1. Ngutiphi tintfo letinhle letitawujatjulelwa “sicumbi lesikhulu”?

CABANGA ngetintfo letinhle umbuso lonemandla loholwa yinkhosi lenemusa futsi lengakhetsi longatentela bantfu bawo ngeminyaka leyinkhulungwane. Kunetintfo letinhle letitawujatjulelwa “sicumbi lesikhulu”—labo labatawube basindze “ekuhluphekeni lokukhulu,” lokutawucedza lelive lelibuswa nguSathane.—Semb. 7:9, 14.

2. Kwentekeni ekuphileni kwebantfu kuleminyaka lengu-6 000 leyendlulile?

² Kuleminyaka lengu-6 000 leyendlulile, bantfu betame kutibusa futsi loko kubaletsele buhlungu nekuhlupheka lokukhulu. Kungako liBhayibheli latsi: “Umuntfu usuke atihlisibete etikwalabanye kantsi utilimata yena.” (Shu. 8:9) Yini lesiyibonako lamuhla? Ngaphandle nje kwetimphi nekuvukela, kunetinkinga letinkhulu letifaka ekhatsi buphuya, tifo, kubulawa kwemvelo, kugucugucuka kwesimo selitulu naletinye letinyenti. Tiphatsimandla tahulumende tecwayise ngekutsi imiphumela itawuba mibi kakhulu nangabe bantfu bangalwenti lushintjo endleleni labaphatsa ngayo umhlaba.

3. KuBusa kweMinyaka Leyinkhulungwane kutasiletselani?

³ Nasekubusa iNkhosi lenguMesiya Jesu Khristu nalabo labangu-144 000, uMbuso waNkulunkulu utawulungisa umonakalo lowenteke kubantfu naseMhlabeni. Ngesikhatsi sekuBusa kweMinyaka Leyinkhulungwane, kutawugcwaliseka tetsembiso taNkulunkulu Jehova, letifaka ekhatsi lesitsi: “Ngiyawudala emazulu lamasha nemhlaba lomusha. Tintfo takadzeni tingeke tikhunjulwe, futsi tingeke tisabuya nasengcondvweni.” (Isa. 65:17) Ngutiphi tentakalo letinhle letisengakabonakali letitawenteka esikhatsini lesitako? Sisitwa liVi laNkulunkulu lelisiphrofetho,  asesitsi caphucaphu ngaletentakalo letinhle ‘letisengakabonakali.’—2 Khor. 4:18.

4. Bantfu bahlala etindlini letinjani lamuhla?

⁴ Ngubani longeke atsandze kuba nendlu yakhe, lapho yena nemndeni wakhe bangativa bavikeleke khona? Emhlabeni lesiphila kuwo lamuhla, kutfolakala kwetindlu letenele kuyinkinga lenkhulu. Bantfu baminyetelene etindzaweni tasemadolobheni. Labanyenti bahlala etindlini letingekho esimeni lesikahle. Kuba nendlu letsi wena, kuliphupho kubo.

5, 6. (a) Isaya 65:21 naMikha 4:4 utawugcwaliseka njani? (b) Singasitfola njani leso sibusiso?

⁵ Nasekubusa uMbuso waNkulunkulu emhlabeni, sifiso setfu sekuba netindlu lesititsandzako siyofezeka, ngobe kwaphrofethwa nga-Isaya kutsi: “Bantfu bayakwakha tindlu, bahlale kuto, bayawuhlanyela tivini, badle titselo tato.” (Isa. 65:21) Nobe kunjalo, akusho kutsi sibuke nje kuphela kuba netindlu letinhle. Labanye lamuhla bahlala etindlini tabo, futsi kukhona nalabahlala etindlini takanokusho. Nobe kunjalo, bahlala bakhatsateke ngekutsi angeke bakhone kutibhadala nangekutsi tigebengu tingagcekeza. Nasekubusa uMbuso waNkulunkulu bantfu angeke bakhatsateke ngako konkhe loko. Umphrofethi Mikha wabhala: “Bantfu bayawuhlala ngekuthula ngulowo nalowo esivinini sakhe nasemikhiweni yakhe, kubete lobesabisako.”—Mik. 4:4.

