ANMGBIAN Allen * kaa ér: “Yange cier mo iyol u moughon van hen tiônnongo ne. Yange m nenge mer me fatyô u kôron azende vea mba hen tiônnongo la ga, shin vea lumun mo kpaa ga.” Allen ngu nôngon ér una tema hoghom hoghom hen tiônnongo ugen u a mough a yem her la. Tiônnongo shon gba ica a ya na hemba ukilomita 1,400 nahan.

Aluer we kpa u mough u yem hen tiônnongo ugen yô, alaghga a cier we iyol. Ka nyi ia wase u ve u nyôôso akaa ken uma wou sha er u tema her hoghom hoghomo? Aluer za taver we u nyôôso akaa ken uma wou hemba er yange u ver ishima la yô, u fatyô u eren nyi? Sha vegher ugen di yô, aluer we u ngu moughon yemen hen tiônnongo ugen ga yô, u fatyô u eren nyi sha er mba ve musan tiônnongo ve ve hen tiônnongo wou la, vea tema hoghom hoghomo?

Hen ase sha ikyav ne: Shighe u i bugh ikyon i za môôr ijiir igen yô, ka i ya ican. Ka a bugh kon yô, ashighe agen i tôndo amise a u kpishi kera sha er a lu ican u yemen a mi ijiir igen ga yô. Ka a za môôr kon shon yô, i gba kpee u ua hii u tan amise a he fese je. Kape we kpa aluer u mough u yem hen tiônnongo ugen ve, alaghga u ya ican je la. Shighe u u lu hen tiônnongo wou u tse la, u wa “amise” sha ci u u lu a azende a doon we ishima tsung shi hoghor we iyol u eren akaa a ken jijingi her. Nahan kpa, er hegen u yem hen tiônnongo u he ne yô, gba kpee u u ta amise a he sha er u za ikyura yô. Ka nyi ia wase u ve u er nahana? Ka u dondon akaawan a Ruamabera. De se time sha akaawan ne agen.

Or u nan ôron Mkaanem ma Aôndo hanma shighe yô, nan ‘ngu er kon u i môôr hen ukungômbamngerev, u u um sha shighe u u yô, ikya i u kpaa ngi usu ga; hanma kwagh u nan eren kpaa, nana kure un vough.’​—⁠Ps. 1:​1-3.

Gba kpee u Orkristu nana ôron Mkaanem ma Aôndo hanma shighe sha er nana za hemen u taver ken jijingi yô, vough er ka i gba kpee u kon ua urugh mngerem hanma shighe sha er ua lu gbong gbong nahan. Sha nahan yô, za hemen u ôron Bibilo ayange ayange, shi zaan mbamkombo mba tiônnongo hanma shighe. Shi za hemen u eren mcivir u hen tsombor shi henen kwagh sha tseeneke wou vough vough. Nyityôkwagh i yange u eren sha u taver ikyar you a Yehova hen ijiir you i tse la cii, gba u u eren un hen ijiir you i he ne kpaa.

‘Or u nan ne mngerem ma man yô, nan iyol i nan kpaa á na nan mngerem.’​—⁠Anz. 11:⁠25.

Aluer u ngu eren tom u pasen kwagh kpoghuloo yô, u taver ken jijingi shi u hemba nyôôso akaa ken uma wou fese. Anmgbian Kevin u a lu ortamen ken tiônnongo ugen la, kaa ér: “Shighe u mo vea kwase wam se za nyôr hen tiônnongo wase u he ica i lu a gba ga la, se tôô ishuen pania, nahan kwagh ne hemba wasen se. Ica gba ga je maa se fa anmgbianev man upania kua haregh u se lu her la.” Anmgbian Roger, u a musan tiônnongo a yem hen ijiir igen i i gbe ica a ijiir i vande lun her i hembe ukilomita 1,600 nahan la, kaa ér: “Gbenda u hemban doon cii u u fatyô u teman hoghom hoghom hen tiônnongo wou u he la yô, ka u duen kwaghpasen ciligh ciligh er u fetyô la. Shi pase mbatamen wer u kegh iyol u nan iwasen sha hanma gbenda cii, er u sôron Iyou i Tartor sha u i lu sha ashe tsembelee shin eren asaimenti sha ityough ki orgen gayô tôôn or sha kwaghhendan wou zan a mi mkombo nahan. Anmgbianev mba nomso man mba kasev ka vea nenge or u he nana lu a ieren i tangen iyol ga la yô, ve ngôôr kôron ijende a nan ga.”

‘Bugh nen ishima.’​—⁠2 Kor. 6:⁠13.

