DON longuFakazi waJehova loseCanada wenta konkhe lokusemandleni kute akhulumise bantfu labahlala esitaladini. Nakakhuluma ngalomunye walaba labahlala esitaladini, Don utsi: “Peter bekangcole kwendlula bonkhe bantfu lebebahlala esitaladini. Bekangatsandzeki futsi anendlela yekwenta kutsi bantfu bangasondzeli kuye. Bekangatemukeli tento temusa lebebamentela tona labanye bantfu.” Nanobe kunjalo, kwaphela iminyaka lengu-14 Don solo etama kuyibonisa umusa lendvodza lebeyihlala esitaladini.

Ngalelinye lilanga Peter wabuta Don watsi: “Kungani utikhatsata ngami? Bonkhe bantfu abanendzaba nami. Kungani wena utihlupha kangaka ngami?” Don wasebentisa ngekuhlakanipha imiBhalo lemitsatfu kute etame kufinyelela inhlitiyo yaPeter. Kwekucala, wabuta Peter kutsi uyati yini kutsi Nkulunkulu unalo ligama, wase sewumcela kutsi afundze liBhayibheli kuTihlabelelo 83:18. Ngemuva kwaloko, kute Don amkhombise kutsi kungani bekanendzaba naye, wamcela kutsi afundze Roma 10:13, 14, lokhuluma ngekutsi “wonkhe umuntfu lobita libito laJehova utawusindziswa.” Don wase sewuphetsa ngekumfundzela Matewu 9:36 futsi wabese umcela kutsi naye atifundzele. Lelivesi litsi: “Watsi nakabona sicumbi sebantfu, inhlitiyo yakhe yagcwala sihawu, ngobe bebaphetfwe kabi futsi bahlakatekile njengetimvu letite umelusi.” Nakeva loku, Peter wavele waphicita tinyembeti, wase utsi: “Ngingulomunye yini waletimvu?”

Peter wacala kushintja. Wageza, wahhula kahle silevu sakhe futsi wagcoka netimphahla letikahle lebekatinikwe nguDon. Peter wachubeka nekubukeka kahle.

Peter bekanelibhuku lebekabhala kulo tintfo letenteka ekuphileni kwakhe. Tintfo lebekatibhalile ekucaleni kwalelibhuku betingajabulisi, kodvwa loko lebesakubhala kamuva besekwehlukile. Kulokunye lakubhala watsi: “Lamuhla ngifundze ngeligama laNkulunkulu. Nyalo nangithantaza sengithantaza kuJehova. Kuyangijabulisa kwati ligama lakhe. Don utsi Jehova angaba ngumngani wami futsi uhlale akulungele  kungilalela, kungakhatsaliseki kutsi kunini noma ngukuphi.”

Emavi ekugcina Peter lawabhala bekawabhekisele kubantfwana bakubo. Wabhala watsi:

“Lamuhla angitiva kahle. Ngicabanga kutsi kuguga sekungivalele ekoneni. Ngisho nobe kungatsiwa leli lilanga lami lekugcina ngiphila, ngiyati kutsi ngitawuphindze ngimbone umngani wami [Don] epharadisi. Njengoba nisafundza loku, ngitawube sengifile. Kodvwa nanibona indvodza leningakayetayeli emngcwabeni wami, niboyikhulumisa futsi nifundze nayi incwadzi lencane [ukhuluma ngencwadzi lesita nawutadisha liBhayibheli lekutsiwa “Ulwazi Oluholela Ekuphileni Okumi Phakade” letfolakala ngesiZulu lebekayitfole eminyakeni leyendlulile]. * Lencwadzi itsi ngitawuphindze ngimbone umngani wami ePharadisi. Loku ngikukholwa ngenhlitiyo yami yonkhe. Ngimi umnakenu lonitsandzako, Peter.”

Ngemuva kwemngcwabo, sisi waPeter lokungu-Ummi utsi: “Eminyakeni lemibili leyengcile, weta kimi. Bekukwekucala ngca ngemuva kweminyaka ngimbona ajabulile. Waze wamoyitela.” Ummi watsi kuDon: “Ngitayifundza lencwadzi ngobe nobe yini letsintse umnaketfu kufanele kube ibalulekile.” Ummi waphindze wavuma kucoca nalomunye Fakazi waJehova ngencwadzi leseyikhona manje letsi Lifundzisani Mbambambamba liBhayibheli?

Natsi lamuhla kufanele sibuke ngale kwaloko lesikubona ngephandle, sibatsandze labanye bantfu futsi sibabeketelele bantfu bato tonkhe tinhlobo. (1 Thim. 2:3, 4) Nangabe senta njalo, sitawukhona kutsintsa tinhlitiyo tebantfu labanjengaPeter, lekungenteka abatsandzeki kulabanye bantfu kodvwa babe banetinhlitiyo letinhle. Singaciniseka kutsi Nkulunkulu ‘lobuka inhlitiyo’ utalikhulisa liciniso etinhlitiyweni talabo labafanekelako.​—1 Sam. 16:7; Joh. 6:44.