⁶ Sicabanga ngaletintfo letinhle lesitilindzele, yini lokufanele siyente? Kuliciniso kutsi sonkhe siyatidzinga tindlu letenele. Nobe kunjalo, esikhundleni sekutsi silwele kuyitfola nyalo leyondlu—mhlawumbe size singene sitsi shi etikweletini—kutawuba kuhlakanipha ngatsi kutsi sinake setsembiso saJehova. Khumbula loko Jesu lakusho ngaye: “Timphungutja tinemigodzi, netinyoni tinetidleke, kodvwa iNdvodzana yeMuntfu ayinandzawo yekulala iphumule.” (Luk. 9:58) Jesu abenelikhono nemandla ekwakha nobe ekuba nendlu yakanokusho lobekungeke kube melula nganobe ngubani kuba nayo. Yini leyenta kutsi angabi nayo? Kuyacaca kutsi Jesu watibalekela tintfo lebetingamphatamisa futsi timvimbele ekubekeni uMbuso kucala. Singasilandzela yini sibonelo sakhe futsi sigcine liso letfu lilula—lingakanaki umcebo nekukhatsateka?—Mat. 6:33, 34.

7. Yini Jehova layisho ngalokuphatselene nebudlelwane emkhatsini webantfu netilwane?

⁷ Ngesikhatsi Jehova adala tintfo emhlabeni, bantfu wabadala ekugcineni. Watjela iNdvodzana yakhe lelitubulo leyiNgcweti Yekwakha, injongo yakhe yekwenta loko, watsi: “Asente bantfu, babe ngumfanekiso wetfu, basifute; babuse etikwetinhlanti taselwandle, nasetikwetinyoni tasemoyeni, nasetikwetifuyo, nasetikwemhlaba wonkhe, nasetikwato tonkhe tilwane letihamba ngesisu netilwanyakatana.” (Gen. 1:26) Kungako Adamu na-Eva kanye nebantfu bonkhe baniketwa imvume yekubusa tilwane nendalo.

8. Lamuhla tilwane tatiwa ngekuba njani?

⁸ Kumelula yini ngebantfu kutsi babuse tilwane futsi babe nekuthula nato? Bantfu labanyenti banebudlelwane lobuhle netilwane tasekhaya letifaka ekhatsi tinja nemakati. Kutsiwani-ke ngetilwane tesiganga? Lomunye umbiko utsi: “Bososayensi labaphile netilwane letesabekako futsi bafundza nendlela letenta ngayo tintfo, batfole kutsi tonkhe tilwane letimunyisako tinemiva.” Kuliciniso  kutsi siyatibona tilwane titfukutsela nangabe lotsite atisukela, kodvwa singasho yini kutsi tinayo imiva yelutsandvo? Lombiko uchubeka utsi: “Natikhulisa bantfwana bato, tilwane letimunyisako tiyalukhombisa lutsandvo letinalo ngabo.”

9. Ngalokuphatselene netilwane, nguluphi lushintjo lolutawenteka?

⁹ Akukafaneli simangale nasifundza eBhayibhelini kutsi kutawuba nekuthula emkhatsini webantfu netilwane. (Fundza Isaya 11:6-9; 65:25.) Leni? Khumbula loko Jehova lakutjela Nowa nemndeni wakhe nabaphuma emkhunjini ngemuva kwaZamcolo, watsi kubo: “Luvalo nekwesatjwa kwenu akubesetilwaneni tonkhe temhlaba.” Loko wakusho kute tilwane tivikeleke. (Gen. 9:2, 3) Kodvwa Jehova angakususa loko kwesaba kute budlelwane emkhatsini webantfu netilwane bufanane nasekucaleni. (Hos. 2:18) Leso kutawuba sikhatsi lesijabulisako kulabo labatawusindza futsi baphile emhlabeni.

10. Yini lebangela kutsi bantfu bakhale lamuhla?

¹⁰ Ngesikhatsi Solomoni abona “konkhe kucindzetelana lokwentiwako lapha ngaphansi kwemtfunti welilanga,” watsi: “Ngabona tinyembeti talabacindzetelwe, bate ngisho nemdvudvuti.” (Shu. 4:1) Simo sesibi kakhulu esikhatsini setfu. Kukhona yini emkhatsini wetfu longakake wakhala ngenca yalokutsite? Kuliciniso kutsi ngasikhatsi kungaba tinyembeti tenjabulo. Kodvwa imvamisa tinyembeti tisuke tikhombisa kutsi unenhlitiyo ledzabukile.

