Sikhutsato Lesiphuma ‘Emilonyeni Yebantfwana’
NgaDecember 2009, iNkantolo Lenkhulu yaseRussia yakhipha sincumo lesabangela kutsi kuvalwe inhlangano yaboFakazi BaJehova eTaganrog, eRussia, bemukwa emaHholwa eMbuso futsi kwatsiwa tincwadzi tetfu letingu-34 tetama kuphocelela kutsi kwentiwe tingucuko kutepolitiki. Umbiko waloku wafakwa ekhelini le-Internet laboFakazi BaJehova kanye netitfombe taboFakazi labatsintfwe ngulesincumo, lokufaka ekhatsi bantfwana labancane.
Bantfwana base-Australia
Etinyangeni letimbalwa letalandzela, i-Administrative Center yaboFakazi BaJehova eRussia yatfola libhokisi nencwadzi lebeyibuya emndenini waboFakazi eQueensland, e-Australia. Lomndeni bewubone lombiko wesincumo seNkantolo. Lencwadzi beyitsi: “Bazalwane labatsandzekako, kubatsintse kakhulu bantfwana betfu boCody naLarissa, kubona kukholwa nekulingwa kwebangani babo eRussia. Babhale emakhadi netincwadzi, ngako sente tipho letincane lesingatsandza kutitfumela kulabantfwana baseTaganrog, sifuna bati kutsi bakhona nalabanye bantfwana labakhashane labakhonta Jehova ngekwetsembeka futsi labacabanga ngabo. Babatsandza kakhulu.”
Ngemuva kwekutfola letipho, bantfwana baseTaganrog babhalela lomndeni wase-Australia tincwadzi tekubonga letinetitfombe. Atsintfwe ngemavi esikhutsato lesiphuma ‘emilonyeni yebantfwana,’ lomunye umzalwane lokhonta egatjeni laseRussia wabhalela Cody naLarissa: “Ungacabanga kutsi kubuhlungu kangakanani kubona bantfwana nebantfu labadzala bahlushelwa intfo labangakayenti. Bazalwane betfu labaseTaganrog abakenti lutfo lolubi, kodvwa bemukwe liHholwa labo leMbuso. Loku kubavise buhlungu kakhulu. Kutawubadvudvuta kwati kutsi kunalotsite lokulelinye live locabanga ngabo. Sibonga kakhulu ngemoya wenu lomuhle wekupha!”—Hla. 8:2.
Bantfwana baseRussia labatfola tipho letivela kubantfwana base-Australia
Kuyabonakala kutsi siyincenye yebazalwane bemhlaba wonkhe, futsi lutsandvo lesinalo emkhatsini wetfu lusisita kutsi sikhone kubeketelela luvivinyo nebumatima ekuphileni. Ngesikhatsi tinkantolo tisaphikisana ngekutsi tincwadzi taboFakazi BaJehova tikhutsata kungevani yini nobe cha, bantfwana betfu bakhombisa kunaka inhlalakahle yalabanye, ngisho nobe behlukaniswa buve nemasiko endzawo. Bakhombisa kuba liciniso kwemavi aJesu, latsi: “Nanitsandzanako, bonkhe bantfu bayawunati kutsi nibafundzi bami.”—Joh. 13:35.
