“Livi laNkulunkulu liphilile, linemandla.”​—HEB. 4:12.

1. Singangena njani ekuphumuleni kwaNkulunkulu lamuhla, kodvwa kungani loko kungase kube matima ngaletinye tikhatsi?

 ESIHLOKWENI lesengcile, sibonile kutsi singangena ekuphumuleni kwaNkulunkulu ngekutsi simlalele futsi sibambisane nenjongo yakhe. Kodvwa ngaletinye tikhatsi kungase kube matima kulalela. Nasi sibonelo: Nasifundza kutsi Jehova uyayitondza intfo letsite lesiyitsandzako, ekucaleni singase sivukele. Loku kuveta kutsi kufanele sitfutfuke, ngekutsi sifundze ‘kulalela.’ (Jak. 3:17) Kulesihloko, sitawuhlola letinye timo lapho singaveta khona kutsi sifuna kulalela ngato tonkhe tikhatsi.

2, 3. Ngumuphi umetamo lokufanele sichubeke siwenta kute sitsandzeke kuJehova?

² Uyakulungela yini kwemukela seluleko lesivela eBhayibhelini? ImiBhalo isitjela kutsi intsandvo yaNkulunkulu ikutsi atibutsele ‘lokulangatelelwa tive tonkhe.’ (Hag. 2:7) Kuliciniso kutsi labanyenti betfu bebangatsandzeki ngesikhatsi bacala kufundza liciniso. Nanobe kunjalo, lutsandvo ngaNkulunkulu kanye nangeNdvodzana yakhe letsandzekako lwasichuba kutsi sente lushintjo lolukhulu endleleni lesicabanga ngayo kanye nasetentweni tetfu kute sijabulise Nkulunkulu. Ngemuva kwekuthandaza kanye nekwenta umetamo lomkhulu,  sagcine sibhajatisiwe futsi saba ngemaKhristu.​—Fundza Kholose 1:9, 10.

³ Nanobe kunjalo, kulwisana kwetfu nesono akuzange kuphele ngesikhatsi sibhajatiswa. Lemphi isetawuchubeka njengobe sisenesono. Kodvwa siyaciniseka kutsi nasichubeka silwa futsi senta konkhe lokusemandleni etfu kute sitsandzeke kuNkulunkulu, utawusibusisa.

Nakudzingeka Seluleko

4. Ngutiphi tindlela letintsatfu seluleko lesivela emBhalweni lesingasitfola ngato?

⁴ Ngembikwekutsi sicale kulungisa emaphutsa etfu, kufanele siwati. Inkhulumo letsintsa inhlitiyo leyetfulwa eHholweni leMbuso nobe sihloko lesitsite lesitfolakala etincwadzini tetfu singasisita kutsi sibone emaphutsa etfu. Ngakulokunye, nangabe singacondzi kutsi kufanele sente lushintjo ngisho nangemuva kwekulalela inkhulumo nobe kufundza sihloko lesitsite, Jehova angasebentisa lomunye umKhristu kutsi asisite sibone liphutsa letfu.​—Fundza Galathiya 6:1.

5. Shano letinye tintfo letingatsandzeki lesingase sitente lapho siniketwa seluleko, futsi uchaze kutsi kungani labadzala labangemaKhristu kufanele bachubeke betama kusisita.

