1, 2. Lomunye umbonisi lojikeletako abebatsatsa njani bantfu labetsembekile lokukhulunywa ngabo eBhayibhelini, futsi kungani bangaba bangani labahle kakhulu kitsi?

“NAKAKHULUMA ngebantfu labaseBhayibhelini, kuba shengatsi ukhuluma ngebangani bakhe labakhulu.” Lawa ngemavi lashiwo ngulomunye dzadze ngemuva kwekulalela inkhulumo lebeyetfulwe ngumbonisi lojikeletako losakhulile. Wakusho kufanele loko ngobe lomzalwane abecitse iminyaka leminyenti afundza liVi laNkulunkulu futsi afundzisa ngalo, kangangekutsi emadvodza nebafati labanekukholwa lokukhulunywa ngabo eBhayibhelini besebafana nebangani bakhe labakhulu, labesabati sikhatsi lesidze.

² Labantfu lokukhulunywa ngabo eBhayibhelini bangaba bangani labahle kakhulu nakitsi. Babantfu mbamba yini kuwe? Asewucabange kutsi bekungaba njani kuhambisana nabo nekukhuluma nabo, kanye nekucitsa sikhatsi sakho wati bantfu labanjengaNowa, Abrahama, Ruthe, Elija na-Esta. Cabanga nangendlela lebebangakutsintsa ngayo kuphila kwakho​—ngeteluleko nangetikhutsato letibalulekile lebebangakunika tona.​—Fundza Taga 13:20.

3. (a) Singazuza njani ngekufundza ngemadvodza nangebafati labanekukholwa lokukhulunywa ngabo eBhayibhelini? (b) Ngumiphi imibuto lesitawucoca ngayo?

³ Kuliciniso kutsi ‘nasekuvuswa labalungile,’ sitawujabulela buhlobo lobumnandzi lobufana nalobu. (Imis. 24:15) Nobe kunjalo, ngisho nanyalo singazuza kakhulu ngekufundza ngalamadvodza nebafati labanekukholwa lokukhulunywa ngabo eBhayibhelini. Kungenteka njani loko? Umphostoli Pawula usinika lemphendvulo lecacile: ‘Lingisani labo labatfola letetsembiso ngekukholwa nangekubeketela.’ (Heb. 6:12) Njengobe sitawufundza ngetindzaba letimayelana nalamadvodza nebafati labanekukholwa, asesicabange ngemibuto letsite lefika engcondvweni nasibona lamavi aPawula langenhla. Kuyini vele kukholwa, futsi kungani sikudzinga? Singabalingisa njani bantfu labetsembekile basendvulo?

4. Yini bantfu labavame kuyicabanga mayelana nekukholwa, futsi kungani loko kuliphutsa?

⁴ Kukholwa kuyintfo letsandzekako, leyo onkhe emadvodza nebafati lesitawukhuluma ngabo kulencwadzi lebebayitsatsa njengalebaluleke kakhulu. Bantfu labanyenti lamuhla bavame kukubukela phansi kukholwa, futsi bacabanga kutsi kusho kumane ukholelwe intfo ube ute bufakazi bayo lobuliciniso. Kodvwa-ke benta liphutsa ngekucabanga kanjalo. Kukholwa akusho kutsatseka futsi akusiyo intfo lomane uyive ngekhatsi, kusho lokungetulu kwekwetsemba. Kutsatseka kuyingoti, ngenca yekutsi  indlela lotiva ngayo ingashintja nobe nini, kantsi futsi kumane nje ukholwe akumenetisi Nkulunkulu ngobe “nemadimoni nawo ayakholwa futsi achachatele.”​—Jak. 2:19.

5, 6. (a) Kukholwa kwetfu kusho kunaka tiphi tinhlobo letimbili tetintfo letingabonakali? (b) Kukholwa kwetfu kufanele kucine kangakanani? Fanekisa.

⁵ Kukholwa kweliciniso kusho lokungetulu kwekutsatseka nobe kumane wetsembe intfo. Khumbula indlela liBhayibheli lelikuchaza ngayo kukholwa. (Fundza Hebheru 11:1.) Pawula watsi kukholwa kusho kunaka tinhlobo letimbili tetintfo lesingatiboni. Kwekucala, kusho kunaka tintfo letikhona mbamba “letingakabonwa.” Emehlo etfu awakhoni kubona tintfo letisezulwini​—lokufaka ekhatsi Jehova Nkulunkulu, iNdvodzana yakhe nobe uMbuso lobusa ezulwini. Kwesibili, kukholwa kusho kunaka “tintfo letetsenjwako”​—lokutintfo letisengakenteki. Kwanyalo, asikhoni kuwubona umhlaba lomusha uMbuso waNkulunkulu lotasiletsela wona madvutane. Loko kusho kutsi kukholelwa kwetfu tintfo letinjalo naletetsenjwako kusho kukholelwa tintfo letilite yini?

