Alu i mataupu o loo iai

Alu i le lisi o mataupu

E Faapefea Ona Faaauau Pea Ona Tatou “Faatalitali ma le Onosaʻi”?

E Faapefea Ona Faaauau Pea Ona Tatou “Faatalitali ma le Onosaʻi”?

“Ou te faatalitali ma le onosaʻi.”​—MIKA 7:7.

1. Aiseā e ono mou atu ai lo tatou onosaʻi?

NA AMATA le taufaaiʻuiʻuga o le faiga o mea a Satani i le 1914, ina ua avea Iesu ma Tupu i le lagi. Na faia se taua i le lagi, ma lafo mai ai e Iesu le Tiapolo ma ana temoni i le lalolagi. (Faitau le Faaaliga 12:7-9.) Ua iloa e Satani “ua puupuu lona taimi.” (Faaa. 12:12) Peitaʻi, o loo faaauau pea lenei ʻtaimi puupuu’ mo se taimi umi e leʻi faatalitalia e nisi o i tatou. A o tatou faatalitali i le taimi e gaoioi ai Ieova, po ua tau mou atu lo tatou onosaʻi?

2. O le ā o le a iloiloina i lenei mataupu?

2 E tatou te oo i se tulaga lamatia pe a tatou lē onosaʻi, auā o le a tatou gaoioi ai e aunoa ma se mafaufau lelei. O lea, o le ā e fesoasoani iā i tatou e faatalitali ai pea ma le onosaʻi? O le a fesoasoani lenei mataupu iā i tatou, e ala i le taliina o fesili o loo mulimuli mai. (1) O le ā e tatou te aʻoaʻoina mai i le faaaʻoaʻoga a le perofeta o Mika, i le faaalia o le onosaʻi? (2) O ā mea e tutupu e avea ma faailoga e iloa ai ua latalata mai le iʻuga? (3) E faapefea ona tatou talisapaia le onosaʻi o Ieova?

O LE Ā E TATOU TE AʻOAʻOINA MAI I LE FAAAʻOAʻOGA A MIKA?

3. Na faapeʻī le tulaga o Isaraelu i aso o Mika?

3 Faitau le Mika 7:2-6. Na mātauina e le perofeta o Mika le faasolo ina leaga o le tulaga faaleagaga o tagata Isaraelu, aemaise lava ina ua pule le tupu o Aasa. Na faatusa e Mika tagata Isaraelu lē faamaoni i se “pā laau tuitui,” lea e mafai ona afāina ai se tasi. Na matuā afāina so o se tasi na faifaimea faatasi ma na tagata Isaraelu, lea na faaleagaina ai foʻi ma faiā faaleaiga. Na sasaa atu faalogona o Mika iā Ieova,  auā sa ia iloa e lē mafai ona ia suia le tulaga o mea. Na mautinoa e Mika e iai le taimi atofaina a Ieova e taulima ai le faafitauli. O lea, na ia faatalitali ai pea ma le onosaʻi.

4. O ā faigatā o loo tatou fesagaʻia?

4 I le pei o Mika, o loo siʻomia i tatou e le toʻatele o tagata manatu faapito, ʻo ē e lē lotofaafetai, e lē faamaoni ma e lē lotoaiga.’ (2 Timo. 3:2, 3) E tatou te mafatia pe a faaalia e aumea i le galuega, aʻoga ma tuaoi le manatu faapito. Peitaʻi, e sili atu faigatā o loo feagai ma isi auauna a le Atua, auā na taʻua e Iesu o le a feagai ona soo ma teteega mai i aiga. Na ia fetalai i le Mataio 10:35, 36: “Ua ou sau e faatupu fevaevaeaʻiga o le atalii ma lona tamā, o le tama teine ma lona tinā, o le avā foʻi ma le tinā o lana tane. O le mea moni, e fai le aiga o le tagata ma ona fili.” E talitutusa na fetalaiga a Iesu ma upu o loo i le Mika 7:6. Aua neʻi o tatou lolo atu i omiga mai i aiga pe a tetee mai i lo tatou faatuatua. Ia tatou tutumau faamaoni ma faatalitali ma le onosaʻi iā Ieova, e na te taulimaina faafitauli. Pe a faaauau ona tatou ōle atu iā te ia mo le fesoasoani, o le a ia foaʻi mai le atamai ma le malosi ina ia tumau ai.

