Lokunye lokungasisita kute sibeketelele loku, kudvudvutwa lesikutfola kulabo labasemindenini yetfu, bangani nalabo lesikholwa nabo.

Emavi emngani lonemusa nalonelutsandvo angafana nemafutsa lelaphako nalacabulako. (Taga 16:24; 18:24; 25:11) Kodvwa emaKhristu eliciniso awacabangi nje kuphela ngekutfola indvudvuto. Esikhundleni saloko, atsatsa sinyatselo kute ‘abe nemandla ekudvudvuta labo labasetinhluphekweni ngendvudvuto layemukela kuNkulunkulu.’ (2 Khor. 1:4; Luk. 6:31) Antonio, longumbonisi wesigodzi eMexico, wakubona matfupha loko.

Nakutfolakala kutsi uphetfwe sifo se-lymphoma, lesingumdlavuza wengati, Antonio wacindzeteleka kakhulu. Nobe kunjalo, wetama kamatima kuticinisa. Kanjani? Abetama kukhumbula tingoma teMbuso futsi atihlabela kute eve aphindze azindle ngemagama ato. Kuthantaza ngalokuvakalako nekufundza liBhayibheli, nako kwamdvudvuta kakhulu.

Nyalo Antonio uyabona kutsi lusito lolukhulu lwavela kulakholwa nabo. Utsi: “Ngesikhatsi mine nemfati wami sitiva sikhatsatekile, besicela sihlobo lesingulomdzala welibandla kutsi site sitewuthantaza natsi. Loko bekusenta sidvudvuteke kuphindze kwente simo sibe ncono. Ecinisweni, kusekelwa lesakutfola emndenini wetfu nakulesikholwa nabo kwasisita sakhona kulwisana nendlela lesasitiva ngayo ngesikhatsi nje lesincane.” Antonio kwamjabulisa kakhulu kuba nebangani labanelutsandvo nalabamcabangelako.

Lokunye lokuba lusito ngetikhatsi letimatima, ngumoya longcwele. Umphostoli Phetro watsi umoya longcwele waNkulunkulu ‘usipho.’ (Imis. 2:38) Liciniso laloko labonakala ngesikhatsi kugcotjwa labanyenti ngeliPhentekhoste la-33 C.E. Kodvwa umoya longcwele usipho sonkhe lesingasitfola. Njengobe umtfombo waso ungashi, yini lengakubangela ungaceli kuba naso ngebunyenti?—Isa. 40:28-31.

Umphostoli Pawula wabeketelela bumatima lobunyenti, ngaletinye tikhatsi abecishe abulawe. (2 Khor. 1:8-10) Nobe kunjalo, Pawula akazange etfuke kakhulu asabele kuphila kwakhe. Kwakumdvudvuta kwati kutsi Nkulunkulu uyamsekela. Wabhala: “Akabongwe Nkulunkulu uYise weNkhosi yetfu Jesu Khristu, longuYise wemusa. Yebo, akabongwe Nkulunkulu longumtfombo wayo yonkhe indvudvuto. Yena uyasidvudvuta etinhluphekweni tetfu tonkhe.” (2 Khor. 1:3, 4) Pawula akazange avumele tinkinga labebhekene nato kutsi timcindzetele. Esikhundleni saloko, tinkinga latibeketelela tamsita waba neluvela ngalabanye, kute loko kumsite akulungele kubadvudvuta nabadzinga lusito.

Nasekaluleme ekuguleni kwakhe, Antonio wabuyela emsebentini wekujikeleta. Abebatsandza labo lakholwa nabo, kodvwa yena nemfati wakhe benta imetamo lekhetsekile yekuvakashela labo labagulako kute babakhutsate. Sibonelo saloko kutsi ngemuva kwekutsi bavakashele lomunye umKhristu lobekagula matima, Antonio watfola kutsi lomzalwane abengasafuni kuya esifundvweni. Antonio uyachaza: “Akusho kutsi abengasamtsandzi Jehova nobe bazalwane bakhe, kodvwa kugula kwamenta watikhandza ayintfo lengenamsebenti.”

Intfo layenta Antonio kute akhutsate lomzalwane logulako wamcela kutsi athantaze emcimbini labebanawo. Nanobe lomzalwane atibona singamfaneli lesabelo, wasemukela. Antonio utsi: “Wathantaza kahle kakhulu futsi ngemuva kwaloko kwaba shengatsi ungulomunye umuntfu. Wativa naye asangasebentiseka futsi.”

Kuliciniso kutsi ngelizinga lelikhulu nobe lelincane, sonkhe sike sabeketelela luhlobo lolutsite lwelusizi. Kodvwa njengobe Pawula asho, loku kungasisita kute sidvudvute labanye labaselusizini. Ngako-ke, asitsintseke nangabe lamanye emaKhristu aselusizini futsi silingise Nkulunkulu wetfu Jehova ngekuba ngumtfombo wendvudvuto kulabanye.