Alu i mataupu o loo iai

Alu i le lisi o mataupu

 MEA ILOGA O LO TATOU TALAFAASOLOPITO

O Uluaʻi Fatu o le Malo na Totō i Potukali

O Uluaʻi Fatu o le Malo na Totō i Potukali

A O UIA e le vaa sa iai le uso o George Young le vasa Atalani e agaʻi atu i Europa, na toe tomānatu o ia ma le fiafia i lona sao sa fai i le totōina o fatu o le Malo i Pasili. * Peitaʻi, o le taimi lenei ua ia uaʻi atu i lona tofiga fou, o oganuu ia e leʻi galueaʻiina o Sepania ma Potukali. Na fuafua o ia e taunuu loa i inā, faatulaga lauga faale-Tusi Paia e faia e le uso o J. F. Rutherford faapea le tufatufaina atu o sāvali e 300,000.

E tele taimi na uia ai e le uso o George Young le sami ona o le galuega talaʻi

Ina ua taunuu le uso o Young i Lisbon i le 1925, na ia vaaia ai ni tulaga vevesi. Na foua e le faigāmalo i le 1910 le pulega a le aigātupu, ma aveesea le tele o le malosi sa iai i le Lotu Katoliko. E ui lava na maua e tagata le tele o le saʻolotoga, ae na faaauau pea ona iai fetauaʻiga i totonu o le atunuu.

A o faia e le uso o Young fuafuaga mo le lauga a le uso o Rutherford, na faaaogā e le malo o le atunuu le vaegaʻau ina ia taofia ai taumafaiga a se vaega o tagata e aveesea le faigāmalo sa iai. Na lapataʻia e le failautusi o le British and Foreign Bible Society le uso o Young, o le a ia feagai ma le tele o teteega. E ui i lea, na talosaga le uso o Young pe e mafai ona faaaogā le faletaalo a Camões Secondary School, ma na talia lenā talosaga.

Ua oo nei iā Me 13, o le aso lea e faia ai le lauga a le uso o Rutherford. O se aso na tulimataʻia e le toʻatele. Na faalauiloa le lauga lautele “How to Live on the Earth Forever” (E Faapefea Ona Maua le Ola e Faavavau i Luga o le Lalolagi?) i pepa malō e faapipii i luma o fale ma faasalalauga i nusipepa. Na vave ona lomia e tagata lotu tetee se mataupu i la latou nusipepa, e lapataʻia ai le ʻaufaitau e faatatau i “perofeta pepelo” ia faatoʻā taunuu i le atunuu. Na latou tufatufaina foʻi i le faitotoʻa o le faletaalo, le faitau afe o polosiua e faaleaga ai aʻoaʻoga na faamatalaina e le uso o Rutherford.

E ui lava i na tulaga, ae na matuā faatumulia le faletaalo i le pe ā ma le 2,000 tagata. Pe tusa foʻi ma le toʻa 2,000 i latou e leʻi ulu i totonu o le fale ona ua leai se avanoa. O nisi o le ʻaufaalogologo sa pipii i maea i autafa o le faletaalo, ae o isi sa faalogologo mai i luga o mea sa faaaogā e fai ai toleniga i le faletaalo.

Peitaʻi, na iai tagata tetee. Na latou feʻei ma talepe nofoa. Ae na toʻafilemu pea le uso o Rutherford ma faaaogā se laulau e tū ai i luga ina ia lagona o ia e tagata uma. Na māeʻa le lauga a le uso o Rutherford ua lata i le tā o le 12 i le pō. E silia i le 1,200 tagata fiafia na tusi o latou igoa ma tuatusi, ina ia mafai ona maua ni a latou lomiga faale-Tusi Paia. I le aso na sosoo ai, na lomia ai e le nusipepa o le O Século se mataupu e faatatau i le lauga a le uso o Rutherford.

