1. Yini umphostoli Johane lasikhutsata kutsi sicabange ngayo, futsi leni?

UMPHOSTOLI Johane usikhutsata kutsi sicabangisise ngelutsandvo lolukhulu Jehova lanalo ngatsi. Ku-1 Johane 3:1 siyafundza: “Asenibuke kutsi lukhulu kangakanani lutsandvo Babe lasibonise lona.” Nasizindla ngendlela Jehova lasitsandza ngayo nangendlela lakukhombisa ngayo loko, sisondzelana naye futsi simtsandze kakhulu.

2. Kungani kumatima ngalabanye kucondza kutsi Nkulunkulu uyabatsandza?

² Lokubuhlungu kutsi labanye abacondzi kutsi Nkulunkulu uyabatsandza. Bacabanga kutsi Nkulunkulu akanendzaba nebantfu. Kungenteka bakholelwa kutsi Nkulunkulu ushaya imitsetfo nje kuphela, bese ujezisa bantfu labangayilaleli. Ngesizatfu setimfundziso temanga, labanye bacabanga kutsi Nkulunkulu unelunya nekutsi ngeke kwenteke bamtsandze. Labanye bacabanga kutsi Nkulunkulu utsandza bonkhe  bantfu ngisho nobe bentani. Kodvwa kutadisha kwakho liBhayibheli kukusite walati liciniso ngaJehova. Uyati kutsi lutsandvo lubuntfu bakhe lobuhamba embili nekutsi wanikela ngeNdvodzana yakhe kute ibe yinhlawulo yakho. (Johane 3:16; 1 Johane 4:8) Nanobe kunjalo, ngenca yetintfo letentekile ekuphileni kwakho, mhlawumbe ukutfola kumatima kucondza indlela Jehova lakutsandza ngayo.

3. Yini letasisita kutsi siyicondze indlela Jehova lasitsandza ngayo?

³ Kute siyicondze indlela Jehova lasitsandza ngayo, kufanele sicale ngekucondza kutsi nguye lowasidala. Wasipha kuphila. (Fundza Tihlabelelo 100:3-5.) Kungako liBhayibheli lichaza umuntfu wekucala ngekutsi ‘yindvodzana yaNkulunkulu.’ (Lukha 3:38) Jesu wasifundzisa kutsi sibite Jehova ngekutsi ‘nguBabe wetfu losezulwini.’ (Matewu 6:9) Ngako Jehova unguBabe wetfu, futsi usitsandza ngendlela babe lonelutsandvo latsandza ngayo bantfwana bakhe.

4. (a) Jehova uluhlobo lolunjani lwaBabe? (b) Sitawucoca ngani kulesihloko nakuleso lesilandzelako?

⁴ Kumatima ngalabanye kucabanga ngekutsi babe ungumuntfu lonelutsandvo. Kusenekwenteka kunetintfo letibuhlungu letenteka basebancane, letentiwa bobabe babo. Jehova angeke akwente loko kubantfwana bakhe. UnguBabe loncono kakhulu lesingaba naye. (Tihlabelelo 27:10) Usitsandza kakhulu futsi usinakekela ngetindlela letinyenti. Nasichubeka sibona indlela Jehova lasitsandza ngayo, nelutsandvo lwetfu ngaye lutawukhula. (Jakobe 4:8) Kulesihloko, sitawucoca ngetindlela letine Jehova lasikhombisa ngato kutsi uyasitsandza. Esihlokweni lesilandzelako, sitawufundza ngetindlela letine lesingakhombisa ngato kutsi siyamtsandza.

5. Yini Nkulunkulu layinika bonkhe bantfu?

⁵ Ngesikhatsi umphostoli Pawula ase-Athene, eGreece, wabona kutsi bekunetithico letinyenti futsi bantfu bakhona bebakholelwa kutsi labonkulunkulu babo ngibo lababanike kuphila. Ngako wabatjela ‘ngaNkulunkulu lowadala umhlaba nako konkhe lokukuwo.’ Watsi Nkulunkulu “unika bonkhe bantfu kuphila, umoya, nato tonkhe tintfo” nekutsi “ngaye siyaphila, siyanyakata, futsi sikhona.” (Imisebenti 17:24, 25, 28) Jehova usinika konkhe lesikudzingako kute siphile futsi sikujabulele kuphila. Cabanga ngaletinye tetintfo lasinike tona ngenca yelutsandvo lanalo ngatsi.

