CABANGA NGANAKU: Asesitsi uvakashe emsamo ubona tintfo takadzeni letiligugu letisolo tigciniwe. Letinyenti setinetimbobo, tihhwabile futsi tifafabukile. Letinye ticetukile. Nobe kunjalo, kunayinye lesolo ingakonakalindzawo, solo ingalendlela lebeyingiyo ekucaleni. Ubuta loyo lokuvakashisako kutsi: “Lena yinsha yini kunaleletinye?” Yena uphendvula utsi: “Cha, buka yindzala kunato tonkhe leletinye, futsi ayizange seyakhiwe kabusha.” Uphindze umbuta kutsi: “Beyisolo ivikelwe yini?” Yena atsi: “Cha, beyisolo ipheshulwa ngumoya lomkhulu futsi inetfwa natimvula. Futsi banyenti lebebangayifuni nalebebazama kuyicendza.” Mhlawumbe ungamangala, futsi utibute kutsi: ‘Yakhiwe ngani kantsi yona?’

Ngendlela lefanako, liBhayibheli lifanana nalentfo leligugu lengazange seyonakale. Liyincwadzi lendzala kakhulu yasendvulo​—futsi yindzala kunetincwadzi letinyenti. Kuliciniso kutsi tikhona letinye tincwadzi tasendvulo. Njengaletintfo letindzala letiligugu lebesetonakele, tincwadzi letinyenti letindzala setonakele kakhulu ngenca yekuhamba kwesikhatsi. Sibonelo saloku kutsi, kwatiswa lokusha kwemaciniso lanebufakazi lobuphelele kuyaphikisana netincwadzi letindzala tesayensi. Teluleko tato letimayena nemphilo tivame kuba yingoti kunekutsi tibe lusito. Futsi tincwadzi letinyenti takadzeni sekumane kusele incenyana yato nje, letinyenti setalahleka kantsi letinye setonakale kakhulu.

Nobe kunjalo, liBhayibheli lona lehlukile. Lacala kubhalwa eminyakeni lengu-3500 leyendlulile, kodvwa solo linjengoba belinjalo. Nanobe labanye bantfu bebangalifuni kuleminyaka lengetulu kwemakhulu—bebalishisa, bebangafuni nekutsi lihumushwe futsi belibhekwa njengentfo lengenamsebenti—kodvwa lelikushoko akuzange kuphelwe sikhatsi. Ngisho nobe kwatiswa lokusha kwazama kuliveta liphelwe sikhatsi, liBhayibheli lachubeka liveta kuhlakanipha lokumangalisako. ​—Buka libhokisi lelitsi “Liphelelwe Sikhatsi Yini Nobe Lisembili?”

Kungenteka uyatibuta, ‘Timfundziso letiseBhayibhelini tiyasebenta yini esikhatsini setfu?’ Kute uphendvulo lombuto, tibute kutsi: ‘Ngutiphi tinkinga bantfu labanato lamuhla? Ngutiphi letetfusa kakhulu?’ Kungenteka ucabanga ngetimpi, kungcola kwemhlaba, bugebengu kanye nekukhohlakala. Nyalo asewucabange ngetimfundziso letisisekelo letiseBhayibhelini. Nawusenta kanjalo, tibute, ‘Kube bantfu bebangaphila ngaletimiso letiseBhayibhelini, umhlaba bewungeke yini ube yindzawo lencono kakhulu?’

TSANDZA KUTHULA

LiBhayibheli litsi: “Bayajabula labo labatsandza kuthula, ngobe bayawubitwa ngekutsi ngemadvodzana aNkulunkulu.” (Matewu 5:9) Liphindze litsi: “Nakungenteka, yentani konkhe lokusemandleni enu kuze nibe nekuthula nabo bonkhe bantfu.”​—Roma 12:18.

UMUSA, KUTSETSELELA

LiBhayibheli litsi:“Bayajabula labo labanesihawu, ngobe batawuhawukelwa.” (Matewu 5:7) Liphindze litsi: “Chubekani nibeketelelana futsi nitsetselelana ngekukhululeka ngisho nobe umuntfu anesizatfu sekukhonona ngalomunye. Njengobe Jehova * anitsetselele ngekukhululeka, nani yentani kanjalo.”​—Kholose 3:13.

KUHLALISANA NGEKUVANA KWEBANTFU BEBUVE LOBUNGAFANI

Nkulunkulu “tive tonkhe watenta ngemuntfu munye kute tihlale emhlabeni wonkhe.” (Imisebenti 17:26) Liphindze lisitjele kutsi: “Nkulunkulu akakhetsi, kodvwa etiveni tonkhe wonkhe umuntfu lomesabako nalowenta lokulungile uyemukeleka kuye.”​—Imisebenti 10:34, 35.

KUHLONIPHA UMHLABA

UmBhalo utsi: “Nkulunkulu Simakadze wamtsatsa umuntfu wambeka ensimini yase-Edeni kutsi ayilime, ayilindze.” (Genesisi 2:15) Ngako Nkulunkulu utawubabhubhisa “labo labamosha umhlaba.”​—Sembulo 11:18.

