Kuze ube ngumngani waNkulunkulu, kudzingeka ufundze ngaye. Bangani bakho bayalati yini libito lakho futsi bayakubita yini ngalo? Yebo, kunjalo. Nkulunkulu naye ufuna kutsi ulati libito lakhe futsi ulisebentise. Libito laNkulunkulu nguJehova. (Tihlabelelo 83:18, NW; Matewu 6:9) Kufanele ufundze nekutsi yini layitsandzako nalangayitsandzi. Kudzingeka wati nekutsi babobani bangani bakhe nekutsi titsa takhe tona tibobani. Kudzingeka sikhatsi kuze wati umuntfu lotsite. LiBhayibheli litsi kukuhlakanipha kutinika sikhatsi sekufundza ngaJehova.—Efesu 5:15, 16.

Bangani baNkulunkulu benta lokumjabulisako. Cabanga ngebangani bakho. Nawungabaphatsa kabi futsi wente tintfo labangatitsandzi, bangachubeka yini babangani bakho? Noma kanjani angeke! Ngendlela lefanako, nawufuna kuba ngumngani waNkulunkulu, kufanele wente lokumjabulisako.—Johane 4:24.

Akusito tonkhe tinkholo letiholela ekubeni nebungani naNkulunkulu. Jesu, labengumngani waNkulunkulu lomkhulu kunabo bonkhe, wakhuluma ngetindlela letimbili. Lenye ibanti futsi inebantfu labanyenti. Leyondlela iyisa ekubhujisweni. Lena lenye indlela yincane futsi bambalwa labahamba ngayo. Yona iyisa ekuphileni lokuphakadze. Loku kusho kutsi nawufuna kuba nebungani naNkulunkulu, kufanele ufundze indlela lecondzile yekumkhonta.—Matewu 7:13, 14.