Amós 2:1-16
2 Rígi̱ rí naʼthí Jeobá:
‹“Numuu rí nángi eʼni ekujximínáʼ* Moab, ikha jngóo xári̱ʼkhu̱u̱ dí niraʼwíí ma̱ni̱,numuu rí nitsikhá itsu̱u̱ rey ndrígóo Edom mu maʼni̱i̱ idiʼ.
2 Ikha jngóo makuʼmá mbá aguʼ náa Moab,ga̱jma̱a̱ matsikhá torres rí wájun gújkhúʼ náa Queriyot.
Moab makhañúu náa majñu̱u̱ʼ mbá gitsaʼwá,ga̱jma̱a̱ aʼwá rí nawáán índo̱ nuxmijná ma̱ngaa aʼwóo chi̱ji̱ʼ.
3 Maríguíi xa̱bu̱ ñajunʼ* bi̱ naʼtáñajunʼ náa majñu̱u̱ʼ Moabnda̱wa̱á maxíyáa ikhaa ga̱jma̱a̱ xúgíinʼ príncipes bi̱ kúwá ikhí”, eʼthí Jeobá›.
4 Rígi̱ rí naʼthí Jeobá:
‹Numuu rí nángi eʼni ekujximínáʼ* Judá, ikha jngóo xári̱ʼkhu̱u̱ dí niraʼwíí ma̱ni̱,numuu rí nini̱ gaʼduunʼ rí munimbu̱u̱n xtángoo ndrígóo Jeobáma̱ngaa numuu rí túnimbu̱u̱n ikha ndrígóo.
Ikhiin mangiin ninimbu̱u̱n nduwaʼ rí ninimbu̱u̱n wajinʼ xiʼñúúnʼ.
5 Ikha jngóo makuʼmá mbá aguʼ náa Judá,ga̱jma̱a̱ matsikhá torres rí wájun gújkhúʼ náa Jerusalén›.
6 Rígi̱ rí naʼthí Jeobá:
‹Numuu rí nángi eʼni ekujximínáʼ* Israel, ikha jngóo xári̱ʼkhu̱u̱ dí niraʼwíí ma̱ni̱,numuu rí nigujua̱a̱ xa̱bu̱ jmbii mu makánún mbújkha̱a̱ga̱jma̱a̱ nagujua̱a̱ xa̱bu̱ ngínáa mu mutsi mbá edi̱i̱ raxtá.*
7 Najngapriga̱ edxu̱ún xa̱bu̱ ngíníin náa yujndaʼga̱jma̱a̱ nuruguáá kambu̱ún xa̱bu̱ guabiinʼ.
Xa̱bu̱ nikhi̱i̱ ga̱jma̱a̱ a̱ʼdióo nubúúnʼ gajmiún mbáwíí dxáʼgú,xúʼko̱ kaʼnii nuni̱ tsagáá mbiʼyuʼ rí mikaʼwu.
8 Índo̱ rígá mbá rí nuxnatiʼña naguanún ga̱jma̱a̱ mbá xtíin, xtíin rígi̱ najmún mu mubúúnʼ ga̱jma̱a̱ náa xúgíʼ níjniúu rí nakarámáʼ tsigijñaʼga̱jma̱a̱ vino rí naʼwa̱a̱n náa nduyamajkhún dioses ndrígu̱ún, nitsi̱i̱ ga̱jma̱a̱ mbújkha̱a̱ dí nurumiin eʼwíinʼ›.
9 ‹Mú ikhúún nindxu̱ʼ bi̱ ni̱ni̱ gámbíin náa inún ikhiin xa̱bu̱ amorreo,bi̱ ra̱ʼkhá tháán mbijui̱i̱n xóo cedros ga̱jma̱a̱ bi̱ ra̱ʼkhá tháán mixkujinʼ xóo robles,ni̱ni̱ gámbáa mbá kaʼyuuʼ xó ma naguma gámbáa mbá ixi̱ rí nuni̱ gámbáa xndúu ga̱jma̱a̱ ajmu̱u̱.
10 Ikhúún nigúwíin náa ku̱ba̱ʼ ndrígóo Egipto,ga̱jma̱a̱ ni̱ni̱ rí majnguʼúún mbá cuarenta tsiguʼ náa ku̱ba̱ʼ mijxooʼ*mu xúʼko̱ mudrigúu ku̱ba̱ʼ ndrígu̱ún xa̱bu̱ amorreo.
11 Tikhuiin e̱jñu̱ún nigruígíi̱n mu mani̱ndxu̱ún profetas,*ga̱jma̱a̱ tikhuiin jiámiu̱ún ni̱ni̱ rí mani̱ndxu̱ún, nazareo.*
Xa̱bu̱ Israel lá ragájkhun rígi̱ ráʼ.› Eʼthí Jeobá.
12 ‹Mú ikháanʼla nixnu̱u̱n muwa̱a̱n vino bi̱ nindxu̱ún nazareo,ga̱jma̱a̱ ni̱thu̱nla bi̱ nindxu̱ún profetas: “Xútala dí marigá nda̱wa̱á”.
13 Makujmbírigi̱i̱n náa ma kúwá,xó ma eʼni mbá carreta rí kagu̱ tsígáʼ dí ndiʼkhún nindrigúu, nakujmbi̱i̱ rí najngápri̱ga̱.
14 Bi̱ nagáyúu nacha̱ nda̱a̱ náa magayúu,bi̱ gújkuiiʼ ní xágiʼdoo tsiaki̱i̱ga̱jma̱a̱ nimbáa xa̱bu̱ xkujiiʼ xákríya̱a̱ʼ.
15 Bi̱ najmuʼ xkamídá ní xáʼngo̱o̱ mawi̱ji̱ náa rí kaʼyoo,bi̱ nagáyúu nacha̱ xákríya̱a̱ʼga̱jma̱a̱ bi̱ kríguíi wáyú xákríya̱a̱ʼ.
16 Asndu xa̱bu̱ bi̱ itháán xkujiiʼ bi̱ tsémiñuutsaʼtsaaʼ gágáyúu mbiʼi rúʼko̱›, eʼthí Jeobá”.
Mbaʼa nota
^ Náa ajngáa hebreo naʼthí, “Raʼkháa ajtsú o a̱jkhu̱ nuthu rí ekujximínáʼ”.
^ Náa ajngáa hebreo naʼthí, “bi̱ naʼnimbánuu xkujndu”.
^ Náa ajngáa hebreo naʼthí, “Raʼkháa ajtsú o a̱jkhu̱ nuthu rí ekujximínáʼ”.
^ Náa ajngáa hebreo naʼthí, “Raʼkháa ajtsú o a̱jkhu̱ nuthu rí ekujximínáʼ”.
^ O “cháda”.
^ O “desierto”.
^ O “gaʼyee, bi̱ nuthi dí marigá”.
