Lapho Sekute Inzondo Emhlabeni!
Ngisho nobe singayekela kuzonda labanye angeke sikhone kulawula tento talabanye kanye nendlela labenta ngayo. Bantfu labangenacala bayachubeka balinyatwa tento tenzondo. Ngako, ngubani longayicedza ngalokuphelele inzondo?
NguJehova Nkulunkulu kuphela longayicedza ngalokuphelele inzondo lesiyibonako lamuhla, futsi nguloko kanye liBhayibheli leletsembisa kutsi utakwenta.—Taga 20:22.
NKULUNKULU UTAWUSUSA LOKO LOKUBANGELA INZONDO
-
1. SATHANE DEVELI. NguSathane, ingiloso leyavukela lobangela lenzondo lesiyibonako lamuhla. Nkulunkulu utawubhubhisa Sathane kanye nalabo labanenzondo njengaye.—Tihlabelelo 37:38; KubaseRoma 16:20.
-
2. LIVE LASATHANE LELIGCWELE INZONDO. Nkulunkulu utawususa bonkhe bubi lapha emhlabeni lokufaka ekhatsi bosopolitiki labakhohlakele kanye nebaholi benkholo lababangela bantfu kutsi bazondane. Nkulunkulu utawuphindze asuse bosomabhizinisi labaticabangela bona, labakhohlakele nalabasitakala ngalabanye bantfu.—2 Phetro 3:13.
-
3. SONO LESIKUBANTFU. LiBhayibheli litsi bonkhe bantfu banesono, bacabanga, bente baphindze bative ngendlela lengakalungi. (KubaseRoma 5:12) Lomunye umkhuba lobangelwa sono kufukamela inzondo nekwenta tento letikhombisa inzondo kulabanye. Nkulunkulu utasisita sincobe lemikhuba kuze inzondo ingatophindze ibekhona.—Isaya 54:13.
LIBHAYIBHELI LISETSEMBISA UMHLABA LOTAWUBA BETE INZONDO
-
1. KUTAWUBA BETE KUNGALUNGI. UMbuso waNkulunkulu utawubusa emhlabeni, utawubusa usezulwini uletse kulunga lokutawuhlala kuze kube phakadze. (Danyela 2:44) Lubandlululo lutawuphela. Nkulunkulu utawususa konkhe kungalungi lokwentiwa kubantfu lamuhla.—Lukha 18:7.
-
2. WONKHE MUNTFU UTAWUBA NEKUTHULA. Kute lotawuhlupheka ngenca yebudlova nobe imphi. (Tihlabelelo 46:9) Bonkhe bantfu labatawube baphila emhlabeni batawube batsandza kuthula. Ngako, umhlaba utawuba yindzawo lephephile.—Tihlabelelo 72:7.
-
3. WONKHE MUNTFU UTAWUPHILA PHAKADZE EMHLABENI LOTE BUBI. Bonkhe labatawuphila emhlabeni batawube batsandzana mbamba. (Matewu 22:39) Kute lotawuhlushwa yimicabango nobe kukhumbula tintfo letibuhlungu. (Isaya 65:17) Ngaleso sikhatsi bantfu labete inzondo “batawujabulela kuthula lokukhulu.”—Tihlabelelo 37:11.
Uyakulangatelela yini kuphila emhlabeni lonjalo? Nalamuhla, bantfu labanyenti bafundza kulahla inzondo ngekusebentisa timiso teliBhayibheli. (Tihlabelelo 37:8) Nguloko kanye BoFakazi BaJehova emhlabeni wonkhe labakwentako. Ngisho nobe bavela etindzaweni letingafani futsi banemasiko langafani banebunye futsi bayatsandzana.—Isaya 2:2-4.
BoFakazi BaJehova bangakujabulela kukusita ufundze indlela yekubeketelela kungalungi nelubandlululo. Loko lotakufundza kutakusita kutsi kancane kancane ulahle inzondo futsi ucale kutsandza labanye. Ungafundza kuphatsa labanye ngemusa ngisho nalabo labangabongi nalabanenzondo. Ngenca yaloko, utawujabula manje uphindze ube nebuhlobo lobuhle nalabanye. Ngetulu kwako konkhe, utawufundza loko longakwenta kuze uphile nasekubusa uMbuso waNkulunkulu, lapho inzondo iyawube ingasekho.—Tihlabelelo 37:29.
Lokunye Longatsandza Kukuhlola
SICONGOSEKULINDZA
Yini Letawufezwa NguMbuso WaNkulunkulu?
Jesu bekati kutsi nguMbuso waNkulunkulu kuphela longuhulumende longalungisa tinkinga letikhona emhlabeni. Yini leseyivele yentiwe nguloMbuso kuze usisite siwetsembe?