6. Jehova wasinika likhaya lelinjani? (Buka sitfombe lesisekucaleni kwalesihloko.)

⁶ Nasi sibonelo: Jehova usilungiselele likhaya lelihle. (Tihlabelelo 115:15, 16) Umhlaba wehlukile kuwo onkhe emaplanethi lawadala. Bososayensi baya enyangeni futsi babona lamanye emaplanethi lamanyenti, kodvwa solo abayitfoli lenye iplanethi lenako konkhe umuntfu lakudzingako kute aphile. Jehova akasiniketi nje kuphela lesikudzingako kute siphile, kodvwa wenta umhlaba waba yindzawo lenhle, lejabulisako futsi lephephile lengasenta sikhone kujabulela kuphila. (Isaya 45:18) Nasicabanga ngalelikhaya Babe wetfu lasinike lona, siyibona mbamba indlela lasitsandza ngayo.—Fundza Jobe 38:4, 7; Tihlabelelo 8:3-5.

7. Indlela Jehova lasidale ngayo ikhombisa njani kutsi usitsandza mbamba?

 ⁷ Lenye indlela Jehova lakhombisa ngayo kutsi uyasitsandza kutsi wasidala sakhona kumlingisa. (Genesisi 1:27) Loku kusho kutsi singayibona indlela lasitsandza ngayo bese natsi simkhombisa indlela lesimtsandza ngayo. Nkulunkulu uyati kutsi nguloko lokusenta sijabule mbamba. Nebantfwana bajabula kakhulu nababona kutsi batali babo bayabatsandza. Ngetulu kwaloko, Jesu wasifundzisa kutsi sitawujabula nangabe sinebuhlobo lobuhle naBabe wetfu longuJehova. (Matewu 5:3) Usinika “tonkhe tintfo lesitijabulelako.” Kuyacaca-ke kutsi uyephana futsi usitsandza kakhulu.—1 Thimothi 6:17; Tihlabelelo 145:16.

8. Kungani sifuna kutsi Jehova asifundzise?

⁸ Bobabe bayabatsandza bantfwana babo futsi abafuni badukiswe nobe bayengwe. Kodvwa batali labanyenti lamuhla  abatemukeli timiso teliBhayibheli letimayelana nalokulungile nalokungakalungi. Ngako abakhoni kubacondzisa kahle bantfwana babo, lokwenta kutsi kube bete injabulo futsi kube nekudideka. (Taga 14:12) Nanobe kunjalo, Jehova ubanika ticondziso letincono bantfwana bakhe ngobe “unguNkulunkulu lowetsembekile.” (Tihlabelelo 31:5) Uyakujabulela kusifundzisa liciniso ngaye. Uphindze asifundzise indlela lokufanele simkhonte ngayo kanye nendlela lencono kakhulu yekuphila. (Fundza Tihlabelelo 43:3.) Yini Jehova lasifundzise yona lekhombisa indlela lasitsandza ngayo?

9, 10. (a) Kungani Jehova asitjela ngaye? (b) Yini lasifundzisa yona ngenjongo yakhe ngatsi?

⁹ Intfo yekucala Jehova layentako, kusichazela ngaye. Ufuna kutsi simati. (Jakobe 4:8) Ngako usitjele libito lakhe. Ecinisweni liBhayibheli likhuluma ngelibito lakhe kwendlula nobe nguliphi lelinye libito. Jehova uphindze asitjele kutsi uluhlobo luni lweMuntfu. Nasibuka tintfo latidalile, siyabona kutsi unemandla futsi uhlakaniphile. (Roma 1:20) Nasifundza liBhayibheli, sifundza ngendlela lanemusa ngayo nekutsi usitsandza kangakanani. Njengobe sifundza ngebunguye baJehova lobuhle, sisondzelana naye.

