ETEHLUKWENI letimbili lesisandza kutifundza, bangakhi bantfu lesifundze ngabo labavuswa ekufeni?— Basihlanu. Bangakhi kubo lebekubantfwana?— Batsatfu. Wesine lowavuswa bekalijaha. Ucabanga kutsi loko kusikhombisani?—

Kusikhombisa kutsi Nkulunkulu uyabatsandza bantfwana. Kodvwa utabavusa nalabanye labanyenti. Nkulunkulu utawuvusa kuphela labo labebenta lokulungile yini?— Kungenteka kutsi sicabanga kanjalo. Nanobe kunjalo, bantfu labanyenti abazange bafundziswe ngaJehova Nkulunkulu kanye nangeNdvodzana yakhe. Ngako bebenta tintfo letimbi ngobe bafundziswa kutsi bente njalo. Ucabanga kutsi Jehova utabavusa yini bantfu labanjalo?—

LiBhayibheli litsi: “Kutawuba neluvuko lwalabalungile nalabangakalungi.” (Imisebenti 24:15) Batawuvuswelani labo labangakalungi, nobe labangazange bente tintfo letinhle?— Kungobe abazange balitfole litfuba lekufundza ngaJehova nangaloko lafuna bantfu bakwente.

 Ucabanga kutsi bantfu batawuvuswa nini?— Uyakhumbula ngesikhatsi Lazaro afile futsi Jesu etsembisa dzadzewabo Mata atsi: “Umnakenu utawuvuka.” Mata watsi kuye: “Ngiyati kutsi utawuvuka ngelilanga lekugcina nasekuvuswa labafile.” (Johane 11:23, 24) Bekasho kutsini Mata nakatsi Lazaro utawuvuka “ngelilanga lekugcina”?—

Mata bekasivile setsembiso saJesu lesitsi: ‘Bonkhe labasemathuneni batawuphuma.’ (Johane 5:28, 29) ‘Lilanga lekugcina’ ngulesikhatsi bonkhe labasenkhumbulweni yaNkulunkulu bayawuvuswa. Lelilanga lekugcina alisilo ema-awa langu-24. Litawutsatsa iminyaka leyinkhulungwane. LiBhayibheli litsi, ngalelo langa Nkulunkulu ‘utawehlulela bantfu labasemhlabeni.’ Labo latabehlulela batawufaka ekhatsi nalabo labavusiwe.​—Imisebenti 17:31; 2 Phetro 3:8.

Cabanga ngekutsi lelo kutawuba lilanga lelijabulisa kangakanani. Kuleyo minyaka leyinkhulungwane lefanana nelilanga linye, tigidzi tebantfu labafa titawuvuswa. Jesu ubita indzawo labatawuvukela kuyo ngekutsi liPharadisi. Ase sicoce ngekutsi liPharadisi litawuba kuphi nekutsi kutawuba njani kuphila lapho.

Kusasele ema-awa lamatsatfu kutsi Jesu afe elugodvweni lwekuhlushwa, wakhuluma ngeliPharadisi endvodzeni lebeyibetselwe esigodvweni eceleni kwakhe. Lendvodza beyibulawelwa emacala lebeyiwentile. Njengobe lesigebengu sibuka Jesu futsi silalela loko lakusho ngaye, sacala kukholwa kuJesu. Ngako lesigebengu satsi: “Ungikhumbule  nawufika eMbusweni wakho.” Jesu wasiphendvula watsi: “Lamuhla ngiyakutjela ngitsi: Utawuba nami ePharadisi.”​—Lukha 23:42, 43.

Bekasho kutsini Jesu nakakhuluma lamavi? Likuphi liPharadisi?— Ase ucabange ngako. Belikuphi liPharadisi?— Khumbula, Nkulunkulu waniketa indvodza yekucala Adamu kanye nemfati wayo lipharadisi kutsi baphile kulo khona lapha emhlabeni. Belibitwa ngekutsi yinsimi yase-Edeni. Bekunetilwane kuleyo nsimi, kodvwa betingalimati muntfu. Bekuphindze kube netihlahla lebetinetitselo letinyenti letimnandzi kanye nemfula lomkhulu. Bekuyindzawo lenhle kakhulu longaphila kuyo!​—Genesisi 2:8-10.