E oo ane iā Setema 1925, ua amata ona lomia le Watch Tower i le gagana Potukali i Potukali. (I se  taimi muamua atu, na iai se mekasini faa-Potukali ua uma ona lomia i Pasili.) Pe tusa o le vaitaimi lenā na amata ai ona faia fuafuaga a Virgílio Ferguson, o se Tagata Aʻoga o le Tusi Paia i Pasili, ina ia siitia mai i Potukali e fesoasoani i le galuega o le Malo. I se taimi muamua atu, na la galulue ai ma le uso o Young i le ofisa o le lālā o Tagata Aʻoga o le Tusi Paia i Pasili. E leʻi umi ae malaga mai loa i Potukali ia Virgílio ma lana avā o Lizzie, e toe galulue faatasi ai ma le uso o Young. Na talafeagai lelei le taunuu mai o le uso o Ferguson, auā o le taimi lea ua toeitiiti suia le tofiga o le uso o Young, o le talaʻi lea i isi vaipanoa e aofia ai ma le Soviet Union.

O pemita nofomau o Lizzie ma Virgílio Ferguson i le 1928

Ina ua faoa e le vaegaʻau le faigāmalo a Potukali, na faateteleina teteega i le galuega a Molimau a Ieova. Peitaʻi, e leʻi tuua ai e le uso o Ferguson le atunuu. Nai lo o lea, na ia faia taumafaiga e puipuia ai le vaega toʻaitiiti sa iai o Tagata Aʻoga o le Tusi Paia ma faamalosiau iā i latou. Na ia saʻili mo se faatagaga ina ia faaaogā ai lona fale e faia ai e lē aunoa sauniga. Na maua lenā faatagaga iā Oketopa i le 1927.

I le tausaga muamua o le pulega a le vaegaʻau, e pe ā ma le 450 tagata na faia tusiga mo le Watch Tower. E lē gata i lea, na faaaogā foʻi sāvali ma tamaʻitusi e faasalalau atu ai le upu moni i vaipanoa uma o le emepaea o Potukali, e aofia ai Angola, Azores, East Timor, Goa, Madeira, Mozambique, ma Cape Verde.

I le 1929, na taunuu ai i Lisbon Manuel da Silva Jordão, o se tagata Potukali lotomaulalo e galue e faia togālaau. A o nofo i Pasili, na ia faalogo ai i se lauga i le lautele na faia e le uso o Young. Na vave ona ia iloa o le upu moni lea, ma na naunau e fesoasoani i le uso o Ferguson ina ia faalautele atu le galuega talaʻi. O lea, na amata ai ona auauna Manuel o se colporteur, o le taʻu lenā o paeonia i na taimi. O le maopoopo lelei o le lomiaina ma le tufatufaina atu o lomiga faale-Tusi Paia, na faatoʻateleina ai le faapotopotoga fou i Lisbon.

I le 1934, sa tatau ona toe foʻi le uso ma le tuafafine o Ferguson i Pasili. Peitaʻi, o lea ua totō fatu o le upu moni. A o tele fevesiaʻiga i Europa ona o le fetauaʻi o tagata Sepania ma le Taua Lona Lua a le Lalolagi, na tumau pea ona faamaoni se vaega toʻaitiiti o tagata o Ieova i Potukali. E mo sina taimi na pei i latou o ni malala ola, ae i le 1947 na toe faaolaola lo latou maelega, ina ua taunuu le misionare muamua na toleniina i Kiliata, o John Cooke. Ina ua mavae lenā taimi, na matuā faatoʻateleina le aofaʻi o tagata talaʻi o le Malo. E oo lava i le taimi na faasā ai e le malo galuega a Molimau a Ieova i le 1962, na faatupulaʻia pea lenā aofaʻi. Iā Tesema i le 1974 ina ua aloaʻia faaletulafono Molimau a Ieova, na silia ma le 13,000 tagata talaʻi i le atunuu.

I aso nei, ua silia ma le 50,000 tagata talaʻi o le Malo o le Atua i Potukali, ma le tele o isi motu o loo tautatala i le gagana Potukali e aofia ai Azores ma Madeira. O loo aofia i nei tagata talaʻi fanau a fanau a nisi sa faalogologo i le lauga iloga a le uso o Rutherford i le 1925.

E tatou te faafetaia Ieova ma uso ma tuafāfine faamaoni sa iai i lenā vaitaimi, ona o le lototetele ma taʻimua i le galuega o ni “auauna a Keriso Iesu i nuu ese.”​—Roma 15:15, 16.​—Mea iloga o lo tatou talafaasolopito i Potukali.

^ pala. 3 Tagaʻi i le mataupu “E Tele Pea Galuega o le Seleselega e Fai” i Le Olomatamata o Me 15 2014, itu. 31-32.