⁵ Akusimelula kwemukela seluleko lesivela kumuntfu lonesono, ngisho nobe angasibeka ngelikhono nangelutsandvo kangakanani. Nanobe kunjalo, njengobe incwadzi yaGalathiya 6:1 iveta, Jehova uyala labadzala kutsi betame kusilungisa, futsi bente njalo “ngemoya wekutfobeka.” Nangabe silalela, sitawutsandzeka kakhulu emehlweni aNkulunkulu. Kuvamile kutsi nasithandaza sivume kutsi sinesono nekutsi siyawenta emaphutsa. Nanobe kunjalo, nangabe lotsite sekasitjela ngeliphutsa lesilentile, sivame kutitsetselela, sente lenkinga ibonakale iyincane, singabate sisusa salona lobekaseluleka, nobe singayijabuleli indlela leselulekwe ngayo. (2 Khos. 5:11) Nangabe leseluleko sitsintsa indzaba lebaluleke kakhulu​—kungaba kutiphatsa kwelilunga lemndeni wetfu, indlela yetfu yekugcoka neyekutilungisa, kuhlanteka, nobe luhlobo lolutsite lwekutijabulisa lesilutsandzako kodvwa lolungatsandzeki kuJehova​—singase sitfukutsele futsi sente intfo letawusivisa buhlungu tsine kanye nalona lobekaseluleka. Kodvwa lapho sesehlise umoya, sivame kuvuma kutsi leseluleko besifanele.

6. Livi laNkulunkulu liyembula njani “imicabango netifiso tenhlitiyo”?

⁶ UmBhalo lokusekelwe kuwo lesihloko usikhumbuta kutsi livi laNkulunkulu “linemandla.” Livi laNkulunkulu linemandla ekushintja kuphila kwebantfu. Lingakwati kusisita kutsi sente lushintjo ngemuva kwekubhajatiswa njengobe lasisita ngesikhatsi sisengakasitsatsi leso sinyatselo. Encwadzini yakhe layibhalela emaHebheru, Pawula waphindze watsi livi laNkulunkulu “lisika lidzimate lehlukanise umphefumulo nemoya, emalunga nemnkantja, lehlulele imicabango netifiso tenhlitiyo.” (Heb 4:12) Ngalamanye emavi, nangabe sifundza eBhayibhelini mayelana naloko Nkulunkulu lafuna sikwente, tento tetfu titawuveta loko lesingiko ngekhatsi. Ngaletinye tikhatsi, uba khona yini umehluko emkhatsini waloko bantfu labakubonako kitsi (“umphefumulo”) kanye naloko lesingiko ngekhatsi (‘umoya’)? (Fundza Matewu 23:27, 28.) Asewucabange ngaloko lobewungakwenta kuletimo letilandzelako.

Hambisana Nenhlangano YaJehova

7, 8. (a) Yini lokungenteka kutsi yenta lamanye emaKhristu langemaJuda abambelela kuletinye tincenye teMtsetfo waMosi? (b) Imetamo yawo beyiphambene njani nenjongo yaJehova?

⁷ Linyenti letfu lingakwati kuwusho ngenhloko umBhalo weTaga 4:18, lotsi: “Indlela yalabalungile ifanana nekukhanya kwentsatsakusa, lokuya ngekuya kuze kube ngusemini.” Loku kusho kutsi indlela lesitiphatsa ngayo kanye nalesiyicondza ngayo injongo yaNkulunkulu itawutfutfuka njengobe sikhatsi sichubeka.

 ⁸ Njengobe sifundzile esihlokweni lesengcile, ngemuva kwekufa kwaJesu, emaKhristu lamanyenti langemaJuda akutfola kumatima kuyekela kubambelela eMtsetfweni waMosi. (Imis. 21:20) Ngisho nobe Pawula achaza ngalokucacile kutsi emaKhristu abengasekho ngephansi kweMtsetfo, lamanye awo akazange akwemukele loko Jehova labekufuna kuwo. (Khol. 2:13-15) Mhlawumbe abecabanga kutsi ngekuchubeka alalela tincenye letitsite teMtsetfo, abetawubalekela kushushiswa. Kunobe ngukuphi, Pawula wabhalela emaKhristu langemaHebheru, achaza ngalokucacile kutsi abengeke angene ekuphumuleni kwaNkulunkulu nangabe angafuni kwenta ngekuvumelana nenjongo yaKhe. a (Heb. 4:1, 2, 6; fundza Hebheru 4:11.) Kute emukeleke kuJehova, bekufanele acaphele kutsi sewufuna bantfu bakhe bamkhonte ngalenye indlela.

