“Thuso ea ka e Tsoa ho Jehova”

Malapa a Matlafatsoang ke Tsebo ea Molimo

“LEBOTA LA BERLIN.” Ke kamoo banyalani ba bang ba Argentina ba neng ba bitsa lebota la sebele leo ba neng ba le hahile ho arola ntlo ea bona ka lehare! Ba ne ba e-na le liphapang tse sa feleng; ba ne ba sa khone ho mamellana.

Ka masoabi, boemo ba banyalani bana bo tloaelehile. Malapa a mangata a hlasetsoe ke lintoa, ho se tšepahale le bora bo feletseng. Sena sea soabisa, kaha lelapa ke tokisetso e thehiloeng ke Molimo ka boeena. (Genese 1:27, 28; 2:23, 24) Mpho ena e tsoang ho Molimo ke sebaka se setle sa ho bontša lerato le tebileng. (Ruthe 1:9) Litho tsa lelapa li ka hlompha Jehova ’me tsa etsa hore ho be le thabo ka lelapeng haeba li phetha boikarabelo ba tsona boo li bo filoeng ke Molimo. *

Kaha Molimo o thehile tokisetso ea lelapa, re lokela ho lumella pono ea hae hore e ame kutloisiso ea rōna mabapi le kamoo malapa a lokelang ho sebetsa kateng. Lentsoe la hae le fana ka keletso e ngata e sebetsang e etselitsoeng ho thusa malapa hore a atlehe, haholo-holo ha ho hlaha mathata. Mabapi le karolo ea banna, Bibele e re: “Banna ba tšoanela ho rata basali ba bona joaloka ’mele ea bona.” Ha monna a phetha taelo ena, mosali oa hae o thabela ho ba le “tlhompho e tebileng ho monna oa hae.”—Baefese 5:25-29, 33.

Mabapi le kamano pakeng tsa batsoali le bana ba bona, moapostola Pauluse o ile a ngola: “Bo-ntate, le se ke la halefisa bana ba lōna, empa le tsoele pele ho ba hōlisa ka taeo le kelello e laoloang ke Jehova.” (Baefese 6:4) Ka lehlakoreng le leng, sena se etsa hore ho rene moea oa khotso ka lelapeng, o etsang hore ho be bonolo hore bana ba mamele batsoali ba bona.—Baefese 6:1.

Lintlha tsena tse sa tsoa boleloa li bontša kamoo keletso ea Bibele e sebetsang kateng bophelong ba lelapa. Ba bangata ba thabile ka malapeng ka lebaka la ho sebelisa melao-motheo ea Molimo. Ka mohlala, nahana ka banyalani ba Argentina ba boletsoeng qalong ea sehlooho sena. Ka mor’a ho ithuta Bibele le Lipaki Tsa Jehova ka likhoeli tse tharo, ba ile ba qala ho sebelisa keletso ea eona e bohlale mabapi le lenyalo. Ba ile ba sebetsa ka thata ho ntlafatsa puisano, ho utloelana bohloko le ho tšoarelana. (Liproverbia 15:22; 1 Petrose 3:7; 4:8) Ba ile ba ithuta ho laola bohale ba bona le ho batla thuso ea Molimo ha ho bonahala eka lintho li tsoa taolong. (Bakolose 3:19) Kapele feela, “Lebota la Berlin” le ile la oa!

Molimo a ka Matlafatsa Lelapa

Ho tseba litekanyetso tsa Molimo le ho li sebelisa ho ka matlafatsa lelapa hore le eme le tiile khahlanong le likhatello. Sena ke sa bohlokoa, hobane ho ile ha profetoa hore tokisetso ea lelapa e ne e tla hlaseloa habohloko mehleng ea rōna. Pauluse o ile a bolela esale pele hore mehleng ea rōna boitšoaro bo ne bo tla senyeha ’me batho ba ne ba tla arohana. O itse “matsatsing a ho qetela” ho ne ho tla ba le ho se tšepahale, ho hloka “lerato la tlhaho” le ho se mamele batsoali, esita le har’a “ba nang le ponahalo ea boinehelo ba bomolimo.”—2 Timothea 3:1-5.

