E Laveaʻiina Oe e le Maliu o Iesu

PE Ā ma le 2,000 tausaga ua tuanaʻi, i le Paseka a Iutaia i le 33 T.A., na maliu ai se tagata e lē sala ina ia laveaʻiina ai isi. O ai lenā tagata? O Iesu le Nasareta. Ae o ai e aogā i ai le mea na faia e Iesu? O tagata uma lava. Manaia le faaupuga a le Tusi Paia e faatatau i lenei taulaga togiola, e faapea: “Ona o le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.”—Ioane 3:16.

O se mau ua masani ai le toʻatele o tagata, ae e toʻaitiiti i latou o loo malamalama i le ʻauga o le mau. Latou te taumānatu: ‘⁠Pe aiseā ua tatou manaʻomia ai fua le taulaga a Keriso? E mafai faapefea i le maliu o se tagata e toʻatasi ona laveaʻiina ai tagata uma mai le oti?’ O loo manino le tali mai le Tusi Paia, ma e faamalieina ai foʻi.

Le Auala ua Pule ai le Oti i Tagata

E manatu nisi e faapea na faia le tagata ia ola mo sina taimi i le lalolagi, ia oo i ai ni puapuaga, maua foʻi le fiafia, ona oti loa lea ma alu i se isi nofoaga e sili atu. O lona uiga, o le finagalo o le Atua, ia oti le tagata. Peitaʻi ane, o loo faaalia mai i le Tusi Paia, e iai se isi māfuaaga ua ala ai ona oti le tagata. O loo faapea mai: “E pei ona oo mai o le agasala i le lalolagi ona o le tagata e toʻatasi, o le oti foʻi ona o le agasala, ona oo mai ai lea o le oti i tagata uma auā ua agasala uma lava.” (Roma 5:12) Ua iloa mai lenei mau, ua oti le tagata ona o le agasala. Ae o ai le “tagata e toʻatasi” lea na māfua ai ona oo mai le agasala ma le oti i tagata uma?

Ua taʻua i se tasi lomifefiloi, ua talitonu le toʻatele o saienitisi, e tasi lava le tupuaga o tagata uma, ma e tusa ai ma le Tusi Paia, e mai le “tagata e toʻatasi” i latou uma. Ua faapea mai le Kenese 1:27: “Ona faia lea e le Atua o le tagata i lona faatusa, ua ia faia o ia i le faatusa o le Atua; ua ia faia i laʻua o le tane ma le fafine.” Ua faaalia mai i le Tusi Paia o le uluaʻi ulugalii, o le palealii lea o mea na faia e le Atua e ou le Malosi uma lava.

O loo iai foʻi nisi faamatalaga i le Kenese e faatatau i le tagata, ina ua uma ona faia e Ieova le uluaʻi tagata. Ae o le mea mataʻina e uiga i lenā faamatalaga atoa i le Kenese, faatoʻā  taʻua lava e le Atua le oti, o se mea e tupu pe a lē usitai. (Kenese 2:16, 17) O lona finagalo, ia ola fiafia ma soifua lelei tagata i se lalolagi matagofie e faavavau. E mamao iā te ia le manatu ia iʻu leaga le tagata, ia ola matua ma oo ina oti. O lea la, na faapefea ona oo mai le oti i tagata uma?

I le mataupu e 3 o le Kenese, o loo taʻua ai le filifili ma le loto i ai o uluaʻi tagata ia lē mulimuli iā Ieova le Atua, o Lē na foaʻia le ola iā i laʻua. O lea, na faataunuu ai e le Atua le faasalaga lea na ia fetalai ai i le amataga. Na ia fetalai atu i le tamāloa: “Auā o le efuefu oe, e te toe foʻi atu lava i le efuefu.” (Kenese 3:19) Na moni le afioga a le Atua, auā na oo ina oti nei tagata lē usiusitai.

Peitaʻi ane, e lē na o i laʻua ua aafia i le la mea leaga na fai. Na lē maua ai foʻi e a la fanau le avanoa o le ola lelei atoatoa. Na faaaofia ai e Ieova i lana fuafuaga tagata e leʻi fananau mai, ina ua ia fetalai atu iā Atamu ma Eva e faapea: “Ia fanafanau ia, ma ia uluola, ma ia tumu ai le lalolagi, ia faatoʻilalo i ai, ma ia pule i iʻa i le sami, ma manu felelei, atoa ma mea ola uma e fetolofi i le eleele.” (Kenese 1:28) O lona uiga, e sau se taimi o le a tumu ai le lalolagi i tagata, o ē e ola fiafia e aunoa ma le oti. Ae o lea ua faatauina i latou e lo latou tamā o Atamu, le “tagata e toʻatasi,” e fai ma pologa i le agasala, ma ua feoti ai i latou uma. Na tusi le aposetolo o Paulo, o sē tupuga mai le uluaʻi tagata, e faapea: “A o aʻu o le tagata faaletino, ua faatauina atu i le agasala.”—Roma 7:14.

