E tāua tele lenei fesili aemaise mo ē ua maliliu a latou paaga pele. Atonu e matuā naunau i latou nei e toe faatasi ma a latou paaga ua toe faatutūina mai i le lalolagi fou, o se ulugalii faaipoipo. Na taʻua e se tane ua maliu lana avā: “E ma te leʻi mananaʻo ma laʻu avā e faamuta le ma faaipoipoga. O lo ma faanaunauga, ia tumau e faavavau ona ma autasi i le tapuaʻiga o se ulugalii. E lē o suia lava nei faanaunauga iā te aʻu.” Pe e iai se faavae e faamoemoe ai o le a mafai ona toe faaipoipo i latou e toetutū mai? O le mea moni e tatou te lē o mautinoa.

Na taʻua i a tatou lomiga mo le tele o tausaga e faapea, o fetalaiga a Iesu e faatatau i le toetū ma le toe faaipoipo, e foliga mai e faasino atu i le toetū i le lalolagi. E foliga mai foʻi o ē o le a toetutū mai i le lalolagi fou e lē mafai ona toe faaipoipo. * (Mata. 22:29, 30; Mare. 12:24, 25; Luka 20:34-36) E ui e tatou te lē mautinoa atoatoa, ae pe na faasino atu fetalaiga a Iesu i le toetū i le lagi? Seʻi o tatou iloilo fetalaiga a Iesu.

Seʻi iloilo le Luka 20:27-33. (Faitau) Sa taumafai le ʻau Satukaio o ē e lē talitonu i le toetū, e maileia Iesu i se fesili e faatatau i le toetū ma le faaipoipo o se tane, i le avā a lona uso ua maliu. * Na tali Iesu: “Ua faaipoipo fanau a tagata o lenei lalolagi, a o i latou ua taʻuaogāina e maua le olaga i le lumanaʻi ma le toetū mai i le oti, e lē faaipoipo i latou. O le mea lea, e lē toe oti ai i latou, auā e pei i latou o agelu, ma e avea ma fanau a le Atua, ona e toetutū mai i latou.”​—Luka 20:34-36.

Aiseā na taʻua ai i a tatou lomiga e faapea, atonu na fetalai Iesu e faatatau i le toetū i le lalolagi? O lenā manatu, e faavae i ni māfuaaga autū se lua. Muamua, atonu na mafaufau le ʻau Satukaio i le toetū i le lalolagi, ma manatu o le a tali e Iesu la latou fesili e tusa ai ma o latou manatu. Lona lua, na faaiʻu le tali a Iesu i lona faasino atu i augātamā faamaoni o Aperaamo, Isaako ma Iakopo, ia o le a toetutū mai i le lalolagi.​—Luka 20:37, 38.

Peitaʻi, e foliga mai sa mafaufau Iesu i le toetū i le lagi. O le ā le faavae ua tatou manatu ai faapea? Seʻi iloilo ni fuaiupu autū se lua.

ʻO i latou ua taʻuaogāina e maua le toetū mai i le oti.’ O le ʻaufaauuina faamaoni, ua ʻtaʻuaogāina i latou i le malo o le Atua.’ (2 Tesa. 1:5, 11) E faavae i le taulaga togiola, ua taʻuamiotonuina ai i latou ina ia maua le ola, ma e lē maliliu e pei o ni tagata agasala ua faasalaina. (Roma 5:1, 18; 8:1) Ua taʻua i latou o ē e “fiafia ma paia,” ma ua tatau i ai le toetū i le lagi. (Faaa. 20:5, 6) I se faaeseesega, o i latou e toetutū i le lalolagi, o le a aofia ai ma “tagata amiolētonu.” (Galu. 24:15) Pe e talafeagai la ona faapea atu ua “taʻuaogāina” i latou mo le toetū?

ʻE lē mafai ona toe oti i latou.’ E leʻi fetalai Iesu e faapea: “O le a lē toe oti i latou.”  Nai lo o lea, sa fetalai o ia, ʻE lē mafai ona toe oti i latou.’ Ua faaupu i isi faaliliuga lea fuaitau e faapea, “e lē toe aafia i latou i le oti “ ma “e lē toe iai se pule a le oti iā i latou.” O sui faauuina ua faaiʻuina ma le faamaoni o latou soifuaga i le lalolagi, ua toetutū i le lagi ma maua se tino e lē mafai ona oti, po o se tino e lē pala. (1 Kori. 15:53, 54) O ē uma e toetutū i le lagi, e lē toe iai se pule a le oti iā i latou. *

E tusa ai ma manatu na faatoʻā taʻua, o le ā sa tatou faaiʻuga? E talafeagai ona faapea atu, o fetalaiga a Iesu e uiga i le faaipoipo ma le toetū, e faatatau atu i le toetū i le lagi. Pe afai o lea, ua mafai ona tatou iloa mai i ana fetalaiga nisi o mea e faatatau i ē e toetutū i le lagi: (1) E lē faaipoipo i latou, (2) e lē mafai ona oti, ma (3) e talitutusa i latou ma agelu po o foafoaga agaga, o ē e nonofo i le nofoaga o agaga. O na manatu ua tulaʻi mai ai ni fesili.