9. Kufanele sitive njani lapho kwentiwa lushintjo endleleni lesiticondza ngayo tintfo letisemiBhalweni?

⁹ Etikhatsini tetfu, kube nelushintjo endleleni lesiticondza ngayo letinye timfundziso teliBhayibheli. Loku akukafaneli kusikhatsate, kunaloko kufanele kucinise kwetsembela kwetfu esisebentini lesetsembekile nalesihlakaniphile. Lapho bameleli ‘balesisebenti’ babona kutsi umbono wetfu ngemfundziso letsite kufanele ubuketwe futsi ulungiswe, abesabi kuveta lolo shintjo. Intfo lebaluleke kakhulu kuso kubambisana nenjongo yaJehova kunekukhatsateka ngekutsi bantfu batawukhuluma kabi ngaso ngesizatfu salolo shintjo lolwentiwe. Wena utiva njani nangabe kwentiwa lushintjo endleleni lesiyicondza ngayo imiBhalo?​—Fundza Lukha 5:39.

10, 11. Ngutiphi tifundvo lesingatitfola kuloko labanye labakwenta ngesikhatsi kucalisa tindlela letinsha tekushumayela?

¹⁰ Asesicabange ngalesinye sibonelo. Ekupheleni kwelikhulu lesi-19 kanye nasekucaleni kwelikhulu lesi-20, labanye Bafundzi beliBhayibheli labebanelikhono lekukhuluma embikwelinyenti bebacabanga kutsi kwetfula tinkhulumo letilungiselelwe kahle kuyindlela lencono kakhulu yekushumayela. Bebakutsandza kukhuluma embikwelinyenti, futsi labanye babo bebajabula lapho tilaleli tibabonga ngetinkhulumo tabo. Kodvwa ngekuhamba kwesikhatsi, kwacaca kutsi Jehova ufuna bantfu bakhe bashumayele ngaletinye tindlela, njengekuhamba umuti ngemuti. Labanye balabo labebanelikhono lekwetfula tinkhulumo abazange bafune kwenta njalo. Bebabonakala shengatsi bayamtsandza Jehova futsi batinikele kuye. Nanobe kunjalo, imicabango, tifiso, kanye netisusa tabo tabonakala ngalokucacile lapho sekufanele babambisane nenjongo yaNkulunkulu mayelana nemsebenti wekushumayela. Jehova wativa njani ngabo? Akazange ababusise, futsi bayishiya inhlangano yakhe.​—Mat 10:1-6; Imi 5:42; 20:20.

¹¹ Loku akusho kutsi laba labanye labebatsembekile enhlanganweni yaJehova bakutfola kumelula kushumayela. Ekucaleni, labanyenti babo bebakutfola kumatima kwenta lomsebenti, kodvwa balalela. Ngekuhamba kwesikhatsi, bakuncoba kwesaba, futsi Jehova wababusisa kakhulu. Wena wenta njani lapho ucelwa kutsi uhlanganyele endleleni letsite yekushumayela longase uyibone imatima? Uyakulungela yini kulalela ngisho nalapho ungazange uke uyetame?

Nangabe Umuntfu Lesimtsandzako Ashiya Jehova

12, 13. (a) Kungani Jehova atsi kufanele ‘lomubi acoshwe’ emkhatsini wetfu? (b) Nguluphi luvivinyo labanye batali labangemaKhristu labahlangabetana nalo, futsi yini leyenta loluvivinyo lube matima?

¹² Kungenteka kutsi sonkhe siyavumelana nalesimiso lesitsi kufanele sihlanteke emtimbeni, endleleni lesitiphatsa ngayo, kanye nasekukhonteni kwetfu Nkulunkulu kute simjabulise. (Fundza Thithusi 2:14.) Nanobe  kunjalo, kutawuba netikhatsi lapho kwetsembeka kwetfu kuNkulunkulu kutawuvivinywa khona. Asesitsi indvodzana lekukuphela kwayo yebatali labangemaKhristu lasibonelo ishiya emaciniso. Ngesizatfu sekutsi ikhetse ‘kutijabulisa esonweni kwesikhashana’ kunekuba nebuhlobo lobuhle naJehova kanye nebatali bayo, iyasuswa ekuhlanganyeleni.​—Heb. 11:25.