E pei lava ona sa faaleagaina e tagata ni ata matagofie e seāseā ona maua, ua faapena foʻi le mea na faia e Atamu ina ua agasala, ona ua ia faaleagaina ai le tagata, le foafoaga e sili ona matagofie a le Atua. Na faia ni fanau, a fanau a Atamu, ma faapena ona faasolo mai ai. Ua tutupu aʻe fanau, fai a latou fanau, ma oo ina feoti. O lea la, o le ā le pogai o le feoti o tagata uma? Ona o i latou uma o fanau a Atamu. Ua faapea mai le Tusi Paia: “Ua oti le toʻatele i le agasala a le tagata e toʻatasi.” (Roma 5:15) Ua iai maʻi, le ola matua, le māfuli atu i le leaga, faapea ma le oti, talu ai le lē faamaoni o Atamu i lona aiga, ma o i tatou uma lava o loo aofia ai i le aiga o Atamu.

I le tusi a le aposetolo o Paulo i Kerisiano i Roma, na ia taʻua ai le tulaga pagātia o le tagata lē lelei atoatoa, e aofia ai ma ia, faapea le tauiviga faigatā ona o āuga o le agasala. Na ia faapea mai: “Auē o aʻu le tagata malaia! O ai  na te laveaʻiina aʻu mai le tino e iʻu ai i loʻu oti?” Ua talafeagai lea fesili, auā o ai e mafai ona laveaʻiina Paulo, ma isi tagata uma mai le pologa ona o le agasala ma le oti? Na toe tali Paulo e faapea: “Ia faafetaia le Atua ona o lo tatou Alii o Iesu Keriso!” (Roma 7:14-25) Ioe, ua iai le fuafuaga a Lē na faia i tatou, ia laveaʻiina i tatou e ala i lona Alo, o Iesu Keriso.

Le Vaega a Iesu i le Laveaʻiina o Tagata e le Atua

Na faamatala mai e Iesu lana matafaioi i le laveaʻiina o tagata mai le pologa i le agasala ma le oti e ala i lona faapea mai: ‘⁠Na sau le Atalii o le tagata ina ia foaʻi atu lona ola e fai ma togiola e sui aʻi tagata e toʻatele.’ (Mataio 20:28) Ua faapefea ona avea le ola o Iesu ma togiola? Ua faapefea ona aogā lona maliu iā i tatou?

Ua faapea mai le Tusi Paia e uiga iā Iesu, ua “leai se agasala ua iā te ia,” ma ua “vavae ese mai i ē agasala.” Na atoatoa ona usitai Iesu i le Tulafono a le Atua i lona soifuaga atoa. (Eperu 4:15; 7:26) O lea la, e leʻi maliu Iesu ona o sana agasala po o sona lē usiusitai, e pei o Atamu. (Esekielu 18:4) Na finagalo malie Iesu e maliu e ui e leai sana agasala, ina ia faataunuu ai le finagalo o lona Tamā, o le laveaʻiina lea o tagata mai le agasala ma le oti. E pei ona taʻua i luga, na malie Iesu e afio mai e “foaʻi atu lona ola e fai ma togiola.” E lē mafaatusalia lona alofa mo tagata, ma na ia finagalo ai ina ia ‘oti o ia ona o tagata uma.’—Eperu 2:9.

Na tutusa lelei le ola lea na foaʻi e Iesu e fai ai le taulaga, ma le ola lea na leiloa ona o le agasala a Atamu. O le ā le aogā o le maliu o Iesu? Na talia e Ieova lana taulaga e avea ma “togiola e fetaui lelei mo tagata uma.” (1 Timoteo 2:6) E tusa ua faaaogā e le Atua le tau o le ola o Iesu e toe faatau, pe laveaʻi ai tagata mai le pologa i le agasala ma le oti.

O loo faamatala mai pea lava pea i le Tusi Paia le galuega alofa a Lē na faia le tagata. Na faamanatu e Paulo i Kerisiano e faapea, e “taugatā le tau na faatauina ai outou.” (1 Korinito 6:20; 7:23) Ae na tusi Peteru e faapea, e lē o auro po o ario na laveaʻiina ai e le Atua Kerisiano mai le oti, ae o le toto o lona Alo. (1 Peteru 1:18, 19) Ua fuafuaina e Ieova ia laveaʻiina tagata mai le oti e faavavau, e ala i le taulaga togiola a Keriso.

