O LE toetū o Iesu e lē o se mea faatauvaa e leai sona tāua mo i tatou. Na faailoa mai e le aposetolo o Paulo le tāua ina ua ia tusi e faapea: “Ua toe faatūina Keriso mai i ē ua oti, o lē na muamua faatūina mai i ē ua oti. Auā ua oo mai le oti ona o le tagata, ua toe faatutūina foʻi o ē ua oti ona o le tagata. Auā e pei ona oti uma lava iā Atamu, e faapena foʻi ona toe faaolaina uma lava e ala i le Keriso.”​—1 Korinito 15:20-22.

Na toetū Iesu i a Nisani 16, 33 T.A., ma o le aso foʻi lenā e ofo atu ai e tagata uluaʻi fua o ā latou faatoʻaga iā Ieova i le malumalu i Ierusalema. O le taʻua e Paulo o Iesu o le uluaʻi fua, ua faailoa mai ai e iai isi fua po o isi tagata o le a toe faatutūina mai.

Ua faailoa mai e Paulo le aogā o le toetū o Iesu e ala i lona faapea mai: “Ua oo mai le oti ona o le tagata, ua toe faatutūina foʻi o ē ua oti ona o le tagata.” Talu ai ona ua tuufaasolo mai le agasala mai iā Atamu, o lea ua tatou feoti ai. Ae ui i lea, ua mafai ona tatou saʻoloto mai le nofo pologa i le agasala ma le oti, ona o le toetū o Iesu. Na faapea mai Paulo i le Roma 6:23: “O le totogi o le agasala o le oti lea, a o le meaalofa a le Atua o le ola e faavavau lea, e ala iā Keriso Iesu lo tatou Alii.”

Na faamatala mai e Iesu le aogā o lona maliu ma lona toetū mo i tatou e faapea: “E faapena foʻi ona tatau ona siitia i luga o le Atalii o le tagata, ina ia maua e tagata uma e talitonu iā te ia le ola e faavavau. Ona o le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.”​—Ioane 3:14-16.

Maʻeu le fiafia ma le olioli o le ola e faavavau e aunoa ma ni mafatiaga! (Faaaliga 21:3, 4) Na faapea mai se tagata atamai: “O tuugamau, e faamanatu mai ai iā i tatou le puupuu o le olaga, a o le mafaufau i le toetū, e faamautinoa mai ai o le a lē toe iai se oti.” Ioe, o le toetū o Iesu e iʻu ai i le ola e faavavau!