5, 6. (a) Na faapefea ona tauia e Ieova Mika? (e) O le ā e leʻi vaaia e Mika?

5 Na tauia e Ieova le onosaʻi o Mika. Na ia vaaia le iʻuga o le tupu leaga o Aasa, faapea le nofoia o le nofoālii e le tupu o Esekia lona atalii, lea na ia toe faafoʻisia le tapuaʻiga mamā. Na ia vaai foʻi i le faataunuuina o le valoaga na ia tusia e e faatatau iā Samaria, ina ua osofaʻia e ʻautau a Asuria le malo i le itu i mātū o Isaraelu.​—Mika 1:6.

6 Peitaʻi, e leʻi vaaia e Mika le faataunuuga o valoaga uma na faagaeeina o ia e Ieova e valoia. O se faataʻitaʻiga, na ia tusi: “O aso e gata ai, e oo ina faatumauina ai le mauga o le fale o Ieova i luga o tumutumu o atumauga, e faamaualugaina foʻi e sili i aʻega; ma e gasolo ane i ai tagata. E ō mai lava nuu e tele ma faapea ane: ʻŌ mai ia outou, ma tatou ō aʻe i le mauga o Ieova.’” (Mika 4:1, 2) Na ia maumauaʻi e faamaoni pea iā Ieova seʻia oo i le oti, e tusa po o ā tulaga o tagata na siʻomia ai o ia. Na ia tusi: “E taʻitasi nuu uma ma savavali i le igoa o lona atua; a o i tatou, e tatou te savavali i le suafa o Ieova lo tatou Atua i aso uma lava, e oo i le faavavau.” (Mika 4:5) Na faatalitali ma le onosaʻi Mika a o faagasolo taimi faigatā, auā sa ia mautinoa o le a faataunuuina e Ieova ana folafolaga uma. Sa ia maufaatuatuaina Ieova.

7, 8. (a) Aiseā e tatou te maufaatuatuaina ai Ieova? (e) O le ā le galuega e tatau ona fai, ona pei ai lea e vave le alu o le taimi?

7 Po o tatou maufaatuatuaina Ieova e pei o Mika? Ua iā i tatou māfuaaga lelei e faia ai faapea, auā ua tatou vaaia le faataunuuga o le valoaga a Mika. A o faagasolo “aso e gata ai,” ua faapotopoto faatasi le faitau miliona mai i atunuu uma, ituaiga ma gagana i le “mauga o le fale o Ieova.” E ui i le fetauaʻi o malo, ae ua tuʻi e tagata tapuaʻi o Ieova a latou “pelu e fai ma suōtosina,” ma ua latou lē toe “aʻoaʻo foʻi i taua.” (Mika 4:3) Maʻeu se faaeaga o le iai faatasi ma tagata filemu o Ieova!

8 E tatou te mananaʻo ia vave ona faaoo mai e Ieova le iʻuga o lenei faiga leaga o mea. Peitaʻi, ina ia tatou faatalitali ma le onosaʻi, e manaʻomia ona tutusa la tatou vaaiga ma le silafaga a Ieova. Ua ia faatulaga se aso e faamasinoina ai tagata e ala mai iā Iesu Keriso, “le tagata ua ia tofia.” (Galu. 17:31) Ua lamatia ola  o tagata. O lea, ua tuuina mai e le Atua le avanoa i so o se tagata, e aʻoaʻo ma faatatau ai le “poto saʻo i le upu moni” ina ia faasaoina ai. (Faitau le 1 Timoteo 2:3, 4.) Pe a tatou maelega e aʻoaʻo isi i le poto saʻo e faatatau i le Atua, e peiseaʻī o le a vave ai le alu o le taimi. Maʻeu lo tatou fiafia pe a oo mai le iʻuga, a o tatou maelega pea i le galuega talaʻi!