Bugh ishima you sha gbaa u tesen mbagenev dooshima u anmgbianev la. Shighe u anmgbian u kwase Melissa vea tsombor na yem hen tiônnongo ugen la, ve ver ishima sha kwagh u kôron azende a he la. A kaa ér: “Yange se lam vea anmgbianev hen Iyou i Tartor cii  man mkombo a hii ye, shi se lam a ve shighe u i dugh mkombo la kpaa. Kwagh ne a na yô, se lam i hemba u sughun ayol a ase tseegh di tsô la.” Shi kwagh ne wase tsombor wase ngôôr fan ati a ior ga. Heela tseegh ga, yange ve bugh ishima ve sha u tesen azende a ve a he ne erdoo, nahan ve hemba lun kôôsôô a ve. Shi a kaa ér: “Yange se na ve unamba mba telefon asev shi ve kpa, ve na se mba vev, sha er vea fatyô u yilan se za eren akaa a ken jijingi vea ve shin eren akaa agen imôngo yô.”

Aluer ka wea hen sha kwagh u zuan vea ior mba u vande fan ve ga la nahan, i cier we iyol yô, u fatyô u hiin sha igbenda i kiriki. Ikyav i tesen yô, wea zua ishigh a or yô, se wese wese, aluer doo u u eren nahan sha hiihii la ga je kpaa. Ka wea se yô, kwagh la a urugh mbagenev a va mi ikyua a we. Kera ga je kpa, “iwanger i ashee ngi ne ishima msaanyol.” (Anz. 15:30) Anmgbian u kwase Rachel, u a mough a yem hen ijiir i i lu ica a i yange vese her la yô, kaa ér: “Sha mlu wam je, m cie ashe. Ashighe agen ka i gba u me kighir iyol yam sha u me lam vea anmgbianev mba nomso man mba kasev mba ken tiônnongo wam u he la yô. Ka m ker or u nan tem ken Iyou i Tartor, nan lu lamen vea orgen ga yô. Alaghga imbaor la nan cian ashe vough er mo nahan.” Er nan u kange ishima wer, hanma shighe u u ze mkombo yô, u lam a or môm shighe u i lu a hii mkombo ga la, shin shighe u i dugh mkombo la ga?

Sha vegher ugen di yô, alaghga a saan we iyol u zuan a ior mba hev shighe u u mough u yem ijiir igen ukasua ve kar kpuaa tseegh la. Kpa shighe a nguren karen yô, a kera girim we iyol u kôron azende a he, er u va “hegh” ve u eren la ga. Hen shighe ne nahan, alaghga a gba u nôngo kwagh cii ve u za hemen u kôron azende a he ye.

Ikyon igen i i bugh i za môôr hen ijiir i he la, shighe ka a kar kpishi cii ve i ta amise i kôr shin inya gbang ye. Kape ior mbagenev mba ve mough ve yem hen tiônnongo u he la kpa, shighe ka a kar cii ve ve mase nyôôso akaa ken uma vev been je la. Aluer yange u mough u yem hen tiônnongo ugen ica i gba hegen, kpa u ngu nôngon wer u nyôôso akaa ken uma wou her yô, dondo akaawan a Bibilo ne, nahan a wase u:

‘Sé gba nen uwer u eren akaa a dedoo ga, gadia shighe á va kuma yô, sé sunda aluer se yina ishima ga yô.’​—⁠Gal. 6:⁠9.

Ver shighe u nyôôso akaa ken uma wou i hemba er yange u hen la. Ikyav i tesen yô, mbamishen mba i tsaase ve ken makeranta u Gileadi la kpishi ka ve lu ken ityar i i tindi ve ér ve za er tom ker la, anyom a kar kpishi cii ve ve za memyol ken ityar i i mar ve ker la ye. Ka vea er nahan yô, kwagh ne a wase ve ve lu kôôsôô a anmgbianev mba hen ityônya mbara, shi ve hen aeren a ityôô a ve vande hoghor a mi ga la.

Anmgbian Alejandro, u a musan tiônnongo ikwa imôngo la, fa er se fatyô u kôvur a shighe u nyôôso akaa ken uma wase la ga yô. A kaa ér: “Kwa u masetyô u se mough se yem tiônnongo ugen la, kwase wam kaa ér, ‘Azende a am cii nga ken tiônnongo wase u tse la!’” Alejandro umbur kwase na ér, ka kwagh u yange ôr anyom ahar ken ijime, zum u ve mough ve va hen tiônnongo ve u he ne, ica i lu a gba ga la vough je la. Kpa ken atô u anyom a ahar la, kwase na ne wa mbagenev ikyo, maa er vande fan ve ga nahan kpa, ve hingir azende a na a kôôsôô.