KUTONDZA UMONA NEKUTIPHATSA LOKUBI

LiBhayibheli litsi: “Nitibalekele tonkhe tinhlobo tebukhali, ngobe ngisho nalapho umuntfu anjingile kuphila kwakhe akuveli etintfweni lanato.” (Lukha 12:15) Liphindze litsi: “Budlundlulu nayo yonkhe inhlobo yekungcola kanye nebukhali akungaphatfwa ngisho nekuphatfwa emkhatsini wenu, njengobe loku kungabafaneli labangcwele.”​—Efesu 5:3.

KWETSEMBEKA, NEKUKHUTSALA

LiBhayibheli litsi: “Sifisa kutiphatsa ngekwetsembeka kuto tonkhe tintfo.” (Hebheru 13:18) Liphindze litsi: “Lowebako akangasebi, kodvwa akasebente kamatima, ente lokuhle ngetandla takhe.”​—Efesu 4:28.

KUBALULEKA KWEKUSITA LABAHLUPHEKILE

LiBhayibheli litsi: “Nikhulume ngendlela ledvudvutako nalabacindzetelekile, nisekele lababutsakatsaka, futsi nibeketelele bonkhe bantfu.” (1 Thesalonika 5:14) Liphindze litsi: “Kunakekela tintsandzane nebafelokati elusizini lwabo.”​—Jakobe 1:27.

LiBhayibheli aligcini nje ngekukhuluma ngaletimiso lesicedza kufundza ngato. Ngetindlela letilula, lisifundzisa kutsi sititsatse njengaletibalulekile letimiso futsi sitisebentise ekuphileni kwetfu kwamalanga onkhe. Kube bantfu labanyenti bayatisebentisa letimiso lesicedza kutibala, bekungeke yini kube nemiphumela lemihle etinkingeni bantfu labanato? Vele, timiso  letiseBhayibhelini tibaluleke kakhulu futsi atiphelelwa sikhatsi! Ngako-ke, timfundziso letiseBhayibhelini tingakusita njani nyalo?

Umuntfu lohlakaniphe kunabo bonkhe wake watsi: “Kuhlakanipha kubonakala kulungile ngemisebenti yako.” (Matewu 11:19) Awuvumelani yini nalamavi? Kuhlakanipha kubonakala nasewukusebentisa. Ungahle utibute: ‘Nangabe timfundziso letiseBhayibhelini ngitisebentisa, ngeke yini loko sekubonakale ngemiphumela ekuphileni kwami? LiBhayibheli lingangisita njani etinkingeni lengibhekene nato nyalo?’ Cabanga nganasi sibonelo.

Kuphila kwaDelphine, * bekumatasatasa kodvwa kujabulisa. Nobe kunjalo, ngekushesha nje wehlelwa tehlakalo letibuhlungu ngekulandzelana. Indvodzakati yakhe lebeyiseminyakeni yekutfomba yafa. Umshado wakhe wabhidlika. Simo sakhe semnotfo saba sibi kakhulu. Nakakhumbula utsi: “Besengingasatati kutsi ngiyini​—sengite indvodzakati, ngite indvodza, ngite nelikhaya. Ngangitiva ngingasilutfo​—ngingasanamshado, ngingenamandla, ngite ngisho nelikusasa.”

Ngaphambili, Delphine bekangazange awabone agcwaliseka lamavi lawa, latsi: “Iminyaka yekuphila kwetfu ingiminyaka lengemashumi lasikhombisa, nangabe sisacinile iba ngiminyaka lengemashumi lasiphohlongo;  noko linyenti laleyo minyaka seliphetse kuhlupheka nelusizi. Kuphila kwetfu kwendlula ngekushesha, yebo, siyandiza sihambe.”​—Tihlabelelo 90:10.

Delphine watfola lusito eBhayibhelini ngesikhatsi anetinkinga. Lamsita ngendlela lemangalisako. Njengoba sitawubona kuletihloko letintsatfu letitolandzela, labanyenti batfole kutsi liBhayibheli lilusito nabasebentisa teluleko talo. Batfole kutsi liBhayibheli lifanana nalentfo leligugu yakadzeni lengazange seyonakale lesikhulume ngayo ekucaleni. LiBhayibheli alifani netincwadzi letindzala naletiphelelwe sikhatsi. Loku ngabe kwentiwa kutsi liBhayibheli lakhiwe ngendlela lehlukile yini? Ngabe kwentiwa kutsi linemcondvo waNkulunkulu yini hhayi wemuntfu?​—1 Thesalonika 2:13.

Kungenteka nawe utfole kutsi kuphila kufishane futsi kugcwele tinkinga. Nangabe ucindzetelwa tinkinga, uyitfolaphi indvudvuto kanye neteluleko letetsembekile?

Asesicoce ngetindlela letibalulekile letintsatfu liBhayibheli lelingakusita ngato ekuphileni kwakho. Lingakufundzisa kutsi

1. ungatigwema njani tinkinga nawungakhona.

2. ungaticatulula njani nakwenteka tiphakama.

3. ungatibeketelela njani ngendlela lephumelelako timo longeke ukhone kutishintja.

Letihloko letilandzelako titawucoca ngaletincenye letintsatfu.