Nawubona umuntfu kwekucala, umbuto lovame kumbuta wona ngulotsi: “Ungubani ligama lakho?” Nakungatsiwa ubuta Nkulunkulu loyombuto, angaphendvula atsini?

“NginguJehova. Lelo libito lami!”—Isaya 42:8, NW.

Leligama libalulekile kuNkulunkulu lucobo lwakhe. Kute lowetsa Nkulunkulu leligama, kodvwa watetsa yena. Jehova wamemetela watsi: “Leli-ke libito lami phakadze naphakadze, tonkhe titukulwane tiyawungibita kanjalo.” (Eksodusi 3:15) EBhayibhelini, ligama laNkulunkulu livela kanyenti kwendlula ticu takhe njengaletitsi; Somandla, Babe, Nkhosi, nobe Nkulunkulu, futsi livela kanyenti kwendlula onkhe emabito laseBhayibhelini lokubo-Abrahama, Mosi, Davide nome Jesu. Ngetulu kwaloko, kuyintsandvo yaJehova kutsi silati ligama lakhe. LiBhayibheli litsi: “Shangatsi bangati kutsi nguwe wedvwa lolibito lakhe linguJehova, nguwe Losetikwako Konkhe, lophakeme abuse umhlaba wonkhe.”—Tihlabelelo 83:18, NW.

Leligama libalulekile nakuJesu. EMthantazweni lowatiwa kakhulu ngekutsi nguBabe Wetfu Losezulwini nobe uMthantazo weNkhosi, Jesu wafundzisa balandzeli bakhe kutsi bancuse kuNkulunkulu ngalamavi latsi: “Alingcweliswe libito lakho.” (Matewu 6:9) NaJesu wathantaza kuNKulunkulu watsi: “Babe, khatimulisa libito lakho.” (Johane 12:28) Jesu wakwenta umgomo kukhatimulisa libito laNkulunkulu ekuphileni kwakhe, futsi kungaleso sizatfu athantaza watsi: “Ngibembulele libito lakho, futsi ngiyachubeka ngibembulela.”—Johane 17:26.

Leligama libalulekile kubantfu labamatiko Nkulunkulu. Bantfu baNkulunkulu esikhatsini lesendlulile bebati kutsi kuvikeleka nekusindziswa kwabo bekuhlobene neligama laNkulunkulu, lekuligama lakhe kuphela. “Libito laJehova liyinqaba lecinile, lapho kungabalekela  khona bantfu labalungile basindze.” (Taga 18:10, NW) “Bonkhe labayakulibita Libito laJehova bayawusindziswa.” (Joweli 2:32, NW) LiBhayibheli likhombisa kutsi ligama laNkulunkulu litawenta ubonakale umehluko emkhatsini webantfu labamkhontako nalabangamkhonti. “Tonkhe tive tikhonta tihloniphe bonkulunkulu bato, kodvwa tsine siyawukhonta Jehova Nkulunkulu wetfu phakadze naphakadze.”—Mikha 4:5, NW; Imisebenti 15:14.

Leligama lembula Nkulunkulu ngendlela lekhetsekile. Tati letinyenti tifinyelela esiphetfweni sekutsi ligama lelitsi Jehova lisho kutsi “Ubangela Kutsi Kube Khona.” Jehova wasinika kucondza enchazelweni yeligama lakhe ngalesikhatsi atichaza ngalamavi lawatjela Mosi latsi: “Nginguye Lenginguye.” (Eksodusi 3:14) Ligama laNkulunkulu aligcini nje ngekusitjela indzima yakhe yekuba nguMdali lobangela kutsi tonkhe tintfo tibe khona, kodvwa liveta nekutsi yena lucobo lwakhe kanye nendalo yakhe bangaba ngunobe ngabe yini ledzingekako kute afeze injongo yakhe. Kuyavunywa kutsi ticu taNkulunkulu tichaza sigaba sakhe, ligunya lakhe, nobe emandla akhe, kodvwa ligama lakhe kuphela, lelitsi Jehova, lelimelela konkhe loko langiko naloko langabangiko.

Leligama lembula kutsi Nkulunkulu uyasitsandza. Inchazelo yeligama laNkulunkulu isho kutsi uyayitsandza indalo yakhe lefaka ekhatsi natsi. Ngetulu kwaloko, kwembula kwaNkulunkulu ligama lakhe kusho kutsi ufuna simati. Liciniso kutsi, nguye lowatsatsa sinyatselo kucala sekusitjela ligama lakhe. Kuyacaca-ke kutsi Nkulunkulu akafuni simtsatse njengatsi ungunkulunkulu longacondzakali nalokhashane, kodvwa ufuna simtsatse njengeMuntfu lesingasondzelana naye.—Tihlabelelo 73:28.

Kusebentisa ligama laNkulunkulu kusho kutsi siyamtsandza. Nasi sibonelo, ungase ucele lofisa abe ngumngani wakho kutsi akubite ngeligama lakho. Ungaphatseka njani nangabe loyo muntfu angachubeka nekungafuni kukubita ngeligama lakho? Ngekuhamba kwesikhatsi ungatibuta kutsi lomuntfu uyafuna yini kuba ngumngani wakho. Kuyafana nangaNkulunkulu. Jehova utjele bantfu ligama lakhe futsi usikhutsata kutsi silisebentise. Nasilisebentisa sisuke sikhombisa kutsi sifuna kusondzelana naye. Kuyacaca-ke, kutsi kungani abanaka ‘labo labazindla futsi bahloniphe nelibito lakhe’!—Malakhi 3:16.

Kwati libito laNkulunkulu kusinyatselo sekucala lesibalulekile sekumati, kodvwa akukafanele sigcine lapho. Kufanele simati kahle umnikati walelogama. Kufanele sifundze kutsi ungumuntfu lonjani.