Nasifundza ngalesigebengu sisePharadisi, kufanele siticabange sisemhlabeni lowentiwe waba yindzawo lenhle lesingaphila kuyo. Jesu utawube alapha emhlabeni loliPharadisi yini kanye nalesigebengu?— Cha-ke. Uyati yini kutsi kubangelwa yini loko?—

Kungobe Jesu utawube asezulwini abusa, ayiNkhosi ePharadisi lesemhlabeni. Jesu utawuba nalendvodza ngemcondvo wekutsi utayivusa emathuneni aphindze anakekele tidzingo tayo. Kodvwa yini letawenta Jesu avumele umuntfu lowake waba sigebengu kutsi aphile ePharadisi?— Ake sibone kutsi singayitfola yini imphendvulo.

Ngembikwekutsi lesigebengu sikhulume naJesu, besinalo yini lwati ngetinjongo taNkulunkulu?— Besite. Senta tintfo letimbi ngobe  besingalati liciniso ngaNkulunkulu. EPharadisi, lesigebengu sitawufundziswa ngetinjongo taNkulunkulu. Ngaleso sikhatsi, sitawuba nelitfuba lekukhombisa kutsi simtsandza mbamba Nkulunkulu ngekwenta intsandvo yakhe.

Bonkhe bantfu labatawuvuswa batawuphila ePharadisi lelisemhlabeni yini?— Ngeke. Uyati kutsi kutawubangelwa yini loko?— Kungobe labanye batawuvuswa kute baphile naJesu ezulwini. Batawubusa naye babe ngemakhosi ePharadisi lelisemhlabeni. Ake sicoce ngekutsi loko sikusho ngani.

Ngebusuku bangembikwekutsi Jesu afe, watjela baphostoli bakhe kutsi: ‘Ekhaya laBabe ezulwini kunetindzawo tekuhlala letinyenti, futsi ngitawuhamba kuze ngiyonilungisela indzawo.’ Ngemuva kwaloko, wabetsembisa: “Ngitawuphindze ngite futsi nginemukele, kuze lapho ngikhona khona nani nibe khona.”​—Johane 14:2, 3.

 Waya kuphi Jesu ngemuva kwekutsi avuswe?— Wabuyela ezulwini kuBabe wakhe. (Johane 17:4, 5) Ngako Jesu wetsembisa baphostoli nalabanye balandzeli bakhe kutsi utabavusa kuze babe naye ezulwini. Yini labatayenta lapho banaJesu?— LiBhayibheli litsi balandzeli bakhe labatawuba nencenye “eluvukweni lwekucala” batawuphila ezulwini futsi babuse tikwemhlaba “njengemakhosi kanye naye iminyaka leyinkhulungwane.”​—Sembulo 5:10; 20:6; 2 Thimothi 2:12.

Bangakhi labatawuba nencenye “eluvukweni lwekucala” baphindze babuse naJesu babe ngemakhosi?— Jesu watjela balandzeli bakhe watsi: “Ningesabi mhlambi lomncane, ngobe uYihlo uncume kuninika uMbuso.” (Lukha 12:32) ‘Lomhlambi lomncane’ lotawuvuswa kuze ube naJesu eMbusweni wakhe ezulwini, ulinani lelitsite. LiBhayibheli libonisa kutsi bantfu ‘labatinkhulungwane letilikhulu nemashumi lamane nakune’ batawuvuswa emhlabeni.​—Sembulo 14:1, 3.

Bangakhi labatawuphila ePharadisi emhlabeni?— LiBhayibheli alisho. Kodvwa Nkulunkulu bekatjele Adamu na-Eva ngesikhatsi basensimini yase-Edeni kutsi batale bantfwana bagcwalise umhlaba. Siyati kutsi behluleka kwenta njalo. Kodvwa Nkulunkulu utakwenta konkhe kuze injongo yakhe yekutsi umhlaba ugcwale bantfu labalungile ifezeke.​—Genesisi 1:28; Isaya 45:18; 55:11.

Ase ucabange kutsi kutawujabulisa kangakanani kuphila ePharadisi. Umhlaba wonkhe utawufanana nelipaki. Litawube ligcwele tinyoni, tilwane, tihlahla letinhle kanye netinhlobonhlobo tetimbali. Kute lotawuba nebuhlungu bekugula futsi kute lotawufa. Bonkhe bantfu batawuba bangani. Nangabe sifuna kuphila phakadze ePharadisi, lesi sikhatsi sekutsi sitilungiselele.