‘De kaan wer: Ka nyi ayange a tsuaa la a hembe doon a ahegene? ga. Gadia ka sha kwaghfan u pin kwagh ne je ga.’​—⁠Orpa. 7:⁠10.

Palegh u tôôn tiônnongo wou u he ne karen sha tiônnongo wou u tse la. Ikyav i tesen yô, adooga anmgbianev mba ve lu ken tiônnongo wou u he ne mba fe lamen ga shin ka ve hemba lamen a mba ken tiônnongo wou u tse la. Kpa hemba veren ishima sha aeren a ve a dedoo la, er we kpa u soo wer ve er a we la nahan.  Anmgbianev mbagenev yange mba moughon mba yemen tiônnongo ugen yô, ve kav ér gba u vea pine ayol a ve mpin ne, ér: ‘Anmgbianev cii doom ishima sha mimi kpa?’​—⁠1 Pet. 2:⁠17.

‘Sôn nen, á na ne.’​—⁠Luka 11:⁠9.

Za hemen u sônon Yehova wer a wase u. Anmgbian David, u a lu ortamen ken tiônnongo la kaa ér: “De nôngon a kwagh ne we tswen ga. Akaa nga kpishi a i lu Yehova tseegh una wase se ve se fatyô u eren yô. Nahan sôn un a wase u u eren akaa la!” Rachel, u se vande ôron mkaanem nam la, lumun a kwagh ne. A kaa ér: “Mo vea nomom ka sea va nenge ser se kera mba a tiônnongo kôôsôô ga yô, se sôn Yehova sha kwagh ne jighilii ser, ‘Wea lumun yô, wase se se fa aluer se mba eren kwagh u una na a taver mbagenev u van ikyua a vese yô.’ Maa se nôngo se seer shighe u lun imôngo vea anmgbianev mba nomso man mba kasev la.”

Mbamaren, aluer ka taver mbayev enev u eren kwagh vea mbagenev imôngo yô, ker shighe er msen vea ve imôngo sha ikyaa ne. Wase ve ve kôr azende a he sha u bughun aan a vea fatyô u teman vea mbagenev, zuan a ishimataver yô.

Ka nyi u fatyô u eren sha er u wase mbahev mba ve mough ve ve hen tiônnongo wou laa? Sha hiihii la je, nôngo lu ijende ve i mimi. Kwagh u una wase u yô, nôngo hen sha akaa a aluer i er a we zum u u mough u za nyer hen tiônnongo ugen hegh ve a doo la, maa er ijende you la akaa shon. (Mat. 7:12) Mbahev vea fatyô u va eren mcivir u hen tsombor shin nengen vidio i ka i tese hanma uwer sha Ityôgh ki Televishen ki Mbashiada mba Yehova la vea we imôngo kpa? U fatyô u kaan a ve wer ve va kohol we ne due kwaghpasen imôngo kpa? Shi aluer u lôhô ve ve va ya iwer vea we imôngo yô, vea umbur erdoo ne gbem. Ka iwasen igen i nyi u fatyô u seer nan mbaheve?

Anmgbian Carlos kaa ér: “Yange se mba za nyer hen tiônnongo wase u he la yô, anmgbian u kwase ugen nger ati a ukenti mba i teen akaa her sha ishe kpishi yum ga yô, na se. Kwagh ne wase se kpishi.” Alaghga mlu u hen ijiir i mba ve mough hen tiônnongo ugen ve ve hen tiônnongo wou la, una kaha, nahan aluer u tese ve er vea wuhan iyol shighe u i tsee iyol shin i ndôhôr shin ura u lu nôôn la yô, a doo ve kpishi. Shi u fatyô u wasen ve vea hemba fan u pasen kwagh tsembelee sha u pasen ve yiase i hen ijiir i tiônnongo wou shin akaa a kwaghaôndo a ior mba hen ityônya ve ne jighjigh a mi la.

Allen, u se vande ôron mkaanem nam sha mhii u ngeren ne la, ngu hen tiônnongo na u he la hemba inyom hegen. A kaa ér: “Sha hiihii la, gba u me kighir iyol yam ve me fa anmgbianev mba nomso man mba kasev ye. Kpa hegen yô, m nenge ve mer se mba tsombor môm, nahan saan mo iyol kpishi.” Allen kav nahan ér, er un mough un yem tiônnongo ugen nahan kpa, ijende i môm saa un ga. Kpa un gema un zua a azende a he, a alaghga aa lu azende a na gbem sha won yô.