O Ā MEA E TUTUPU E AVEA MA FAAILOGA E ILOA AI UA LATALATA MAI LE IʻUGA?

9-11. Po ua faataunuuina le 1 Tesalonia 5:3? Faamatala.

9 Faitau le 1 Tesalonia 5:1-3. Ua lē o toe umi ona alalaga mai lea o atunuu e faapea, “Ua filemu ma saogalemu!” E manaʻomia ona tatou “mataala ma faaauau ona mafaufau lelei,” ina ia aua neʻi faasesēina i tatou i lenā alaga. (1 Tesa. 5:6) Seʻi o tatou iloiloina mea e tutupu a o leʻi oo atu i lenā faalauiloaga tāua.

10 Na naunau atunuu e maua le filemu ina ua māeʻa taua e lua a le lalolagi. Ina ua mavae le Taua Muamua a le Lalolagi, na faavaeina ai Malo Sosoo ina ia aumaia le filemu. Ae ina ua māeʻa le Taua Lona Lua a le Lalolagi, na faamoemoe tagata i Malo Aufaatasi e aumaia le filemu i le lalolagi. Na faatuatuaina e malo ma taʻitaʻi lotu uma na faalapotopotoga e maua ai se filemu mo tagata. O se tasi o faataʻitaʻiga, na faasilasila e Malo Aufaatasi e faapea, o le 1986 o se Tausaga o le Filemu i le Lalolagi Aoao. I lenā tausaga, na potopoto ai le toʻatele o taʻitaʻi o malo ma lotu, ma le taʻitaʻi o le Lotu Katoliko ina ia tatalo mo le filemu.

11 Peitaʻi, o lenā faalauiloaga o le filemu ma isi faalauiloaga faapena, e leʻi faataunuuina ai le valoaga o loo i le 1 Tesalonia 5:3. Aiseā? Talu ai e leʻi oo ʻfaafuaseʻi mai le faaumatiaga’ e pei ona valoia.

12. O le ā ua tatou iloa e faatatau i le alaga “Ua filemu ma saogalemu”?

12 O ai o le a faia lenei faalauiloaga tāua “Ua filemu ma saogalemu”? O le  ā le matafaioi a taʻitaʻi o lotu ua faapea mai o Kerisiano, ma isi lotu uma i lenā faalauiloaga? E faapefea ona aofia ai taʻitaʻi o malo i lenā faalauiloaga? E lē o taʻua i le Tusi Paia. Peitaʻi ua tatou iloa, e lē o se ʻfilemu ma se saogalemu’ moni, e tusa lava po o ai e faia le faalauiloaga ma foliga mai o le a taunuu moni. O le a tumau ona pulea e Satani lenei faiga o mea, ma o le a matuā leaga lava. Pagā se faanoanoa pe a tatou lē solitū ae talitonu i folafolaga pepelo a Satani.

13. Aiseā ua taofiofi ai e agelu matagi o le faaumatiaga?

13 Faitau le Faaaliga 7:1-4. A o tatou faatalitali i le faataunuuga o le 1 Tesalonia 5:3, o loo taofiofi e agelu malolosi matagi o le faaumatiaga o le puapuaga tele. Aiseā? O se tasi o māfuaaga na taʻua e le aposetolo o Ioane, seʻia māeʻa le faamaufaailogaina faaiʻu o le ʻaufaauuina po o “pologa a lo tatou Atua.” * Pe a māeʻa lenā, ona tatala loa lea e agelu matagi o le faaumatiaga. O le ā e sosoo ai?