¹⁰ Jehova uphindze asifundzise ngenjongo yakhe. Usitjela kutsi siyincenye yemndeni wakhe. Uphindze asitjele loko lakulindzele kitsi kute sisebente ngebunye nangekuthula nawo onkhe emalunga emndeni wakhe. LiBhayibheli likuveta ngalokucacile kutsi Nkulunkulu akasidalanga saba nelilungelo lekucondzisa tinyatselo tetfu. (Jeremiya 10:23) Jehova uyati kutsi yini lencono kitsi. Kuphila lokunekuthula nalokwenetisako singakutfola kuphela nangabe semukela ligunya lakhe futsi simlalela. Jehova usifundzise leliciniso lelibalulekile ngobe asitsandza.

11. Yini Babe wetfu lonelutsandvo lasetsembisa yona ngelikusasa?

¹¹ Babe lonelutsandvo ulikhatsalela mbamba likusasa lebantfwana bakhe. Ufuna kutsi babe nekuphila lokujabulisako. Kodvwa lokubuhlungu kutsi bantfu labanyenti lamuhla bakhatsateka ngelikusasa, futsi labanye bacitsa sikhatsi sabo basebentela tintfo letingeke tibachube sikhatsi lesidze. (Tihlabelelo 90:10) Sijabula kakhulu ngekutsi Babe wetfu, Jehova, akagcini nje ngekusifundzisa kutsi singaphila njani ngendlela leyenetisako nyalo kodvwa uphindze asetsembise likusasa lelihle.

12. Jehova wabasita njani boKhayini naBharuki?

¹² Ngesikhatsi Jehova abona kutsi Khayini usengotini yekwenta intfo lembi kakhulu, wetama kumsita ngekutsi ambute atsi: “Utfukutseleleni? Buso bakho bunyukumaleleni? Angitsi nawenta lokulungile utawuphakanyiswa.” (Genesisi 4:6, 7, NW.) Khayini akazange amlalele Jehova,  ngako watfola umphumela lomubi. (Genesisi 4:11-13) Ngalesinye sikhatsi, Jehova wabona kutsi Bharuki besekanesimo sengcondvo lesingakalungi lebesimenta akhatsale futsi aphelelwe ngemandla. Ngako Jehova watjela Bharuki kutsi loko labekucabanga akukalungi futsi kufanele ashintje. Bharuki wasilalela seluleko saJehova, futsi sasindzisa kuphila kwakhe.—Jeremiya 45:2-5.

13. Yini tinceku taJehova letayifundza natilingwa?

¹³ Jehova uyasicondzisa futsi asiyale ngobe uyasitsandza. Akagcini nje ngekusekhuta nakudzingekile, kodvwa uphindze asiceceshe. (Hebheru 12:6) EBhayibhelini, sifundza ngetinceku letetsembekile letaceceshwa nguJehova kute tibe bantfu labancono. Nasi sibonelo: BoJosefa, Mosi naDavide babhekana netimo lebetimatima kakhulu. Ngesikhatsi balingwa, Jehova bekanabo. Tintfo labatifundza nabavivinywa tabasita ngesikhatsi Jehova abanika imisebenti leminyenti. Njengobe sifundza eBhayibhelini ngendlela Jehova lasekela ngayo bantfu bakhe nangendlela labacecesha ngayo, siyabona kutsi usitsandza mbamba.—Fundza Taga 3:11, 12.

14. Jehova usikhombisa njani kutsi uyasitsandza nangabe sente lokubi?

¹⁴ Ngisho nobe sente tintfo letimbi, Jehova uyachubeka asikhombisa kutsi uyasitsandza. Nangabe silalela siyalo sakhe futsi siphendvuka, utasitsetselela “ngenkhululeko.” (Isaya 55:7) Kusho kutsini loku? Emavi aDavide lamayelana nentsetselelo yaJehova asikhombisa indlela Babe wetfu lanemusa ngayo. Lamavi atsi: “Ungitsetselela lonkhe licala letono tami angelaphe tonkhe tifo tami. Ungihlenga ngiphephe ekufeni, enhloko yami ungifaka umchele longumusa nesihawu. Njengobe imphumalanga yehlukene nenshonalanga utikhweshise kangako-ke tono tetfu kitsi.” (Tihlabelelo 103:3, 4, 12) Jehova uyasiyala aphindze asicondzise ngetindlela letinyenti. Uyashesha yini wena kwenta lushintjo? Hlale ukhumbula kutsi Jehova usiyala ngobe asitsandza.—Tihlabelelo 30:5.

