Bibele e re: “Tšimolohong Molimo o ile a bōpa maholimo le lefatše.” (Genese 1:1) Ha e bolele hore na ha e le hantle Molimo o bōpile lintho tsohle joang. Kahoo, esita le haeba ho phatloha ho ile ha hlahisa bokahohle, seo se ne se ke ke sa hanana le seo Bibele e se buang. Ho e-na le hoo, Genese 1:1 e ne e tla araba potso ea hore na ke mang ea bakileng ho phatloha ho hoholo.

Ho hlakile hore bo-rasaense ba lumela hore ho phatloha hoo e bile ketsahalo e sa reroang, e neng e sa laoloe ke motho e ileng ea fella ka hore ka mor’a nako likotoana tsa lintho li fetohe linaleli le lipolanete. Bibele ha e lumellane le seo, empa e re Molimo ke eena eo ka ho toba a ileng a etsa hore bokahohle bo be teng, ho sa tsotellehe hore na o entse seo ka ho phatloha ho itseng kapa ka ho bōpa.

“Tšimolohong Molimo o ile a bōpa maholimo le lefatše.”—Genese 1:1.

E. Bibele e re Molimo o ile a bōpa lintho tse phelang “ho ea ka mefuta ea tsona.” (Genese 1:11, 12, 21, 24, 25) Na mofuta o itseng oa ntho e phelang o ka fetoha? E. Leha ho le joalo, na seo se bolela hore mofuta o itseng o ka iphetola hore e be o mong o mocha? Che.

Nahana ka mohlala ona: Lilemong tsa bo-1970, bafuputsi ba ile ba ithuta ka lithaha tsa lihlekehlekeng tsa Galápagos. Ba ile ba hlokomela hore ka mor’a selemo se seng sa komello, lithaha tse nang le melomo e meholoanyane li ile tsa pholoha habobebe ho feta tse melomo e menyenyane. Batho ba bang ba re sena ke bopaki ba ho iphetola ha lintho. Empa na seo ke bopaki ba ho iphetola ha lintho kapa e bile ho ikamahanya le maemo? Lilemo hamorao, lithaha tse nang le melomo e menyenyane li ile tsa boela tsa ba ngata ho feta tse melemo e moholoanyane. Teko ena e ile ea thusa Jeffrey H. Schwartz, e leng moprofesa oa thuto mabapi le batho, hore a fihlele qeto ea hore ho ikamahanya le maemo ho thusa phoofolo ho phela tlas’a maemo a ntseng a fetoha, “ha ho hlahise letho le lecha.”

Bibele e re ‘[Molimo] o bōpile lintho tsohle.’ (Tšenolo 4:11) Ha aa ka a “phomola” ho fihlela a qetile mosebetsi oa hae. (Genese 2:2) Moelelo o hlakile: Molimo ha aa ka a bōpa ntho e le ’ngoe e phelang ’me a phomola, ebe ka lilemo tse limilione ntho eo e phelang e ntse e iphetola hore e be mefuta e fapaneng ea litlhapi, liapi kapa batho. * Khopolo eo e bitsoa ho iphetola ho hoholo ha lintho ’me e hanana le mosebetsi oa ’Mōpi, eo Bibele e reng o ile a “etsa maholimo le lefatše, leoatle le ntho e ’ngoe le e ’ngoe e ho tsona.”—Exoda 20:11; Tšenolo 10:6.

“Jehova, Molimo oa rōna, ua tšoaneleha ho amohela khanya le tlhompho le matla, hobane u bōpile lintho tsohle.”—Tšenolo 4:11.

Ithute ho eketsehileng: Bibele e re: “Litšobotsi tsa [Molimo] tse sa bonahaleng li bonoa ka ho hlaka ho tloha pōpong ea lefatše ho ea pele, hobane li lemohuoa ka lintho tse entsoeng.” (Baroma 1:20) Ho ithuta ka Molimo ho ka etsa hore bophelo ba hao bo be le morero, hobane morero oa hae o akarelletsa bohle ba mo batlang ka tieo. (Moeklesia 12:13; Baheberu 11:6) Bakeng sa boitsebiso bo eketsehileng, kena ho www.jw.org/st kapa u buisane le Lipaki Tsa Jehova. Sheba tlas’a LITHUTO TSA BIBELE > LIPOTSO TSA BIBELE LIA ARAJOA.