¹³ Labatali beva buhlungu kakhulu. Bayati kutsi liBhayibheli litsi ‘singahlanganyeli nemuntfu lekutsiwa ngumzalwane kantsi uyingwadla, nome siphingi, nome ngulobukhali, nome ngulokhonta tithico, nome ngulowetfukanako, nome sidzakwa, nome sigebengu, singete sadla ngisho nekudla nemuntfu lonjalo.’ (1 Khor. 5:11, 13) Baphindze bacaphele nekutsi ligama lelitsi “nemuntfu” lelitfolakala kulelivesi lifaka ekhatsi emalunga emndeni labangahlali nawo. Nanobe kunjalo bayayitsandza indvodzana yabo. Kucabangisisa kwabo ngalendzaba kungabenta batsi: ‘Singayisita njani indvodzana yetfu kutsi ibuyele kuJehova nangabe sitehlukanisa nayo? Angeke yini siyisite ngekutsi sihlale sicoca nayo?’ b

14, 15. Ngusiphi sincumo batali labanebantfwana labasusiwe lokufanele basitsatse?

¹⁴ Natsi sisivisa buhlungu kakhulu lesimo labatali labakuso. Nanobe kunjalo, lendvodzana yabo beyinenkhululeko yekutikhetsela, ngako-ke yakhetsa kuphishanekela imphilo lembi kunekutsi ijabulele buhlobo lobusedvute nebatali bayo kanye nalamanye emaKhristu. Ngesizatfu sekutsi labatali kute labangakusho, kubavisa buhlungu loko.

¹⁵ Yini labatali labatawuyenta? Batawusilalela yini sicondziso saJehova? Nobe batawuphetsa ngekutsi batawuchubeka bacoca nendvodzana yabo, bese bavika ngekutsi “tindzaba temndeni”? Njengobe batawube benta sincumo, kufanele bakhumbule kutsi Jehova utiva njani ngaloko labakwentako. Injongo yakhe kugcina inhlangano yakhe ihlantekile, futsi asite nalabo labente lokubi kutsi bashintje indlela labatiphatsa ngayo. Batali labangemaKhristu bangakhombisa njani kutsi nabo nguloko labakufunako ngendvodzana yabo?

16, 17. Yini lesingayifundza nasizindla ngesibonelo sa-Aroni?

¹⁶ Aroni, umnakaboMosi, wahlangabetana nebumatima ngesizatfu semadvodzana akhe lamabili. Asewucabange kutsi wativa njani ngesikhatsi emadvodzana akhe boNadabi kanye na-Abihu benta umnikelo wekushiswa lobewungasingcwele kuJehova futsi babulawa. Ecinisweni, loko kwacedza buhlobo lobusedvute lamadvodzana labebanabo nebatali babo. Ngetulu kwaloko, Jehova wayala Aroni kanye nemadvodzana akhe letsembekile: “Tinwele tenu ningatiyekeli tingemahlutse, kantsi netimphahla tenu akufuneki nitidzabule [ngesizatfu sekukhala]. Funa nitsi niyakwenta loko nife, nelulaka lwaNkulunkulu lwehlele sive sonkhe.” (Lev. 10:1-6) Loku kucacile:  Lutsandvo lwetfu ngaJehova kufanele lube lukhulu kwendlula lolo lesinalo ngemalunga emndeni wetfu langaketsembeki.

¹⁷ Lamuhla, Jehova akasheshi abajezise labo labangawulaleli umtsetfo wakhe. Ngelutsandvo ubanika sikhatsi sekutsi baphendvuke emisebentini yabo lemibi. Ngako-ke, Jehova utawutiva njani nangabe batali bebantfwana labangakaphendvuki bachubeka bamvivinya ngekutsi batihlanganise ngephandle kwesidzingo nebantfwana babo labasusiwe?