⁶ Akusinjalo! Pawula watsi kukholwa kweliciniso kwakhelwa esisekelweni lesicinile. Ngesikhatsi atsi kukholwa “kukutilindzela ngekuciniseka tintfo,” wasebentisa ligama lelingahunyushwa nangekutsi “litayitela.” Asesitsi umuntfu wetsembisa kukunika indlu. Angase akunike litayitela bese utsi: “Nali-ke likhaya lakho.” Usuke angasho kutsi sewutawuhlala kulelipheshana, kunaloko usho kutsi leliphepha lisicinisekiso lesisemtsetfweni sekutsi lendlu seyakho. Ngendlela lefanako, bufakazi bekukholwa kwetfu buciniseke kakhulu futsi bunemandla kangangekutsi sekufana nekutsi sitibonile letintfo tenteka.

7. Kukholwa kweliciniso kufaka ekhatsi ini?

⁷ Ngako kukholwa kweliciniso kufaka ekhatsi kuciniseka lokusekelwe ebufakazini kanye nekuba nelitsemba lelinganyakatiseki, lelinakisise Jehova Nkulunkulu. Kusenta simbone anguBabe lonelutsandvo futsi setsembe kutsi tonkhe tetsembiso takhe titawugcwaliseka nakanjani. Kodvwa-ke kukholwa kweliciniso kufaka ekhatsi lokunye lokunyenti. Njengobe senta etintfweni letiphilako, nako kufanele sikunakekele kute kuchubeke kukhona. Kufanele sikuvete ngetento tetfu, ngale kwaloko kungaphela.​—Jak. 2:26.

8. Kungani kukholwa kubaluleke kangaka?

⁸ Kungani kukholwa kubaluleke kangaka? Pawula usiniketa imphendvulo letsintsa inhlitiyo. (Fundza Hebheru 11:6.) Ngeke sikwati kukhuluma naJehova nobe kumjabulisa nangabe site kukholwa. Ngako-ke, kukholwa kubalulekile nangabe sifuna kwenta loko lokuyinjongo lenkhulu futsi lebalulekile yabo bonkhe bantfu, lokusho kusondzela kuBabe wetfu wasezulwini Jehova kanye nekumkhatimulisa.

9. Jehova ubonise njani kutsi uyasibona sidzingo sekutsi sibe nekukholwa?

⁹ Jehova uyati kutsi sikudzinga kangakanani kukholwa, ngesizatfu saloko usinika tibonelo kuze asifundzise kutsi singakwakha kanjani nekutsi singakubonisa njani. Ubusise libandla lebuKhristu ngetibonelo temadvodza letsembekile laholako. LiVi lakhe litsi: “Lingisani kukholwa  kwabo.” (Heb. 13:7) Usinike nalokunye lokwengetiwe. Pawula wakhuluma ‘ngelifu lelikhulu labofakazi,’ lokungemadvodza nebafati basendvulo labasishiyela tibonelo letinhle kakhulu tekukholwa. (Heb. 12:1) Luhla lwaPawula lwebantfu labetsembekile lolutfolakala kumaHebheru sehluko 11 alubabali bonkhe bantfu labetsembekile. LiBhayibheli ligcwele tindzaba letiliciniso letimayelana nemadvodza nebafati kanye nalabancane nalabadzala lebebaphila ngendlela lengafani, labachubeka baphila ngekukholwa futsi labanalokunyenti labangasifundzisa kona njengobe siphila esikhatsini lapho bantfu bete khona kukholwa.

10. Sifundvo lesitichubela sona singasisita njani kutsi silingise emadvodza nebafati labetsembekile lokukhulunywa ngabo eBhayibhelini?

¹⁰ Ngeke ukwati kulingisa umuntfu lotsite nangabe ungacali ngekutsi umbukisise. Njengobe ufundza lencwadzi, utawubona kutsi kwentiwe lucwaningo lolukhulu kuze ukwati kulingisa lamadvodza nebafati labanekukholwa. Kungani nawe ungenti lokufanako ngekutsi utentele lucwaningo lolwengetiwe? Nawutichubela sifundvo sakho, phenyisisa liBhayibheli usebentisa emathulusi ekucwaninga lonawo. Njengobe uzindla ngaloko lokufundzako, yetama kuyibona ngemehlo engcondvo indzawo lokukhulunywa ngayo eBhayibhelini, ucabange nangesimo lebesikhona. Yetama kubona lendzawo, uve imisindvo, uhogele liphunga kube shengatsi nawe bewulapho. Lokubaluleke kakhulu kutsi wetame kucondza indlela lebebativa ngayo labantfu lokusuke kukhulunywa ngabo. Njengobe ucondza simo lamadvodza nebafati labetsembekile lebebakuso, kutawuba shengatsi ubabona mbamba, futsi ubetayele​—labanye babo bangase babe njengebangani bakho labakhulu.

