KUFUNGA bekuvumelekile eMtsetfweni waMosi nangabe kusentjentiswa kahle. Noma kunjalo, ngesikhatsi saJesu besekuvame kakhulu futsi bantfu besebanemkhuba wekufunga kuwo onkhe emavi labawashoko. Loko bebakwentela kucinisekisa kutsi emavi labawashoko aliciniso, kodvwa Jesu wabekhuta tikhatsi letimbili ngalomkhuba. Esikhundleni sekufunga, Jesu wabafundzisa watsi: “Kuphela nje, ‘yebo’ wenu akabe nguyebo, na-‘cha’ wenu abe ngucha.”​—Mat. 5:33-37; 23:16-22.

Ngekusho kwe-Theological Dictionary of the New Testament, “lomkhuba wemaJuda wekucinisekisa emavi ngekufunga” bewubonakala ngekutsi encwadzini yemtsetfo wemaJuda lokutsiwa yi-Talmud bekubhalwe tifungo lobekufanele tentiwe kanye nalobekungakafaneli tentiwe.

Akusuye Jesu kuphela lowavala kufunga. Nasi sibonelo, mayelana nemaJuda, Flavius Josephus losati semlandvo lesingumJuda watsi: “EmaJuda abekholelwa kutsi kwenta sifungo bekukubi kakhulu kunekucamba emanga. Bekacabanga kutsi umuntfu lowenta sifungo kute labanye bamkholwe, ngumcambimanga.” Ngalokufanako, incwadzi yemaJuda lokutsiwa yi-Wisdom of Sirach, yatsi: “Umuntfu lotsandza kufunga mubi kakhulu.” Jesu wabese uyawuvala umkhuba wekufungela lite. Nangabe sikhuluma liciniso ngaso sonkhe sikhatsi, kutawuba bete sidzingo sekutsi sifunge kute bantfu bakukholelwe lesikushoko.