Muamua, ina ua tali atu Iesu i le ʻau Satukaio o ē atonu na mafaufau i le toetū i le lalolagi, aiseā na ia taʻua ai le toetū i le lagi? E lē o taimi uma na tali atu ai Iesu i ē na tetee iā te ia, e tusa ma mea na latou mafaufau i ai. O se faaaʻoaʻoga, ina ua mananaʻo tagata Iutaia e faia e Iesu se faailoga, na tali atu o ia: “Ia talepe i lalo lenei malumalu, ona ou toe faatūina lea i aso e tolu.” Atonu sa silafia e Iesu, sa mafaufau i latou i le malumalu faaletino, “peitaʻi, na fetalai o ia e faatatau i le malumalu o lona tino.” (Ioa. 2:18-21) Atonu na manatu Iesu, e lē manaʻomia ona tali atu fua i le ʻau Satukaio lē faamaoni, o ē e leʻi talitonu i le toetū po o agelu. (Faata. 23:9; Mata. 7:6; Galu. 23:8) Nai lo o lea, na finagalo o ia e faailoa atu upu moni e faatatau i le toetū i le lagi, ina ia maua ai e ono soo faamaoni aogā, auā o i latou ia o le a maua le faamoemoe i le lagi.

Lona lua, aiseā na faaiʻu ai le talanoaga a Iesu i le faasino atu iā Aperaamo, Isaako, ma Iakopo, o ē o le a toetutū i le lalolagi? (Faitau le Mataio 22:31, 32.) Ia mātau, na amata fetalaiga a Iesu e uiga i augātamā i upu e faapea, “e faatatau i le toetutū mai o ē ua oti.” O lenā faaupuga, atonu na maua ai le avanoa e suia ai le manatu mai i le toetū i le lagi, i le toetū i le lalolagi. Ona sii mai lea e Iesu faaupuga o loo i tusitusiga a Mose, lea e talitonu i ai le ʻau Satukaio. I na tusitusiga, o loo taʻua ai fetalaiga a Ieova iā Mose i le mea sa iai le laau na mumū, ina ia saga faamaonia atu ai o le faamoemoe o le toetū i le lalolagi, o le finagalo moni lenā o le Atua.​—Eso. 3:1-6.

Lona tolu, pe afai o fetalaiga a Iesu e uiga i le toetū ma le faaipoipo e faatatau atu i le toetū i le lagi, po o lona uiga la o i latou uma e toetutū i le lalolagi, o le a mafai ona faaipoipo? E lē o taʻua mai i le Afioga a le Atua se tali tuusaʻo i lenā fesili. E tusa pe sa fetalai Iesu e faatatau i le toetū i le lagi, ae e lē faapea ai ua manino mai po o le a faaipoipo ē e toetutū mai i le lalolagi fou.

I le taimi e tasi, ua tatou iloa o loo taʻua manino i le Tusi Paia, o le oti e saʻoloto ai se tasi mai i le fusi o le faaipoipoga. O lea, pe afai e filifili se tane po o se fafine ua maliu lana paaga e toe faaipoipo, e lē tatau ona ia lagona le nofosala. O le filifiliga lenā a le tagata lava ia, ma e lē tatau i se tasi ona faitioina o ia, pe afai ua ia manaʻomia se mafutaga māfana ma se paaga faaipoipo.—Roma 7:2, 3; 1 Kori. 7:39.

E mautinoa atonu e tele ni a tatou fesili e faatatau i le olaga i le lalolagi fou. Nai lo o le taumatemate i tali o na fesili, e tatau ona tatou faatalitali ma onosaʻi. Peitaʻi, ua tatou mautinoa i le mea lenei: O le a fiafia tagata e usiusitaʻi, auā o le a faamalie e Ieova o latou manaʻoga ma faanaunauga uma i se auala e sili ona lelei.​—Sala. 145:16.