15. Nguyiphi lenye indlela Jehova lasikhombisa ngayo kutsi uyasitsandza?

¹⁵ Babe lonelutsandvo uyawuvikela umndeni wakhe engotini. Nguloko kanye lokwentiwa nguBabe wetfu, longuJehova. Umhlabeli watsi ngaJehova: “Uyabelusa labametsembako, abephule etandleni talababi.” (Tihlabelelo 97:10) Cabanga ngaloku: Njengobe ushesha kuvikela emehlo akho ngobe aligugu kuwe, Jehova naye usheshe abavikele bantfu bakhe ngobe baligugu kuye.—Fundza Zakhariya 2:8.

16, 17. Jehova wabavikela njani bantfu bakhe endvulo nasesikhatsini salamuhla?

¹⁶ Lenye indlela Jehova lavikele ngayo bantfu bakhe, endvulo nalamuhla, kusebentisa tingilosi takhe. (Tihlabelelo 91:11) Ingilosi yakhe yabulala emasotja  langu-185 000 ase-Asiriya ngebusuku bunye futsi yasindzisa bantfu baNkulunkulu. (2 Emakhosi 19:35) Ngelikhulu lekucala, tingilosi takhulula boPhetro, Pawula kanye nalabanye ejele. (Imisebenti 5:18-20; 12:6-11) Muva nje, bekunemphi lematima kulelinye live lelise-Afrika. Lelive belinesiphitsiphitsi ngenca yekulwa, kweba, kudlwengula nekubulala. Nanobe kute bazalwane labafa, labanyenti babo balahlekelwa ngiko konkhe labebanako. Kodvwa bonkhe balubona lutsandvo lwaJehova futsi babona nekutsi uyabanakekela. Nanobe babhekana netintfo letinyenti letibuhlungu, bachubeka bajabulile. Ngesikhatsi umzalwane losuka endlunkhulu abavakashele futsi ababuta kutsi bativa njani, batsi: “Konkhe kuhamba kahle, futsi siyambonga Jehova!”

¹⁷ Kuliciniso kutsi letinye tinceku taJehova letifaka ekhatsi umfundzi Stefano nalabanye, bafa ngenca yekwetsembeka kwabo. Jehova akakuvimbeli ngaso sonkhe sikhatsi loku kutsi kwenteke. Kodvwa uyabavikela bantfu bakhe ngekubecwayisa ngetindlela letehlukene Sathane letama kubedukisa ngato. (Efesu 6:10-12) Sitfola letecwayiso eBhayibhelini nasetincwadzini letivela enhlanganweni yaJehova. Sibonelo saloko kutsi sifundziswa ngetingoti te-Internet, tekutsandza imali, tekubukela ema-movie lagcwele kutiphatsa lokubi nebudlova, tincwadzi nobe imidlalo lenjalo. Kuyacaca kutsi Jehova uyasitsandza futsi ufuna kusivikela.

18. Utiva njani ngekutsandvwa nguJehova?

¹⁸ Ngesikhatsi Mosi akhumbula yonkhe iminyaka layicitsa akhonta Jehova, waciniseka kutsi Jehova uyamtsandza. Watsi: “Senelise ngemusa wakho njalo ekuseni, kuze sijabule sitfokote onkhe emalanga etfu letako.” (Tihlabelelo 90:14) Sibusisekile ngekucondza nangekubona lutsandvo Jehova lanalo ngatsi. Kulilungelo lelikhulu kutsandvwa nguJehova! Sitiva njengemphostoli Johane lowatsi: “Asenibuke kutsi lukhulu kangakanani lutsandvo Babe lasibonise lona.”—1 Johane 3:1.