KUSUKELA nga-1992, Sigungu Lesibusako sabele bazalwane labadzala futsi labavutsiwe kutsi basite emakomidi aso kute bafeze umsebenti waso. * (Fundza umbhalo longentansi.) Labasiti labangemalunga ‘aletinye timvu,’ basita Sigungu Lesibusako ngendlela lebalulekile. (Johane 10:16) Baba khona emihlanganweni lebanjwa maviki onkhe yemakomidi lababelwe kuwo. Umsebenti wabo kuniteka imininingwane ledzingekile futsi bavete imibono yabo. Emalunga eSigungu Lesibusako abese atsatsa sincumo, ngemuva kwaloko basiti baso bayacinisekisa kutsi loko lokuncunyiwe kuyentiwa. Labazalwane banesifiso sekwenta nobe ngumuphi umsebenti lababelwe wona. Bahamba nemalunga eSigungu Lesibusako emihlanganweni lekhetsekile nasemihlanganweni yetive. Bangase futsi babelwe kutsi bavakashele emahhovisi eligatja njengebameleli bendlunkhulu.

Umzalwane losakhonte njengemsiti weSigungu Lesibusako kusukela nga-1992 utsi: “Nangenta umsebenti langabelwe wona, Sigungu Lesibusako siyakwati kunaka kakhudlwana umsebenti waso.” Lomunye umzalwane losekabe ngumsiti iminyaka lengu-20 yena utsi: “Kube lilungelo leliwendlula onkhe lebengiwafisa.”

Sigungu Lesibusako sinikete basiti baso imisebenti leminyenti futsi sibabonga kakhulu labazalwane labetsembekile ngemsebenti wabo wekutimisela. Shengatsi sonkhe ‘singachubeka sibaphatsa ngenhlonipho bantfu labanjengalaba.’—Filiphi 2:29.