11. Ngutiphi tindzaba lokukhulunywa ngato eBhayibhelini letikutsintsa inhlitiyo?

¹¹ Cabanga ngetindzaba letinyenti lesifundza ngato eBhayibhelini tebantfu labakhala. Ngesikhatsi Sara ashona aneminyaka lengu-127 budzala, “Abrahama wakhalela umkakhe, Sara.” (Gen. 23:1, 2) Ngesikhatsi Nawomi avalelisa bomalukatana bakhe lababili lababafelokati, “bakhala, . . . baphindze basicala phansi futsi sililo.” (Rut. 1:9, 14) Ngesikhatsi iNkhosi Hezekiya igula kakhulu icishe ishona, yathantaza kuNkulunkulu ‘yakhala kabuhlungu’ futsi loko kwamtsintsa Jehova. (2 Khos. 20:1-5) Sonkhe kuyasitsintsa loko lokwenteka ngalesikhatsi umphostoli Phetro aphika Jesu. Nakeva lichudze likhala, Phetro “wase uphumela ngephandle, wakhala kabuhlungu.”—Mat. 26:75.

12. Kubusa kweMbuso waNkulunkulu kutawubakhulula njani bantfu?

¹² Ngesizatfu setentakalo letibuhlungu letisehlelako—tingaba tincane nobe tibe tinkhulu—siyayidzinga indvudvuto nekukhululwa. Nguloko lokutawuletfwa kuBusa kweMinyaka Leyinkhulungwane: “[Nkulunkulu] uyakwesula tonkhe tinyembeti emehlweni abo, sekuyawubate kufa, nekulila, nekukhala, nebuhlungu.” (Semb. 21:4) Kujabulisa kakhulu kutsi kulila, kukhala nebuhlungu angeke kuphindze kube khona, Nkulunkulu wetsembisa kutsi utawucedza ngisho nesitsa lesikufa. Kutawenteka njani loko?

13. Kufa kubatsintse njani bantfu kusukela Adamu ona?

¹³ Kusukela ngesikhatsi Adamu ona, kufa sekubuse njengenkhosi kubantfu. Sekube sitsa lokute longalwisana naso. Kute umuntfu lonesono longakubalekela kufa futsi sekubangele buhlungu lobukhulu nelusizi. (Rom. 5:12, 14) “Ngenca yekwesaba kufa,” bantfu labatigidzi “ngesikhatsi sonkhe sekuphila kwabo baboshelwa ebugcilini.”—Heb. 2:15.

14. Utawuba yini umphumela nakususwa sitsa lesikufa?

 ¹⁴ LiBhayibheli likhuluma ngekutsi “sitsa sekugcina lesiyawucitfwa kufa.” (1 Khor. 15:26) Kunemacembu lamabili lokukhulunywa ngawo latawuzuza kuloku. “Sicumbi lesikhulu,” lesiphilako nyalo, kungenteka sisindzele eveni lelisha futsi siphile phakadze. Tigidzigidzi tebantfu labafile, titawuvuswa. Cabanga ngenjabulo letawuba khona ngalesikhatsi sicumbi lesikhulu semukela labo labavusiwe. Kufundza tindzaba lokukhulunywa ngato eBhayibhelini tebantfu labavuswa, kungasenta sicondze kahle kutsi kunjani kuvuswa.—Fundza Makho 5:38-42; Lukha 7:11-17.

15. Ungativa njani nawubona umuntfu lomtsandzako avuselwa ekuphileni?

¹⁵ Cabanga ngalamavi latsi “behlelwa kwesaba nekumangala lokukhulu” futsi “badvumisa Nkulunkulu.” Kube nawe bewulapho nakuvuswa labantfu, mhlawumbe bowutativa ngendlela lefananako. Kubona bantfu labatsandzekako labebafile bavuselwa ekuphileni, kutasenta sijabule kakhulu. Jesu watsi: “Sikhatsi siyeta lapho bonkhe bantfu labasemathuneni bayawuliva livi layo,” baphume. (Joh. 5:28, 29) Kute kitsi loke wabona kuvuswa umuntfu; kuvuswa kwabo kutawuba ngulenye yetintfo letibalulekile ‘lesisengakatiboni.’

16. (a) Yini lesenta sibe nemdlandla wekukhuluma ngetibusiso lesisengakatiboni? (b) Yini Pawula layisho kute akhutsate emaKhristu aseKhorinte?