11, 12. (a) Ungativa njani usondzelene na-Abrama kanye naSarayi? (b) Ungazuza njani esibonelweni saHana, sa-Elija kanye nesaSamuweli?

¹¹ Nasewubati kahle utawufuna kubalingisa. Nasi sibonelo: Asewuticabange ufuna kwentela Nkulunkulu umsebenti lotsite. Inhlangano yaJehova ifuna wandzise umsebenti lomentela wona. Mhlawumbe ucelwa kutsi utfutsele ensimini lenesidzingo lesiphutfumako sebamemeteli, nobe kutsiwe wente lolunye luhlobo lwekushumayela longaketayelani nalo nobe longakhoni kulwenta kahle. Njengobe ucabanga ngalesabelo futsi uthantaza, angeke yini kukusite kuzindla ngesibonelo sa-Abrama? Yena naSarayi bebatimisele kudzela kunetseteka kwase-Uri, futsi babusiswa kakhulu ngekwenta njalo. Njengobe uchubeka ubalingisa, utawuva kutsi sewubati kahle kwendlula ekucaleni.

¹² Ngendlela lefanako, kutsiwani nangabe umuntfu lotsite losondzelene naye akuphatsa kabi, wase utiva udvumatekile​—mhlawumbe wabona kuncono kutihlalela ekhaya ungasayi emihlanganweni? Kucabanga ngesibonelo saHana kanye nendlela lamelana ngayo nekuphatfwa kabi nguPhenina kungakusita ukwati kutsatsa sincumo lesikahle, futsi  Hana angaba ngumngani wakho loligugu. Ngendlela lefanako, nangabe udvumatekile ngenca yekutiva ungakabaluleki, ungasondzelana na-Elija ngekufundza ngesimo sakhe lesimatima kanye nendlela Jehova lamdvudvuta ngayo. Bantfu labasha labacindzetelwa kutiphatsa kabi kwebantfwana labafundza nabo, bangativa basondzelene naSamuweli nasebafundze indlela lahlangabetana ngayo nekuyenga kwemadvodzana a-Eli labesethendeni lekukhontela.

13. Kulingisa kukholwa kwebantfu lokukhulunywa ngabo eBhayibhelini kungenta kukholwa kwakho kungabaluleki yini kuJehova? Chaza.

¹³ Kulingisa kukholwa kwebantfu lokukhulunywa ngabo eBhayibhelini kwenta kukholwa kwakho kungabaluleki yini kuJehova? Cha akusinjalo! Khumbula kutsi liVi laJehova lisikhutsata kutsi silingise bantfu labanekukholwa. (1 Khor. 4:16; 11:1; 2 Thes. 3:7, 9) Ngetulu kwaloko, labanye bebantfu lesitawukhuluma ngabo nabo bebalingise labanye labetsembekile lebebaphila ngembikwabo. Sibonelo saloko kutsi eSehlukweni 17 salencwadzi kuvakala shengatsi Mariya wacaphuna emavi aHana njengobe abemtsatsa ngekutsi usibonelo sakhe. Loku kwabangela kukholwa kwaMariya kwaba butsakatsaka yini? Cha! Kunaloko sibonelo saHana sasita Mariya kutsi akhe kukholwa kwakhe kute atakhele ligama naJehova Nkulunkulu.

14, 15. Ngutiphi letinye tintfo letikulencwadzi, futsi singatisebentisa njani ngendlela lelusito?

¹⁴ Lencwadzi ishicilelwe kuze ikusite ucinise kukholwa kwakho. Tehluko tayo titsetfwe etihlokweni teluchungechunge lolutsi “Lingisa Kukholwa Kwabo” lebetitfolakala ku-Sicongosekulindza. Nanobe kunjalo, kunetintfo letinsha letengetwe kuyo. Kufakwe imibuto letasisita sikwati kucoca ngendzaba futsi sikusebentise loko lesikufundzako. Kunetitfombe letinhle futsi leticacile letentelwe ngalokukhetsekile lencwadzi, kantsi leto lebetivele tikhona tikhulisiwe, tentiwa tagcama. Kwengetwe letinye tintfo letilusito letinjengemashadi nemabalave. Lencwadzi letsi Lingisa Kukholwa Kwabo yentelwe kutsi umuntfu atifundzele yena, ifundvwe ngumndeni futsi ifundvwe nasebandleni. Imindeni leminyenti ingase ikujabulele kutifundza ndzawonye letindzaba letikulencwadzi.

¹⁵ Shengatsi lencwadzi ingakusita kutsi ulingise kukholwa kwetinceku taJehova letetsembekile tasendvulo. Shengatsi ingaphindze ikusite uchubeke ukhula ekukholweni kwakho njengobe usondzelana naBabe wakho wasezulwini, longuJehova.