18, 19. Ngutiphi tibusiso letitfolwa ngemalunga emndeni lasebentisa ticondziso taJehova letimayelana nebantfu labasusiwe?

¹⁸ Bantfu labanyenti labake basuswa bayavuma kutsi kwetsembeka kwebangani babo kanye nekwemalunga emndeni kubente bashintja indlela lebebatiphatsa ngayo. Ngesikhatsi bavuma kutsi lomunye dzadze losemusha abuyiselwe ekuhlanganyeleni, labadzala belibandla batsi lodzadze abeshintje indlela labephila ngayo “ngesizatfu sekutsi umnakabo abekuhlonipha kususwa kwemuntfu ekuhlanganyeleni.” Lodzadze watsi: “Kunamatsela kwemnaketfu ngekwetsembeka eticondzisweni temBhalo kwangisita ngafuna kubuya.”

¹⁹ Singaphetsa ngekutsini? Kufanele silwe nemkhuba wekuvukela siyalo lesivela emiBhalweni. Kufanele siciniseke ngekutsi indlela yaNkulunkulu yekucatulula tinkinga incono kakhulu.

“Livi LaNkulunkulu Liphilile”

20. UmBhalo wemaHebheru 4:12, ungasetjentiswa ngatiphi tindlela letimbili? (Fundza umbhalo longentansi.)

²⁰ Ngesikhatsi Pawula abhala kutsi “livi laNkulunkulu liphilile,” abengakhulumi ngeliBhayibheli. c Lamavi aveta kutsi abekhuluma ngetetsembiso taNkulunkulu. Pawula abesho kutsi Nkulunkulu akenti setsembiso bese angasifezi. Jehova wakusekela loku asebentisa umphrofethi Isaya: ‘Nelivi lami . . . Lingeke libuye kimi yabayaba, kodvwa . . . litawufeza umgomo walo lengilikhiphele wona.’ (Isa. 55:11) Ngako-ke, asikho sidzingo sekutsi sikhatsateke nangabe tintfo tingenteki ngekushesha nobe ngendlela lesifuna ngayo. Jehova ‘usasebenta namanje’ futsi unembono lofanele wekufeza injongo yakhe ngendlela lephumelelako.​—Joh. 5:17.

21. UmBhalo wemaHebheru 4:12 ungawakhutsata njani emalunga latsembekile futsi lasakhulile ‘esicumbi lesikhulu’?

²¹ Emalunga latsembekile futsi lasakhulile ‘esicumbi lesikhulu’ sekakhonte Jehova iminyaka leminyenti. (Semb. 7:9) Labanye bebangakalindzeli kutsi batawuguga kuletikhatsi letimatima. Nanobe kunjalo, abadvumali. (Hla. 92:14) Bayacaphela kutsi setsembiso saNkulunkulu asikafi​—siyaphila, futsi Jehova ulangatelela sikhatsi lapho sitawugcwaliseka khona. Njengobe Nkulunkulu asitsandza setsembiso sakhe, simenta ajabule nangabe sihlala sisikhumbula. Kulelilanga lesikhombisa, Jehova uphumulile, futsi uyajabula ngekutsi injongo yakhe itawugcwaliseka, nelicembu lebantfu bakhe liyayisekela. Yini wena lotawuyenta? Sewungenile yini ekuphumuleni kwaNkulunkulu?

[Imibhalo lengentansi]

Usakhumbula Yini?

• Yini lokufanele uyente kute ungene ekuphumuleni kwaNkulunkulu?

• Nangabe sifundza eBhayibhelini mayelana naloko Nkulunkulu lafuna sikwente, siveta njani kutsi sifuna kumjabulisa?

• Kunini lapho kulalela kwetfu ticondziso temBhalo kungaba matima khona, kodvwa kungani kubalulekile kulalela?

• UmBhalo wemaHebheru 4:12 ungasetjentiswa ngatiphi tindlela letimbili?

[Imibuto Yesihloko Lesifundvwako]

[Sitfombe ekhasini 31]

Batali beva buhlungu!