Skip to content

Skip to table of contents

 MEA ILOGA O LO TATOU TALAFAASOLOPITO

“Sa Pei Aʻu o se Laumei i Totonu o Le Atigi, Ona na Ou Alu ma Feaveaʻi Loʻu Fale”

“Sa Pei Aʻu o se Laumei i Totonu o Le Atigi, Ona na Ou Alu ma Feaveaʻi Loʻu Fale”

NA AUAI le silia i le 10,000 tagata talaʻi i le Iunaite Setete, i se tauiviga e iva aso na faia ai mai iā Aokuso iā Setema i le 1929. E pe ā ma le afe paeonia na aofia ai iā i latou na tufatufaina atu le 250,000 tusi ma tamaʻitusi. Maʻeu se faatelega mo le faitau aofaʻi o paeonia! Na faailoa mai i le Bulletin * e “maofa” ona o le faatupulaʻia o paeonia mai i le 1927 i le 1929.

I le faaiʻuga o le 1929, na tulaʻi mai ai se tulaga faigatā tau tamaoaiga. Iā Oketopa 29, 1929, na paʻū maulalo ai le tamaoaiga o le Iunaite Setete ma na aafia ai le lalolagi atoa. E faitau afe faletupe na gau, tapunia le tele o faatoʻaga ma lafumanu faapea foʻi fale gaosi oloa tetele. E faitau miliona na vāea mai i galuega. I le 1933 i le Iunaite Setete, e oo atu i le 1,000 tagata i le aso, e fāoa e faletupe a latou fale ona ua lē mafai ona totogia a latou aitalafu.

Na faapefea ona feagai tagata talaʻi ma lenā tulaga faigatā tau tamaoaiga? Sa latou fausia kalaveni taugofie, ma na fesoasoani lenā i le tele o paeonia e faaauau ai i le faiva, auā ua tuuitiitia ai tupe faaalu. Na lē manaʻomia ona totogia ni lafoga, pe totogi foʻi le faaaogāina o kalaveni. * Sa latou faaaogā kalaveni e nonofo ai i taimi o tauaofiaga. I le 1934, na auʻiliʻili mai ai i le Bulletin faamatalaga mo le fausiaina o kalaveni talafeagai. Na iai taʻiala i le auala e mafai ona maua ai le vai, se ogaumu, moega faamoe, ma auala e mafai ona puipuia ai mai i le mālūlū.

Na fausia e le toʻatele o tagata talaʻi atamamai a latou lava kalaveni. Na faapea mai Victor Blackwell: “E leai se poto masani o Noa e fau ai le vaa, ma e leai foʻi soʻu poto masani i le fausiaina o se kalaveni.” Peitaʻi, na ia fausia lava se kalaveni.

O se kalaveni o loo i luga o se vaa, o loo faimalaga i le isi itu o le vaitafe i le vaitau o timuga tetele i Initia

Na iai se kalaveni a Avery ma Lovenia Bristow. Na faapea mai Avery: “Sa pei aʻu o se laumei i totonu o le atigi, ona na ou alu ma feaveaʻi loʻu fale.” Sa latou paeonia faatasi ma Harvey ma Anne Conrow. Na iai foʻi se la kalaveni na puipui i pepa malō. O taimi uma lava e siitia ai, e toʻulu taʻitasi ai na pepa. Na faapea mai Avery: “Na faatoʻā ou vaai lea i se kalaveni faapea.” Na taʻua e Avery, o le ulugalii o Conrows ma le la fanau tama e toʻalua, “o se aiga e fiafia tele.” Na tusi mai Harvey: “E matou te leʻi matitiva i se mea, ma na matou lagona le saogalemu i le tausiga a Ieova ma le auaunaga iā te ia.” Na auai le aiga atoa o Conrow i le Aʻoga o Kiliata, ma na tofia i latou e auauna o ni misionare i Peru.

Na auauna foʻi le aiga o Battainos o ni paeonia. Ina ua iloa e Giusto ma Vincenza o le a maua se la pepe, ona la faia lea o se kalaveni mai i le la pikiapu telē o le ituaiga o le Ford. Na “foliga mai o se fale talafeagai,” pe a faatusatusa atu i faleʻie  sa la nonofo muamua ai. Na faaauau ona latou talaʻi faatasi ma le la tama teine laʻitiiti, i tagata Italia na nonofo i le Iunaite Setete.

E toʻatele tagata na talia le tala lelei. Ae o tagata matitiva ma i latou e leai ni galuega, sa seāseā maua se tupe e faatau ai lomiga faale-Tusi Paia. E ui i lea, na latou foaʻi mai so o se ituaiga o oloa e faafesuiaʻi ai ma lomiga. E 64 oloa eseese na foaʻi atu e tagata fiafia i ni paeonia se toʻalua. Na pei na oloa eseese o ni oloa mai i se faleoloa.

Na feiloaʻi Fred Anderson ma se faifaatoʻaga na manaʻo e faafesuiaʻi a tatou tusi, ma mata faitau tusi sa faaaogā e lona tinā a o soifua. I le isi faatoʻaga, na feiloaʻi ai Fred ma se tamāloa na fiafia i a tatou lomiga. Na fiafia le tamāloa i lomiga peitaʻi e leai sana mata faitau tusi e faitau ai. Ae e mafai ona ia faitau i ai pe a faaaogā le mata faitau tusi a lona tuaoi. O lea, na ia faia ai se foaʻi mo tusi ma mata faitau tusi.

O Herbert Abbott, e iai sana pā e mafai ona tuu ai i totonu moa, e feaveaʻi i lana taavale. Pe a maua ni moa se tolu pe fā mai i tagata na tuu i ai lomiga, ona faatau atu lea i le maketi ina ia maua se tupe e utu ai lana taavale. Na ia tusi mai: “Sa iai taimi e toetoe a leai se ma tupe, ae e leʻi mafai ona taofia ai i maʻua. Na faaauau pea la ma talaʻiga pe a iai se penisini o le taavale, ma faatuatua iā Ieova ma maufaatuatuaina o ia.”

O le faalagolago iā Ieova ma maufaatuatuaina o ia, na mafai ai ona faaauau pea ana auauna i na taimi faigatā. A o tetele timuga, na sosola ese ai Maxwell ma Emmy Lewis mai i le la kalaveni, ina ua paʻū ai i luga se laau. Na tusi Maxwell: “E lē o ni faigatā nei mea auā ua na o ni mea e tutupu. E leʻi iai se taimi na ma mafaufau ai e faamaamulu. Sa tele pea galuega e manaʻomia ona faataunuu ma o le ma faanaunauga foʻi lenā.” E ui i nei faigatā, ae e leʻi mafai ona taofia ai i laʻua. Na fesoasoani foʻi a la uō i le toe fausiaina o le la kalaveni.

Ua mātaulia foʻi le faitau miliona o Molimau a Ieova i nei aso faigatā, i le faaalia o le agaga faataulaga. I le pei o uluaʻi paeonia, o loo tatou maumauaʻi foʻi e faaauau pea i le galuega talaʻi, seʻia oo ina fetalai mai Ieova ua māeʻa.

^ pala. 3 Ua taʻua nei o La Tatou Faiva o le Malo.

^ pala. 5 I na aso, o le toʻatele o paeonia e lē faigaluega. Sa latou faaaogā foaʻi e maua mai i lomiga e tausia ai i latou. E lē telē se tupe na maua mai i na foaʻi, pe a faatusatusa i tupe na latou totogiina mo lomiga.