Kporom hen Aôndo

Ma Kwagh Ngu u “Una Fatyô u Paven Se a Dooshima u Aôndo” Yôô?

Mbaromanu 8:38, 39

KA AN wase je ka a er kwagh a nan sha dooshima ve i doo nan ga? Sha mimi yô, tsombor wase man ahuraior a ase ka aa soo kwagh wase kpishi nahan, i kpe se iyol kpen kpen. Kpa kwagh er vihi yô, ior ka vea doo ayol a ve je kpa, ashighe agen dooshima la a ngôôr ga. Mba doon se ishima vea fatyô u eren kwagh u vihin se kpishi shin paven a vese shin nyaghen se je kpaa. Nahan kpa, or ngu u dooshima u nan a been mayange ga yô. Mbaromanu 8:38, 39 pase dooshima u Yehova Aôndo a lu a mi sha mbacivir un la doo je zua ga.

Apostoli Paulu kaa ér “m fa dedoo mer,” kwagh môm tsô “una fatyô u paven se a dooshima u Aôndo” ga. Paulu ngu ôron kwagh na iyol na tseegh ga, kpa ngu ôron kwagh u ‘se’ cii, inja na yô, ka hanma or u nan civir Aôndo sha mimi cii. Paulu ôr kwagh ne var var, gadia á ter akaa kposo kposo a aa fatyô u paven mbacivir Yehova sha mimi la a dooshima na ga yô.

‘Ku shin uma.’ Or u Yehova ka nana kpe a kpe je kpa, dooshima u Yehova a lu a mi sha a nan la a za hemen. Aôndo wa ishima ér una va nder ior nav mba ve kpe la, vea lu uma ken tar u he u perapera, nahan kwagh ne tese ér ve doo un shima. (Yohane 5:28, 29; Mpase 21:3, 4) Mbacivir Aôndo mba ve lu uma la kpa, Aôndo ngu tesen ve dooshima na, ka a lu shighe u ve tagher a nyityô mzeyol je kpaa.

‘Shin mbatyomov mba Shaav, shin tahav.’ Mbautahav vea fatyô u kighir uumace, kpa vea fatyô u kighir Yehova ga. Ior mba ken jijingi mbaageev, er ortyom u yange hingir Satan la nahan, una fatyô u vendan a Aôndo ér a̱ de eren a mbacivir un sha dooshima ga ze. (Mpase 12:10) Ugomoti mba ve hendan a Mbakristu mba mimi la kpa, vea fatyô u geman gbenda u Aôndo a nengen mbacivir un la ga.—1 Mbakorinte 4:13.

‘Shin akaa a hegen ne, shin akaa a lu van ken hemen’ la. Shighe ka una karen kpa, dooshima u Aôndo la ndôhôr ga. Nyityôkwagh i i er mbacivir Aôndo hegen shin i ia er ve ken hemen kpaa, Aôndo una za hemen u tesen ve dooshima na heregh.

‘Shin mbaageev.’ Ishember i ken zwa Grika i í gem heen ér “mbaageev” ne ngi a inja i môm tseegh ga. Aluer ka nyi je i lu ôron kpaa, kwagh môm ngu u se fe yô; se fa ser, or u ageegh u sha shin u shin tar môm tsô nana fatyô u yangen dooshima u Yehova ér a de aren a ior nav ga ze.

‘Shin mtav, shin mze.’ Ior mba Yehova ka vea lu ken mlu u dedoo shin u bo je kpa ve za hemen u doon un ishima her.

‘Shin ma kwagh ugen u i gbe un a gba kpaa.’ Kwagh u Paulu a er heen ne wa akaauma cii ker, nahan Paulu ngu kaan ér ma kwagh môm môm tsô una fatyô u paven mbacivir Yehova sha mimi la a dooshima u Yehova la ga.

Dooshima u uumace been, kpa dooshima u Aôndo a lu a mi sha mba ve veren ashe a na sha jighjigh la yô, been mayange ga; ka dooshima u gbekeke. Er se fe nahan yô, kwagh ne a̱ mgbegha se u kporom hen Yehova shi se nôngo nen sha afatyô wase cii, se eren akaa a a tese ér Aôndo doo se ishima yô.