¹⁶ Bantfu labachubeka betsembekile kuJehova kuletikhatsi letimatima, batawutfola likusasa lelihle. Nanobe letibusiso letinhle singatiboni kwanyalo, kuhlale sicabanga ngato kutasenta sinake tintfo letibalulekile futsi sikubalekele kuphatanyiswa tintfo lokungenteka tisikhange kulelive lelibuswa nguSathane. (Luk. 21:34; 1 Thim. 6:17-19)  Ekukhonteni kwemndeni, nasicoca nemakholwa lesikanye nawo, nasinalabo lesibafundzela liBhayibheli nalabanenshisekelo, asikhulume ngemdlandla ngetetsembiso letinhle letiseta. Loko kutasisita kute sigcine lelitsemba letfu licinile etingcondvweni nasetinhlitiyweni tetfu. Umphostoli Pawula wenta njalo nakakhutsata emaKhristu labekanye nawo. Emavi akhe awasita acabanga ngaloko lokutawenteka ekupheleni kweMinyaka Leyinkhulungwane yekuBusa kwaKhristu. Cabanga ngekubaluleka kwemavi aPawula laku-1 Khorinte 15:24, 25, 28.—Fundza.

17, 18. (a) Kusukela ekudalweni kwemuntfu, Jehova ube njani “nguko konkhe kuko konkhe”? (b) Yini Jesu latayenta kute kuphindze kube nebunye nekuthula?

¹⁷ Ayikho lenye indlela yekuchaza kutsi kuphila kutawuba njani ekupheleni kweminyaka leyinkhulungwane, ngaphandle kwalamavi latsi “kuze Nkulunkulu abe nguko konkhe kuko konkhe.” Asho kutsini lamavi? Cabanga ngalesikhatsi e-Edeni bantfu labete sono bo-Adamu na-Eva bayincenye yemndeni waJehova lonebunye nekuthula. Jehova, uMbusi Wendzawo Yonkhe, abebusa konkhe lakudalile lokufaka ekhatsi tingilosi nebantfu. Bebakhona kucocisana naye, kumkhonta futsi batfole tibusiso letivela kuye. “Abenguko konkhe kuko konkhe.”

¹⁸ Lobo budlelwane lobunebunye baphatamiseka ngalesikhatsi bantfu badukiswa nguSathane futsi bavukela bukhosi baJehova. Nobe kunjalo, kusukela nga-1914 uMbuso webuMesiya bowetama kutsi lobo budlelwane lobunebunye buphindze bube khona. (Ef. 1:9, 10) Ngesikhatsi sekuBusa kweMinyaka Leyinkhulungwane, tentakalo letinhle ‘letingabonakali’ nyalo, titawuba sebaleni. Ngemuva kwaloko, kutawufika “kuphela” lokutawusho kuphela kwekuBusa kwaKhristu kweMinyaka Leyinkulungwane. Yini letawubese iyenteka? Nanobe Jesu aphiwe ‘emandla onkhe ezulwini nasemhlabeni,’ akafuni kutsatsa sikhundla saJehova. Ngekutitfoba ‘unikela umbuso kuNkulunkulu uYise.’ Utawusebentisa sikhundla sakhe lesikhetsekile neligunya lanalo “kube ludvumo kuNkulunkulu.”—Mat. 28:18; Fil. 2:9-11.

19, 20. (a) Takhamuti teMbuso waNkulunkulu titawukhombisa njani kutsi tiyabemukela bukhosi baJehova? (b) Ngutiphi tintfo letinhle lesitatijabulela esikhatsini lesitako?

¹⁹ Ngaleso sikhatsi, kutawususwa sono kubo bonkhe bantfu labatawube babuswa nguloMbuso. Batawulandzela sibonelo saJesu batitfobe ngekutitsandzela ekubuseni kwaJehova. Batawuba nelitfuba lekukhombisa leso sifiso sekwenta njalo ngekutsi bendlule ngemphumelelo ekuhluphekeni lokukhulu. (Semb. 20:7-10) Ngemuva kwaloko, bonkhe labavukela Nkulunkulu—kungaba bantfu nobe tidalwa temoya—batawubhujiswa phakadze. Leso kutawuba sikhatsi lesijabulisa mbamba. Umndeni wonkhe webantfu lojabulile utawudvumisa Jehova lotawube ‘anguko konkhe kuko konkhe.’—Fundza Tihlabelelo 99:1-3.

²⁰ Tintfo letinhle letitawuletfwa nguMbuso waNkulunkulu titakwenta yini kutsi ufake emandla kute unake kakhulu kwenta intsandvo yaNkulunkulu? Ungakubalekela yini kuphatanyiswa ngematsemba langemanga nendvudvuto levela kulelive laSathane? Utawuchubeka yini utimisele kusekela nekuphakamisa bukhosi baJehova? Shengatsi indlela lowenta ngayo tintfo ingakhombisa kutsi utimisele kukhonta yena phakadze. Ngako-ke, kutawuba lilungelo lakho kujabulela kuthula nekulunga iminyaka leyinkhungwane naphakadze.