 6:32-36; 10:25-37.

Er nan i doo u se deen mbagenev asorabo ve?

Ka sea er isholibo yô, se soo ser Aôndo a de se isholibo shon. Yesu yange kaa ér u eren msen ser Aôndo a de se asorabo la ka kwagh u vough. (Mateu 6:12) Nahan kpa, Yesu shi kaa ér Aôndo una de se asorabo a ase aluer se kpa se mba den mbagenev  asorabo yô. A kaa wener: “Aluer nea deen ior akaabo a ve yô, Ter wen u Sha di kpaa Una de ne. Kpa aluer nea deen ior akaabo a ve ga yô, Ter wen di kpaa Una de ne akaabo a en ga.”—Mateu 6:14, 15.

Icombor ia zua a msaanyol nena?

Yesu yange er kwase ga, nahan kpa se fatyô u henen kwagh hen a na kpishi sha gbenda u se zua a msaanyol hen tsombor yô. A ver se ikyav sha kwaghôron na man sha aeren a na sha gbaa ne. Time ase sha akaa a atar a i ter shin heen ne:

1. Gba u nom nana soo kwase u nan kpishi er iyol i nan nahan. Yesu ver noov ikyav i dedoo. Yange kaa a mbahenen nav ér: “M ngu nan ne tindi u he sha u doo nen ayol a en yô.” Ér ve doo ayol a ve nena? A kaa a ve wener, “er ne doom ishima nahan.” (Yohane 13:34) Bibilo pase ér noov ve dondo kwaghwan u Yesu ne, i̱ kaa ér: “Ne noov, kasev enev ve̱ doo ne asema di er Kristu kpaa, nongo Na u doo Un ishima man A ne iyol Na sha ci u u nahan . . . Kape noov kpaa, kasev vev ve̱ doo ve ishima keng er ayol a ve nahan la. Or u kwase u nan a doo nan ishima yô, ka iyol i nan je i doo nan ishima ye. Gadia mayange ma or nana kôr iyol i nan ihyom ga kpa nan koson i shi nan kor i kpaa di er Kristu kpaa A eren a nongo Na nahan.”—Mbaefese 5:25, 28, 29.

2. Gba u nom man kwase vea eren kwagh sha mimi ayol a ve. Aluer nom undu kwase u nan za yav a kwase ugen shin kwase kpa er nahan yô, nan er Aôndo isholibo man ieren ne i̱ vihin icombor. Yesu kaa ér: “Ne mba a ôr kwagh u i nger . . . er: Ka sha ci u nahan man nomsoor nana undu ter u nan man ngô u nan, nana var ken kwase u nan, ve uhar vea hingir iyôgh i môm ye gaa? Nahan yô, mayange ve kera mba uhar ga, kpa ka iyôgh i môm je. Kwagh u Aôndo je zua yô, or a̱ de kera paven un ga. . . . Kpa Mo M ngu kaan ne Mer: Hanma or u nana pav a kwase u nan, kpa a lu sha ci u idya ga man nana gema á er kwase ugen yô, ka idya je nan er ye.”—Mateu 19:4-9.

3. Gba u ônov vea ungwan imo i mbamaren vev. Yesu lu or u vough, mbamaren nav yô lu vough ga, nahan kpa shighe u lu anye la ungwan imo ve. Bibilo ôr kwagh u Yesu zum u lu anyom 12 la ér: “Tsô A yem a ve [mbamaren nav], A va ken Nasareti, A lu ungwan imo ve.”—Luka 2:51; Mbaefese 6:1-3.

Doo u se dondo akaawan a i ter sha heen ne sha ci u nyi?

Yesu ôr kwagh u akaa a á tese mbahenen nav la ér: “Aluer nea fa akaa ne, man nea eren sha mi yô, á saan ne iyol.” (Yohane 13:17) Saa se dondo kwaghwan u Yesu a we se sha kwagh u eren a mbagenev sha inja la keng ve se lu Mbakristu mba mimi ye. Yesu kaa ér: “Ka sha kwagh ne man ior cii vea kav er ne lu mbahenen Av ye, aluer ne doo ayol a en yô.”—Yohane 13:35.

Wea soo u zuan a iwanger seer yô, ôr ityough 14 ki takerada u Bibilo Tese Ér Nyi Jimi? la *

[Ngeren u Shin Kpe]

[Foto u sha peeji 18]

Injakwagh i Yesu ôr sha kwagh u wan u undu ter na la tese se ér se eren erdoo shi se deen mbagenev asorabo a ve.—Luka 15:11-32.

[Foto u sha peeji 19]

Doo u noov man kasev vea eren kwagh sha mimi ayol a ve