Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Iyoukura (I Henen)  |  Novemba 2017

“Or u Nan Lu a Ishe i Zungwen Mhôônom Yô, Nana Zua a Iveren”

“Or u Nan Lu a Ishe i Zungwen Mhôônom Yô, Nana Zua a Iveren”

INIAV mbi nan ka kwagh u hange hange ken mcivir u mimi ica i gba hegen. Mbaiserael yange ve naan iniav sha uile, kpa Mbakristu yô, ka sha “naagh ku iwuese” ku ve ne hanma shighe la, i hembe fan ve ye. Nahan cii kpa, iniav mbigenev mbi, mbi mbi doo Aôndo ishima kpishi yô. (Heb. 13:​15, 16) Iniav mbin ka mbi va or a msaanyol man averen, er akav a a dondo ne a tese nahan.

Hana lu kwase u civir Yehova sha mimi sha ayange a tsuaa la, u sar un tsung u maren wan, kpa fatyô u maren ga yô. Sha nahan yô, a er iceghzwa a Yehova ken msen ér aluer un mar wan yô, una “na TER un sha ayange a á lu uma cii.” (1 Sam. 1:​10, 11) Shighe kar yô, Hana wa iyav mar wannomso, iti na lu Samuel. Samuel va den atumba yô, Hana tôô un za na ken tabernakel, er tôndo zwa nahan. Sha nahan yô, Yehova ver Hana doo doo sha ci u ieren na i tangen iyol ga la. Hana va seer maren ônov mbagenev utaan, shi Samuel kpa va hingir profeti shi lu môm ken ior mba ve nger Bibilo la.​—⁠1 Sam. 2:⁠21.

Nyian kpa, Mbakristu mba a ian i civirigh i nan uuma vev sha u eren Un u a gbe ve la tom, er ve tsegh ayol a ve sha ci na ér vea er nahan. Yesu yange tôndo zwa ér hanma kwagh u se de a kar se sha u se civir Yehova la cii, una haa se averen mgbeghaa.​—⁠Mar. 10:​28-30.

Sha ayange a mbaapostoli la, i fa Kwasekristu u i yilan un ér Dorka la wuee sha “aeren a dedoo kpishi, man iyua i nan” na la, inja na yô, yange de akaa agen kar un sha er una wase mbagenev yô. Kpa kwagh ka a er i vihi yô, va “gba angev, maa a kpe je,” nahan tiônnongo cii ure. Mbahenen mba ongo ér Peteru ngu ikyua yô, ve za zamber a na ér a va fese. Nenge imba er yange a saan ve iyol shighe u Peteru va nder Dorka shin ku la sha wono! Kwagh ne lu mnder u shin ku u hiihii u orapostoli nan er yô. (Aer. 9:​36-41) Kwagh ne tese ér Aôndo yange hungur a akaa a Dorka de kar un la ga. (Heb. 6:10) Ieren na i nan kwagh mgbegha i i nger ken Mkaanem ma Aôndo la, ka ikyav i dedoo i i doo u se dondo yô.

Apostoli Paulu kpa ver ikyav i doon tsung sha ci u yange na shighe na mgbeghaa shi kwagh u mbagenev gba un ishima tsung. Paulu yange nger Mbakristu mba ken Korinte la washika kaa ér: “Mo yô, me vihi akaa a am saan saan shi me na naagh sha iyol yam kpaa sha ci u uuma enev.” (2 Kor. 12:15) Akaa a yange er Paulu la wase un u kaven ér, aluer or de akaa agen kar nan sha ci u mbagenev yô, nana zua a mkom tseegh tsô ga, kpa u hemban cii yô, Yehova una ver nan doo doo shi una lumun nan kpaa.​—⁠Aer. 20:​24, 35.

Kwagh ne tese wang ér, ka sea na shighe wase man agee a ase sha u seer eren akaa a Tartor shi wasen mba se civir Yehova vea ve imôngo la yô, i doo Yehova kpishi. Igbenda igen kpa ngi i se fatyô u suen tom u pasen kwagh u Tartor la yôô? Een! Dugh u nan shighe wase man agee a ase la kera yô, shi se fatyô u wuese Aôndo sha u nan uiyua sha asema a ase kpaa. Ka i er tom a uiyua mban sha u seer eren tom u pasen kwagh u i eren tar sha won cii la, man kwagh ne wa u nengen sha mbamishen man mbagenev mba ve de akaa cii ve lu eren tom u civirigh ayange ayange la. Heela tseegh ga, tom u wan agoyol sha ityakerada man uvidio shi geman ve la, kua u nan mba aahe a er ve la iwasen man u maan Ayou a Tartor a he la cii, ka uiyua mban ka i tôô i er a mi ye. Se fatyô u lun a vangertiôr ser, “or u nan lu a ishe i zungwen mhôônom yô, nana zua a iveren.” Heela tseegh ga, ka sea na Yehova akaainjaa a ase yô, se mba wuese un.​—⁠Anz. 3:9; 22:⁠9.