UYATI yini kutsi ngubani loluswane? Yebo, nguJesu. Usandza kutalelwa esitebeleni. Sitebele yindzawo lapho kuvalelwa khona tilwane. Mariya ulalisa Jesu emkhombeni, lokuyindzawo lapho kubekwa khona kudla kwetimbongolo kanye nekwaletinye tilwane. Kepha kungani boMariya naJosefa balapha kulendzawo? Lena akusiyo indzawo yekutalela umntfwana, angitsi?

Cha, akusiyo. Nasi sizatfu sekutsi babe lapha: Umbusi waseRoma, longuKhesari Agustusi washaya umtsetfo wekutsi wonkhe umuntfu akaye edolobheni latalelwa kulo kuze ayobhaliselwa lubalo. Josefa naye watalelwa lapha eBhetlehema. Kepha lapho yena naMariya befika, batfola kutsi sekute indzawo yekuhlala endlini yetivakashi. Ngako-ke kwadzingeka bete kulendzawo yetilwane, futsi ngalelo langa Mariya watala Jesu! Kepha njengoba umbona, uphile saka!

Uyababona yini belusi labete kutobona Jesu? Bebasemadlelweni ebusuku beluse timvu, base babona kukhanya lokukhulu kubakhanyisela. Kwakuyingilosi! Bafikelwa kwesaba lokukhulu. Kepha ingilosi yatsi kubo: ‘Ningesabi; ngobe nginiletsele tindzaba letimnandzi. Lamuhla, kutelwe iNkhosi lenguKhristu eBhetlehema. Utawuba ngumsindzisi webantfu! Nitamtfola agocotwe ngetindvwangu futsi alaliswe emkhombeni.’ Masinyane ngemuva kwaloko, tingilosi letinyenti teta tadvumisa Nkulunkulu. Ngekushesha belusi bahamba bayofuna Jesu, futsi bamtfola.

Uyati yini kutsi kungani Jesu abaluleke kangaka? Uyati yini kutsi ungubani ngempela? Khumbula kutsi endzabeni yekucala yalencwadzi sitjelwe ngeNdvodzana yaNkulunkulu yekucala. LeNdvodzana yasebenta naJehova ekudaleni emazulu nemhlaba kanye nako konkhe lokunye lokukhona. Loko-ke nguloko Jesu langiko!

Jehova watsatsa kuphila kwaleNdvodzana yakhe lesezulwini, wakufaka esiswini saMariya. Ngekushesha umntfwana wacala kukhula esiswini sakhe, njengabo bonkhe bantfwana labakhulela etiswini tabo make babo. Kepha lomntfwana lona abeyiNdvodzana yaNkulunkulu. Ekugcineni Jesu watalelwa esitebeleni eBhetlehema. Uyabona yini kutsi kungani tingilosi tajabula kakhulu kangaka ngekutjela bantfu kutsi Jesu utelwe?