Skip to content

Skip to table of contents

 MEA ILOGA O LO TATOU TALAFAASOLOPITO

Maua e le Toʻatele Upu Moni o le Tusi Paia Ona o le “Eureka Drama”

Maua e le Toʻatele Upu Moni o le Tusi Paia Ona o le “Eureka Drama”

O LE upu “Eureka,” o lona uiga “Ua ou maua!” A o faagasolo le eliina o le auro i Kalifonia i Amerika i le senituri lona 19, na lagona atu ai lenā alaga pe a maua le auro e se tagata ʻeli auro. Peitaʻi, na maua e Charles Taze Russell ma ana aumea o Tagata Aʻoga o le Tusi Paia, se mea e sili atu ona tāua, o upu moni o le Tusi Paia. Sa naunautaʻi i latou e faasoa atu na upu moni i isi.

E oo ane i le taumāfanafana o le 1914, e faitau miliona na lolofi ane mai i aai tetele, e matamata i le “Photo-Drama of Creation.” O lenei ata e valu itula le umi, na saunia e le International Bible Students Association (I.B.S.A.). Sa faaaogā ata gaoioi, ata felanulanuaʻi lē gaoioi, faamatalaga faaoso naunau ma musika mananaia, e faamatala ai le tala faale-Tusi Paia mai i le taimi o le foafoaga, seʻia oo i le iʻuga o le Pulega o le Afe Tausaga a Iesu Keriso.​—Faaa. 20:4. *

Ae faapefea tagata na nonofo i tamaʻi aai ma nuu maotua? Ina ia aua neʻi misia i latou o loo galala faaleagaga, na tatala ai e le I.B.S.A. iā Aokuso 1914, le “Eureka Drama” lea e faigofie ona feaveaʻi. O lenei ata o se vaega o le “Photo-Drama,” ae lē aofia ai ata gaoioi. E tolu vaega eseese sa mafai ona filifili mai ai, ma na maua uma i le tele o gagana. (1) O le “Eureka X,” sa tuufaatasia uma ai faamatalaga ma musika. (2) O le “Eureka Y,” sa iai leo uma na puʻeina ma ata felanulanuaʻi e lē gaoioi. (3) O le “Eureka Family Drama,” sa iai nisi o faamatalaga ma pese faaletapuaʻiga, ma sa fuafuaina e matamata i ai i le fale. Sa mafai foʻi ona maua fonokalafi e tā ai pese ma mea e faaali ai ata e lē taugatā tele.

O se masini sa faaali ai ata felanulanuaʻi e lē gaoioi

E aunoa ma le faaaogāina o se masini vili ata po o se ʻie telē e faaali ai, sa mafai e Tagata Aʻoga o le Tusi Paia ona feaveaʻi lenei ata e faaali fua i nuu maotua. O lenā faiga sa mafai ai ona oo atu le feʻau o le Malo i oganuu fou. O le “Eureka X” lea e na o le leo ae e leai se ata, sa mafai ona tā i le ao po o le pō. O le “Eureka Y,” sa faaaogā se tamaʻi masini e faaali ai ata lē gaoioi. O lenei masini e lē ola i le eletise, ae e faalagolago i se mōlī o loo iai i totonu. Na taʻua i se lipoti i le Watch Tower i le gagana Finilani: “Na toetoe o so o se nofoaga na mafai ona faaali ai nei ata.” Maʻeu le moni o lenā manatu!

Nai lo o le totogi o ni fale tifaga tetelē, sa masani ona maua e Tagata Aʻoga sogasogā ia fale e leai ni totogi. O se faataʻitaʻiga, o potu aʻoga, fale faamasino, fale e faatali ai nofoaafi, faapea potu tetelē o fale o aiga. O le tele o taimi, sa faaali le ata i se ʻie sa faatautau i fafo i autafa o se fale na teu ai fua o faatoʻaga.  Na tusi Anthony Hambuch: “Na faatulaga e le ʻaufaifaatoʻaga le tele o ogālaau e saofafaʻi ai tagata i fafo, ma matamata ma le fiafia i le polokalame.” Sa faaaogā e uso na feaveaʻia le ata o le “Eureka,” se taavale solofanua na taʻua o le “Drama wagon.” Sa feaveaʻi ai a latou masini mo le ata, atopaʻu, faleʻie, ma mea na gasese ai meaʻai.

O isi taimi e toʻalaiti a o isi taimi e faitau selau ē na matamata i le “Eureka.” I le Iunaite Setete, e toʻa 400 sa auai i se faleaʻoga na faaali ai le ata i se aai e na o le 150 ē e nonofo ai. I isi vaipanoa, e lima maila (8 km) le mamao na savavali ai nisi i le mea e matamata ai le ata. I Suetena, sa “matuā pāʻia loto” o tuaoi a Charlotte Ahlberg, ia sa faapotopoto i lona tamaʻi fale, ina ua latou faalogologo i le polokalame. E pe ā ma le 1,500 tagata na matamata i le ata na faaali i se taulaga maotua e ʻeli ai le minerale i Ausetalia. Ina ua faaali le ata i aʻoga maualuluga ma kolisi, na lipotia mai i le Watch Tower, “na tosina polofesa ma tamaiti aʻoga i le mananaia o ata ma le auala na puʻe ai leo.” Sa taʻutaʻua foʻi le “Eureka Drama” i nofoaga sa iai fale tifaga.

ATIINA AʻE FATU O LE UPU MONI

Na avea le “Eureka Drama” ma meafaigaluega aogā i vaega na taʻua o “Class Extension Work,” lea sa auina atu ai ni failauga e amata nisi vasega fou mo suʻesuʻega faale-Tusi Paia. Sa faigatā ona iloa le aofaʻi o ē na matamata i le ata. E tele vaega eseese o le “Drama” sa faaali i le tele o taimi. Peitaʻi, i le 1915, mai i le 86 o vaega o uso na faaalia le “Drama,” e na o le 14 vaega sa lipotia mai pea le tulaga o la latou galuega. E ui e leʻi maʻoti mai le aofaʻi atoa o le ʻaumatamata, ae na faaalia i lipoti o le tausaga faaiʻu, e silia i le tasi miliona le aofaʻi o ē na matamata ai. E tusa ma le 30,000 i latou na talosaga mai mo ni lomiga faale-Tusi Paia.

Atonu e leʻi avea le “Eureka Drama” ma vala mataʻina i le talafaasolopito. Peitaʻi, e faitau miliona i latou na matamata i lenei ata matagofie, e amata mai i Ausetalia i Anitenitina, mai i Aferika i Saute i motu o Peretania, Initia ma le Karipiane. Na maua e le toʻatele o i latou upu moni o le Tusi Paia, o se mea e sili atu nai lo o le auro, ma na mafai ona latou alalaga mai e faapea, “Eureka!”

^ pala. 4 Tagaʻi i “Mea Iloga o lo Tatou Talafaasolopito—100 Tausaga o se Ata na Atiaʻe ai le Faatuatua,” i Le Olomatamata o Fepuari 15, 2014, itulau e 30-32.