Fetela boitsebisong

Na Molimo O Hohle?

Na Molimo O Hohle?

Karabo ea Bibele

Molimo o khona ho bona ntho e ’ngoe le ’ngoe e etsahalang lefatšeng. (Liproverbia 15:3; Baheberu 4:13) Leha ho le joalo, Bibele ha e rute hore Molimo o hohle. Empa e bontša hore hona le moo a lulang teng.

  • Molimo o joang?: Molimo ke moea. (Johanne 4:24) Kaha ke moea, ha ho motho ea ka mo bonang. (Johanne 1:18) Litlaleho tse ka Bibeleng li bontša hore Molimo o na le sebaka seo a lulang ho sona. Ha li bontše a le hohle.​—Esaia 6:1, 2; Tšenolo 4:2, 3, 8.

  • Moo Molimo a lulang teng: Molimo o lula sebakeng seo rona batho re ke keng ra se bona. Bibele e re o ‘sebakeng sa hae sa bolulo, maholimong.’ (1 Marena 8:30) E boetse e bua ka nako eo “bara ba Molimo oa ’nete ba kenang hore ba eme ka pel’a Jehova” * ’me hoo ho bontša hore hona le moo Molimo a lulang teng.​—Jobo 1:6.

Haeba Molimo ha a hohle, na ehlile oa ntsotella?

E! Molimo o tsotella motho e mong le e mong. Le hoja a lula moo re sa mo boneng kapa Leholimong, Molimo o bona bohle ba batlang ho mo khahlisa le ho etsa thato ea hae. (1 Marena 8:39; 2 Likronike 16:9) Hlahloba litsela tse latelang tse bontšang hore Jehova o tsotella batho ba mo sebeletsang:

  • Ha u rapela: Hang ha u bua le Jehova ka thapelo oa utloa.​—2 Likronike 18:31.

  • Ha u nyahame: “Jehova o haufi le ba lipelo li robehileng; O pholosa ba sithabetseng moeeng.”​—Pesaleme ea 34:18.

  • Ha u hloka tataiso: Jehova o ‘tla etsa hore u be le temohisiso ’me a u rupele ka tsela eo u lokelang ho tsamaea ka eona’ a sebelisa Lentsoe la hae Bibele.​—Pesaleme ea 32:8.

Maikutlo a fosahetseng ka hore na Molimo o hokae

Maikutlo a fosahetseng: Molimo o hohle.

Seo e leng ’nete: Molimo ha a lefatšeng kapa ha a hohle. (1 Marena 8:27) Ke ’nete hore linaleli le popo li “bolela khanya ea Molimo.” (Pesaleme ea 19:1) Leha ho le joalo, taba ena ha e bolele hore Molimo o teng kapa o phela har’a popo. Empa re ka ithuta ho hongata ka “litšobotsi tsa hae tse sa bonahaleng” ha re sheba popo joaloka matla a hae, bohlale le lerato.​—Baroma 1:20.

Maikutlo a fosahetseng: Molimo o lokela ho ba hohle e le hore a ka tseba lintho tsohle le hore a be matla.

Seo e leng ’nete: Moea o halalelang oa Molimo ke matla a hae a sebetsang. Ho fapana le hore Jehova ka seqo a etse lintho, o sebelisa moea o halalelang ho etsa lintho tsohle tseo a li batlang.​—Pesaleme ea 139:7.

Maikutlo a fosahetseng: Pesaleme ea 139:8 e re “Haeba ke ne nka nyolohela leholimong, u ne u tla ba teng; Haeba ke ne nka phutholla setulo sa ka se kang bethe Sheole, bona! u ne u tla ba teng.” E bontša hore Molimo o hohle.

Seo e leng ’nete: Lengolo lena ha le bue ka hore na Molimo o lula kae. Le bontša feela hore ha ho sebaka se hole haholo ho Molimo haeba re hloka thuso ea hae.

^ ser. 5 Bibele e re lebitso la Molimo ke Jehova.