Su tempong i Yesus nate, sěngkatau esẹ makalạ arenge i Yusuf nẹ̌dorong izin si Pilatus gunang mělintụ mayatẹ̌ i Yesus bọu dihi. Yusuf němuha manga rampa-rampa kụ němikung badang i Yesus dingangu hekạ linen, bọu ene němělọ si sie su kubul᷊ẹ̌ buhu. I Yusuf něnutu kubul᷊ẹ̌ ene dingangu batu gěguwạ. Manga imang těmbonang naul᷊ị si Pilatus, ’I kami gugěnggang piạ muritẹ̌ i Yesus sarung měngalạ mayate kụ maul᷊ị i sie seng saụ nipěbiahẹ̌.’ Hakị u ene i Pilatus nẹ̌bera, ’Tutu pakasěghadẹ̌ kubul᷊ẹ̌ ene kụ oro taumata pěhapa.’

Tělu ěllo tuhụe, su tempong bědang mal᷊uka-lukadẹ̌, pirang katau wawine nakoạ sarang kubul᷊ẹ̌ ene. I sire nakasilo batu nipěnutu kubul᷊ẹ̌ ene seng naal᷊ing. Su ral᷊ungu kubul᷊ẹ̌ piạ malaekatẹ̌, kụ malaekatẹ̌ ene nẹ̌bera si sire, ’Abe katakụ. Yesus seng saụ nipěbiahẹ̌. Paul᷊ị su manga murite gunang pẹ̌sombang dingange su Galilea.’

Katewe, i Maria Magdalena masahawụ nakoạ sarang i Petrus dingangi Yohanes. I sie nẹ̌bera, ’Piạ u něngal᷊ạ mayati Yesus!’ Petrus dingangi Yohanes apidu timal᷊ang sarang kubul᷊ẹ̌ ene. Su tempong nakasilo kubul᷊ẹ̌ ene seng tawẹ apa lohone, i sire nẹ̌bal᷊ị sarang bal᷊e.

Su tempong i Maria nẹ̌bal᷊ị sarang kubul᷊ẹ̌ ene, i sie nakasilo darua malaekatẹ̌ ene sene. I sie nẹ̌bera si sire, ’Iạ běga Tuangku niwawa sarang apa.’ Bọu ene, i sie nakasilo sěngkatau esẹ. Ual᷊ingu su tiněnane tau esẹ ene kai měndariagạ taman, i Maria nẹ̌bera, ’Tuang, paul᷊ịko si siạ saranga i sire nẹ̌bawa si sie.’ Katewe, su tempong tau esẹ ene nẹ̌bera, ”Maria!” i sie apidu nakaěna ene kai i Yesus. Maria nẹ̌kui, ”Guru!” kụ apidu nělahěkụ si sie. I Yesus nẹ̌bera, ’Paul᷊ịko su anạu sěmbaụku i kau seng nakasilo si siạ.’ I Maria apidu timal᷊ang nẹ̌sombang dingangu manga muriti Yesus kụ něhabarẹ̌ i sie seng nakasilo si Yesus.

Su ěllo ene lai, duang katau muritẹ̌ dimal᷊eng bọu Yerusalem sarang kampong Emaus. Sěngkatau esẹ diměduhẹ̌ si rẹ̌dua kụ nakiwal᷊o i rẹ̌dua měbẹ̌bisara soal u apa. I sire nẹ̌bera, ’Apa i kau bědang tawe nakaringihẹ̌? Tělu ěllo tamai, manga imang těmbonang němate si Yesus. Katewe, pirang katau wawine nẹ̌bera i sie seng saụ nipěbiahẹ̌!’  Tau esẹ ene nẹ̌bera, ’Manga nabi naul᷊ị i Kristus sarung mate bọu ene saụ ipěbiahẹ̌. Apa i kamene tawe mangimang su manga nabi?’ Bọu ene, i sie nělahẹ lohong Binohẹ Susi si rẹ̌dua. Su tempong nahumpạ su Emaus, i rẹ̌dua němaringang si sie gunang tumol᷊e si rẹ̌dua. Su tempong tau esẹ ene nẹ̌doa gunang kumaěng hěbi ene, i sire apidu nasadarẹ̌ ene kai i Yesus. Bọu ene i Yesus nailang.

Duang katau muritẹ̌ ene apidu masahawụ nakoạ sarang Yerusalem. I rẹ̌dua nẹ̌běke apa nariadi su manga rasulẹ̌ apang nẹ̌komol᷊ẹ̌ su sěmbaụ bal᷊e. Bọu ene, i Yesus siměpụ su těngong i sire kěbị. Humotong manga rasulẹ̌ tawe nangimang ene i Yesus. Hakị u ene i Yesus nẹ̌bera, ’Pěmanda limaku. Kěnang pěnenggehẹ̌ si siạ. Piạ ayatẹ̌ naul᷊ị i Kristus sarung saụ ipěbiahẹ̌.’