Su tempong i Salomo nakoạ datung Israel, Yehuwa nẹ̌kiwal᷊o si sie, ’I kau mẹ̌dorong apa?’ Salomo naul᷊ị, ’Iạ bědang mangudạ kụ běga harusẹ̌ měkoạ apa. Tul᷊ungko iạ makoạ matahuěna tadeạu botonge měngahạ umat’U.’ Yehuwa naul᷊ị, ’Ual᷊ingu i kau nẹ̌dorong ene, Iạ měkoạ si kau matahuěna něngělembo wọu kěbị taumata su dunia ini. Iạ lai sarung měkoạ i kau makalạ. Mạeng i kau matuhụ si Siạ, umurẹ̌ u sarung manandụ.

Salomo něnětạ někoạ bait něpakẹ bul᷊aeng, perak, kalu, dingangu batu permata kapaelange. Piạ hiwune esẹ dingangu wawine mapande někoạ bait ene. Pitu taung bọu ene, bait nasueng koạe kụ nighělị si Yehuwa. Su bait, Salomo nẹ̌tumpěkuhẹ̌ su těngong mezbah kụ su wowone piạ sasěmbah. I sie nẹ̌doa, ’Yehuwa bait ini tawe tumanịu gěguwạ arau tumanịu masadadạ gunang gělịkang si Kau, katewe tarimạe ibadang i kami dingangu daringihẹ̌ko daroang i kami.’ Apa i Yehuwa mal᷊uasẹ̌ ual᷊ingu bait dingangu daroang i Salomo? Su apang i Salomo nasueng doane, piạ putung bọu langị něnutung kěbị sasěmbah su mezbah. Ene něnodẹ Yehuwa mal᷊uasẹ̌ ual᷊ingu bait ene. Su tempong nakasilo ene, tau Israel sěbạe mal᷊uasẹ̌.

Ual᷊ingu sěbạe matahuěna, Salomo nakoạ terkenal su Israel dingangu su manga tampạ marau. Mạeng piạ masalah, taumata masau mẹ̌dorong tul᷊ung si sie. Sarang ratu bọu Syeba lai nasongo gunang měnesẹ̌ si sie měpakẹ kakiwal᷊o tawe gampang simbaheng. Su tempong nakaringihẹ̌ sasimbahi Salomo, i sie naul᷊ị, ’Kangerẹ iạ nakaringihẹ̌ běke soal i kau, kụ iạ tawe mangimang. Katewe ini iạ seng nakasingkạ i kau limembong matahuěna wọu apa niwěkeng i sire. Mawunu, Yehuwa, seng něgělị al᷊amatẹ̌ si kau.’ Su tempo ene kěbị tau Israel sěbạe mal᷊uasẹ̌. Katewe, ene sarung mẹ̌bal᷊ui.