Po o le a E Maua Aogā o le Togiola a Keriso?

Na tusi le aposetolo o Ioane e tusa ai o le lautele o aogā o le togiola a Keriso e faapea: “O [Iesu Keriso] o le taulaga o le leleiga ma le Atua mo a tatou agasala, e lē na o a tatou agasala, a o le lalolagi atoa foʻi.” (1 Ioane 2:2) Ioe, o le togiola a Keriso, e mo tagata uma. Po o lona uiga la, e otometi ona maua e tagata uma aogā mai lenei togiola tāua? E leai. Seʻi toe mafaufau foʻi i tamāloloa ia na laveaʻiina  mai le maina. E moni na tuu ifo i lalo e le ʻau faasaoola le pusa e avaʻe ai i latou i luga, ae sa tatau iā i latou taʻitoʻatasi ona feosofi i totonu o le pusa. E faapena foʻi pe afai e fia maua e se tasi aogā o le taulaga togiola a Keriso, e lē lava le faatalitali mo le faamanuiaga a le Atua. E ao lava ona fai se taumafaiga.

O le ā le taumafaiga e manaʻomia e le Atua mai iā i tatou? Ua faapea mai le Ioane 3:36: “O lē e faatuatua i le Alo e maua e ia le ola e faavavau. A o le tagata e lē usiusitai i le Alo, e lē maua e ia le ola, ae tumau pea le toʻasā o le Atua iā te ia.” E finagalo le Atua ia tatou faatuatua i le taulaga a Keriso. Ae e iai foʻi ma se isi mea. “O le mea lenei e iloa ai ua tatou iloa o ia, pe afai e faaauau pea ona tatou tausi i ana [Iesu] poloaʻiga.” (1 Ioane 2:3) Ua manino mai la, o le auala sili e laveaʻiina ai mai le agasala ma le oti, o lo tatou faatuatua lea i le togiola a Keriso ma usiusitai i ana poloaʻiga.

O se tasi auala tāua e faaalia ai le faatuatua i le togiola a Iesu, ma iloa ai e tatou te talisapaia, o le faamanatuina lea o lona maliu, e pei ona ia poloaʻia. A o leʻi maliu Iesu, sa ia faatulaga se talisuaga tāua ma ona soo faamaoni, ma na ia fetalai atu iā i latou: “Ia faia pea lenei mea e fai ma faamanatuga iā te aʻu.” (Luka 22:19) Ua usitai Molimau a Ieova i lenā poloaʻiga ona e latou te faapelepele i le latou faauōga ma le Alo o le Atua. O lea la, i le tausaga nei, o le a faamanatuina ai le maliu o Iesu Keriso i le aso Toonaʻi, Mati 22, pe a mavae le goto o le la. E matou te fiafia e valaaulia oe i lea sauniga faapitoa, ona o le usitai i le poloaʻiga a Iesu. Fai i se Molimau a Ieova o i lou vaipanoa, e taʻu atu le taimi ma le nofoaga e fai ai lenā sauniga. O le a e iloa atili ai mai le Faamanatuga, mea e ao ona e fai ina ia tuusaunoa ai oe mai āuga leaga o le agasala a Atamu, e ala i le togiola a Keriso.

E toʻaitiiti tagata i aso nei o loo talisapaia atoatoa le tāua o le taulaga sili a Lē na faia le tagata, faapea ma lona Alo, ina ia laveaʻiina ai i latou mai le faaumatiaina. Ae o i latou o loo faatuatua i lea taulaga, ua latou maua ai se fiafiaga faapitoa. Na tusi le aposetolo o Peteru i ona uso Kerisiano e faapea: “Ua outou faatuatua iā te ia, ma ua matuā fiafia i le olioli tele e lē mafaamatalaina, a o outou maua le taui o lo outou faatuatua, o le laveaʻiina lea o o outou ola.” (1 Peteru 1:8, 9) E mafai ona e maua le olioli i le taimi nei ma faamoemoe i le laveaʻiina mai le agasala ma le oti, e ala i le atiaʻe o lou alofa iā Iesu Keriso ma lou faatuatua i lana taulaga togiola.

[Ata i le itulau 6]

Na ofo atu e Iesu lona soifua ina ia toe faaleleia ai āuga o le agasala a Atamu

[Ata i le itulau 7]

O le a faia le Faamanatuga o le maliu o Iesu Keriso i le aso Toonaʻi, Mati 22, 2008, pe a mavae le goto o le lā