Tinyenti tintfo letishiwo bantfu ngalendzaba, kodvwa akusito tonkhe letilusito. Labanye bangahle bakutjele kutsi ungakhali nobe ungayiveti indlela lotiva ngayo. Kantsi labanye bakutjela kutsi khala uphindze uyivete indlela lotiva ngayo. LiBhayibheli lisitjela lokuncono kakhulu, futsi nelucwaningo lwamuva luyavumelana nalokushiwo liBhayibheli.

Kuletinye tindzawo kutsiwa indvodza ayikhali. Kulihlazo yini vele kukhala? Tati tekusebenta kwengcondvo titsi kukhala kuhambisana nekuva buhlungu. Kukhala kungakusita kutsi usemukele simo lokuso ngisho nome uva buhlungu kangakanani. Kufihla indlela lotiva ngayo kungenta lesimo sibe sibi kakhulu. LiBhayibheli liyawucitsa lombono wekutsi indvodza ayikhali nekutsi kukhala kulihlazo. Wenta njani Jesu nakeva buhlungu? Ngesikhatsi kufe umngani wakhe Lazaro, Jesu akazange esabe kukhala ngisho noma bekunebantfu kantsi bekanawo emandla ekumvusa.​—Johane 11:33-35.

Kuvamile kutsi umuntfu atfukutsele nakeva buhlungu, ikakhulukati nangabe umuntfu lamtsandzako afe ngekutumeka lokukhulu. Tinyenti tintfo letingatfukutselisa umuntfu lofelwe. Angatfukutsela nangabe umuntfu lohloniphekile asho lokutsite angakacabangi. Naku lokushiwo nguMike waseNingizimu Afrika: “Bengineminyaka lengu-14 ngesikhatsi babe ashona. Emngcwabeni wababe umfundisi wase-Anglican watsi Nkulunkulu udzinga bantfu labalungile, ngako usheshe abatsatse. * Loko kwangikwatisa ngoba babe besimdzinga kakhulu. Ngisho nome sekwengce iminyaka lengu-63, solo ngiseva buhlungu.”

Kutsiwani nangabe umuntfu atisola? Bantfu bavamise kutisola nangabe bafelwe tihlobo tabo kungakalindzeleki. Labanye bangahle bacabange kutsi ‘kube ngamane ngenta kanje nobe kanje lomuntfu ngabe solo uyaphila.’ Lokunye lokungenta kutsi utisole kunangabe lomuntfu loshonile wafa nicabene.

Nangabe utisola noma uhle utfukutsela, kubalulekile kutsi ungafeli ngekhatsi. Khuluma nemngani wakho lotakulalela futsi akucinisekise kutsi kuvamile kutsi bantfu labafelwe bative ngendlela lotiva ngayo. LiBhayibheli lisitjela kutsi: “Umngani unelutsandvo ngaso sonkhe sikhatsi; kantsi umnakenu utalelwe kutsi netfwalisane naye tinhlupheko.”​—Taga 17:17.

Jehova unguMngani lokahle webantfu labaselusizini. Thantaza, umtjele konkhe lokukukhatsatako ngobe yena ‘uyakukhatsalela.’ (1 Phetro 5:7) Uphindze etsembise bonkhe bantfu labenta njalo kutsi batawutfola “kuthula kwaNkulunkulu lokwendlula konkhe kucondza.” (Filiphi 4:6, 7) Vumela Jehova kutsi akudvudvute ngeliVi lakhe liBhayibheli. Tibhalele luhla lwemiBhalo lengakudvudvuta. (Fundza  libhokisi lelikulesihloko.) Mhlawumbe leminye imiBhalo ungaze wetame kuyibamba ngenhloko. Kucabanga ngemiBhalo kungakusita  ikakhulukati ebusuku nawuwedvwa futsi ungakhoni nekulala.​—Isaya 57:15.

Lenye indvodza leneminyaka lengu-40, lesitayibita ngekutsi nguJack, isandza kufelwa ngumfati wayo lobekanesifo semdlavuza. Ngalesinye sikhatsi Jack uba nesitunge lesikhulu. Kuthantaza kumsite kakhulu. Utsi: “Nangithantaza kuJehova angisiva lesitunge. Ebusuku ngiyaye ngiphelelwe butfongo. Kufundza liBhayibheli nekucabanga ngemiBhalo lengidvudvutako kanye nekuthantaza, kungenta ngitive nginekuthula lokukhulu bese sengiyakhona kulala.”

NaVanessa wafelwa ngumake wakhe lobekagula. Naye ubonile kutsi kuthantaza kuyasita. Utsi: “Nangicindzeteleke mbamba ngivele ngithantaze bese ngiyakhala. Jehova uyayilalela imithantazo yami aphindze anginikete nemandla.”

Labanye labeluleka bantfu labafelwe baye bakhutsate laba labaselusizini kutsi basite labanye bantfu emmangweni. Loku kunganciphisa kukhatsateka kuphindze kumjabulise lona loselusizini. (Imisebenti 20:35) Lamanye emaKhristu lake afelwa atfole indvudvuto ngekusita labanye.​—2 Khorinte 1:3, 4.