O le faalapotopotoga o Molimau a Ieova o loo iai i le taimi nei, na amata mai i le faaiʻuga o le senituri lona 19. I lenā taimi, sa iai se vaega toʻaitiiti o tagata aʻoga o le Tusi Paia na nonofo e latalata i Pittsburgh, Pennsylvania, i le Iunaite Setete, na amata ona fai ma latou masani le suʻesuʻe pea o le Tusi Paia. Na latou faatusatusa aʻoaʻoga a lotu ma aʻoaʻoga moni a le Tusi Paia. Sa latou lomia manatu na latou aʻoaʻoina i tusi, nusipepa ma le mekasini lea ua taʻua nei o Le Olomatamata—Faasilasilaina le Malo o Ieova.

 Sa iai i lenā vaega o tagata aʻoga faamaoni o le Tusi Paia se tane e igoa iā Charles Taze Russell. E ui o Russell sa taʻimua i le galuega tau aʻoaʻoga o le Tusi Paia i lenā vaitaimi, ma o ia le uluaʻi faatonu o Le Olomatamata, ae e lē faapea ai na ia faavaeina se tapuaʻiga fou. O le sini o Russell ma isi Tagata Aʻoga o le Tusi Paia, e pei ona taʻua ai lenā vaega i na taimi, o le faaauiluma lea o aʻoaʻoga a Iesu Keriso ma mulimuli i le auala na faagaoioi ai le faapotopotoga Kerisiano i le uluaʻi senituri. Talu ai o Iesu o le Faavae o le Faa-Kerisiano, e matou te talitonu la o ia o lē na faavaeina la matou faalapotopotoga.—Kolose 1:18-20.