Umhlangano wesifundza wa-2020 bewuyincophamlandvo. Bekungumhlangano wesifundza wekucala wekutsi urekhodwe uphindze wentiwe utfolakale ku-Internet! Nobe kunjalo, bazalwane nabodzadze baseMalawi naseMozambique bakhonile kubukela lomhlangano ngaphandle kwe-Internet. Kwenteka njani loko?

 IKomidi Yebachumanisi neKomidi Yekufundzisa yeSigungu Lesibusako yaniketa imvume kutsi lomhlangano wesifundza usakatwe ku-radio naku-TV eMalawi naseMozambique. Kungani kwenteka lokwehlukile kulamave? IMalawi ine-Internet ledule kakhulu emhlabeni wonkhe, ngako bambalwa boFakazi labakhona kungena kuyo. William Chumbi, lolilunga leKomidi Yeligatja laseMalawi, uyachaza: “I-radio ne-TV bekungiko kuphela lebesingakusebentisa kuze sinikete bazalwane nabodzadze imfundvo levela kuNkulunkulu.” Luka Sibeko, naye lolilunga leKomidi Yeligatja laseMalawi, uyengeta: “Kube asikawusakati lomhlangano nge-TV nobe nge-radio, bebatawuba mbalwa bazalwane ensimini yeligatja letfu lebebatawutfola futsi bazuze kuwo.” NaseMozambique bambalwa bazalwane labakhona kutsenga tincingo letikahle, ingasaphatfwa-ke yekungena ku-Internet.

 Kusukela kwacala i-COVID-19, letinye titeshi te-TV ne-radio besetivele tisakata imihlangano yelibandla. a Bazalwane betfu bacela letiteshi kutsi tibangetele sikhatsi kuze bakhone kusakata nemhlangano wesifundza.

 Bazalwane betfu eMalawi babhekana nenkinga ngobe letiteshi tekusakata betiniketa emakhasimende ato li-awa linye lekusakata. Loku kungenca yekutsi labaphatsi baletiteshi bayakhatsateka kutsi luhlelo naluludze, bantfu batawubese baphelelwa ngumdlandla wekubukela nobe kulalela. Kodvwa bazalwane bachaza kutsi umsebenti wetfu kusita bantfu. Ngisho nakulesikhatsi sekuvaleleka emakhaya, siniketa bantfu tindzaba letimnandzi letidvudvutako letivela eBhayibhelini kuze tibasite babe takhamuti letikahle futsi babe nemindeni lejabulako. Nabeva ngaloku, labaphatsi betiteshi basemukela sicelo sebazalwane betfu sekungeta sikhatsi sekusakata.

 EMalawi lomhlangano wasakatwa kusinye siteshi se-TV kanye nakusinye siteshi se-radio, totimbili tisakata eveni lonkhe futsi kungenteka tifinyelela bantfu labangetulu kwa-1 million. EMozambique lomhlangano wasakatwa kusinye siteshi se-TV kanye nasetiteshini te-radio letingu-85.

 Kuze kusakatwe lomhlangano kuwo omabili lamave, kwacitfwa imali lengaba ngu-E404 779 ($28 227) b ku-TV, kanye nalecishe ibe ngu-E286 296 ($20 000) ku-radio. Titeshi letincane te-radio betibita E219 ($15), bese kutsi titeshi letinkhulu, letisakata eveni lonkhe, betibita E40 630 ($2 777).

 Bazalwane betfu benta konkhe lokusemandleni abo kuze bayisebentise kahle iminikelo. Sibonelo nje, eMalawi bakhona kukhulumisana nebaphatsi betiteshi kuze babehlisele nga-30%. Loku kwabasita bonga imali lengaba ngu-E25 033 ($1 711). EMozambique letinye titeshi betifuna kusehlisela imali ngenca yekwatiwa ngekwetsembeka nekubhadala ngesikhatsi.

 Bazalwane betfu babonga kakhulu ngekulalela nekubukela umhlangano wesifundza etiteshini te-radio nete-TV endzaweni yakubo. Patrick, longulomdzala welibandla eMalawi, utsi: “Sibabonga kakhulu bazalwane beSigungu Lesibusako ngekusicabangela kulesikhatsi salomkhuhlane.” Isaac, naye lohlala eMalawi, utsi: “Site tintfo tebuchwephesha, ngako siyibonga kakhulu inhlangano yaJehova ngekusihlelela kutsi silalele umhlangano wesifundza ku-radio. Ngenca yaloluhlelo, umndeni wami wonkhe uzuzile kulomhlangano. Loku kube bufakazi bekutsi Jehova uyabatsandza bantfu bakhe.”

 Kulomunye ummemeteli waseMozambique, umhlangano wesifundza wa-2020 bekungiwo umhlangano wakhe wekucala. Utsi: “Kubukela umhlangano wesifundza ku-TV, kungikhumbute kutsi Jehova unguNkulunkulu Somandla. Lomkhuhlane awukamvimbi kutsi asinikete imfundvo levela kuye sisetindlini tetfu. Ngibubonile bufakazi bekutsi bantfu baJehova banelutsandvo futsi ngiyaciniseka kutsi lena yinkholo yeliciniso.”

 Lomdzala welibandla lokutsiwa ngu-Wyson, utsi: “Ngitsandza kubonga indlela sisebenti lesetsembekile lesisinakekele ngayo kulesikhatsi salomkhuhlane. Loluhlelo lwekusakata umhlangano wesifundza ku-radio naku-TV lusite linyenti letfu leleswele kantsi lihlala nasemaveni laphuyile kutsi litfole lomhlangano wesifundza futsi lizuze kuwo.”

 IKomidi Yebachumanisi neYekufundzisa ihlele intfo lefanako emaveni latsite kuze bazalwane bakhone kutfola umhlangano wesifundza wa-2021 ku-radio nobe ku-TV. Tibhadalwa ngani letindleko tekusakata umhlangano wesifundza? Ngeminikelo yemsebenti wemhlaba wonkhe leyentiwa ngetindlela letehlukahlukene letitfolakala ku-website letsi donate.jw.org. Sibonga kakhulu ngaleminikelo yenu.