 Ho leka ho khahlisa Molimo ho ka thusa ho thibela liphello tse joalo tse kotsi ka lelapeng. Malapa a mangata a hlokometse hore a hloka thuso ea moea e le hore a hlōle mathata ao a tobaneng le ’ona. Haeba litho tsa lelapa li lakatsa ho ba le kamano e ntle le Molimo kamehla, ntho ea bohlokoahali eo li e hlokang ke ho sebelisa melao-motheo ea Bibele le ho elelloa hore “ntle le haeba Jehova a haha ntlo, ke ha lefeela lihahi tsa eona li sebelitseng ka thata ho eona.” (Pesaleme ea 127:1) Ntho e atlehang ka ho fetisisa e etsang hore ho be le thabo ka lelapeng ke ho beha Molimo pele bophelong ba lelapa.—Baefese 3:14, 15.

Hawaii koana, monna e mong ea bitsoang Dennis o ile a hlokomela kamoo sena e leng ’nete kateng. Le hoja a ne a ipitsa Mokreste, o ne a phela ka litlhapa le ka lintoa. Ka mor’a hore e be lesole, o ile a ba mabifi le ho ba lonya le ho feta. Oa hopola: “Ke ne ke loana mehla ena. Ke ne ke sa tsotelle hore na ho etsahala’ng ka ’na, ebile ke ne ke sa tšabe ho shoa. Ke ne ke sa khaotse ho rohakana le ho loana. Mosali oa ka, eo e neng e le e mong oa Lipaki Tsa Jehova, o ile a nkhothalletsa ho ithuta Bibele.”

Dennis o ile a hana ha mosali oa hae a mo thusa. Leha ho le joalo, boitšoaro ba hae ba Bokreste bo ile ba etsa hore monna oa hae a bōbe. Qetellong Dennis o ile a ea sebokeng sa Bokreste le mosali oa hae le bana ba hae. Ka mor’a moo, Dennis o ile a qala ho khanneloa thuto ea Bibele, ’me o ile a tsoela pele hantle. O ile a tlohela mokhoa oa hae oa ho tsuba o nkileng lilemo tse 28 eaba o khaohana le metsoalle e neng e etsa lintho tsohle tseo a neng a leka ho li qoba. Ha Dennis a leboha Jehova o ile a re: “Bophelo ba lelapa la ka bo ile ba ntlafala. Re ile ra ea libokeng le tšebeletsong re le lelapa. Bana ba ka ba babeli ba ne ba se ba sa ntšabe, hobane ke ile ka ithuta ho laola bohale ba ka le ho khaotsa ho rohakana. Re ne re khona ho buisana ebile re thabela le ho qoqa ka Bibele. Ha e ne e se ka ’nete ea Bibele, nkabe ke se mona kajeno; ke ne ke le sefela-peloana.”

Malapa a ka thaba haeba a sebetsa ka thata ho etsa thato ea Jehova. Phihlelo e bontšitse hore esita leha setho se le seng sa lelapa se sebelisa melao-motheo ea Bibele, lintho li ntlafala ho feta ha ho se ea e sebelisang. Ho haha lelapa la Bokreste hase papali, ho hloka bohlale le nako. Empa litho tsa malapa a joalo li kholisehile hore Jehova o tla atlehisa matsapa a tsona. Li ka lumellana le mantsoe a mopesaleme: “Thuso ea ka e tsoa ho Jehova.”—Pesaleme ea 121:2.

[Mongolo o botlaaseng ba leqephe]

[Ntlha e Qolotsoeng e leqepheng la 9]

‘Lelapa le leng le le leng leholimong le lefatšeng le bitsoa ka Molimo.’—BAEFESE 3:15

[Lebokose le leqepheng la 8]

JEHOVA O NKA TOKISETSO EA LELAPA E LE EA BOHLOKOA

“Molimo a ba hlohonolofatsa ’me Molimo a re ho bona: ‘Atang le ngatafale le tlale lefatše.’”—Genese 1:28.

“Ho thaba e mong le e mong ea tšabang Jehova . . . Mosali oa hao o tla ba joaloka sefate sa morara se behang litholoana likarolong tse ka hare-hare tsa ntlo ea hao.”—Pesaleme ea 128:1, 3.