14. E faapefea ona tatou iloa ua latalata mai le iʻuga o Papelonia le Aai Tele?

14 Ua tatou vaaia faailoga o le latalata mai o le iʻuga o Papelonia le Aai Tele, le emepaea o lotu sesē. Ua talafeagai ona faaoo i ai le faaumatiaga. Pe a tupu lenā mea, e lē mafai e “tagata, ma motu o tagata, ma nuu, ma gagana,” ona fesoasoani iā Papelonia le Aai Tele. (Faaa. 16:12; 17:15-18; 18:7, 8, 21) Ua amata ona lē toe lagolagoina lotu ma taʻitaʻi lotu, pe a mātauina le upuia o i latou i tusitusiga ma faasalalauga. E ui i lea, ua manatu pea taʻitaʻi lotu a Papelonia le Aai Tele o loo sologa lelei mea uma. Pagā le sesē o o latou manatu! Pe a māeʻa le faalauiloaga “Ua filemu ma saogalemu,” ona osofaʻia faafuaseʻi loa lea ma tafiesea e malo lotu sesē uma. O le a mou atu e faavavau Papelonia le Aai Tele. O lea, e tāua ai ona faatalitali ma le onosaʻi i le taimi e tutupu ai na mea mataʻina.​—Faaa. 18:8, 10.

E FAAPEFEA ONA FAAALIA LO TATOU TALISAPAIA O LE ONOSAʻI O IEOVA?

15. Aiseā ua faatalitali ai ma le onosaʻi Ieova?

15 O loo faatalitali ma le onosaʻi Ieova i le taimi tonu e gaoioi ai, e ui ina matuā upuleagaina e tagata lona suafa. E lē finagalo o ia e faaumatia so o se tagata lotofaamaoni. (2 Pete. 3:9, 10) Pe e faapena le auala e tatou te mafaufau ai? A o leʻi oo mai le aso o Ieova, e mafai ona faaalia lo tatou talisapaia o le onosaʻi o Ieova, e ala i auala o loo mulimuli mai.

16, 17. (a) Aiseā e tatau ai ona tatou fesoasoani i ē ua lē o toe talaʻi? (e) Aiseā e tatau ai ona toe vave foʻi iā Ieova i latou ua lē o toe talaʻi?

16 Ia fesoasoani i ē ua lē o toe talaʻi. Na fetalai Iesu, e olioli le lagi pe a toe maua se mamoe na sē. (Mata. 18:14; Luka 15:3-7) O le mea moni, e manatu mamafa Ieova i ē ua lē o toe talaʻi i le taimi nei, ae sa faaalia le alofa mo lona suafa. O le a faafiafiaina Ieova ma agelu, pe a tatou fesoasoani iā i latou e toe foʻi mai iā Ieova.

17 Po o oe o se tasi ua lē o toe talaʻi i le taimi lenei? Atonu ua e lē toe auai i sauniga ona sa faatigā se tasi iā te oe. Atonu ua mavae atu sina taimi, o lea, ia fesili ifo iā te oe lava: ʻPo o sili atu ona lelei ma fiafia loʻu olaga i le taimi lenei? O ai na faatigā mai iā te aʻu, o Ieova po o se tagata lē lelei atoatoa? Pe na faia e Ieova se mea leaga iā te aʻu?’ E tusa pe e tatou te lē o  ola e ōgatusa ma lo tatou tuuina atu, ae ua tuuina mai e Ieova le avanoa e tatou te maua ai ana sauniuniga lelei. (Iako. 1:16, 17) Ua toe o se aga ona oo mai lea o le aso o Ieova, ma o le taimi lenei e tatau ai ona toe foʻi i aao alofa o lo tatou Tamā ma lana faapotopotoga. E na o le pau lea o le nofoaga saogalemu i nei aso e gata ai.​—Teu. 33:27; Epe. 10:24, 25.

E faia e tagata o Ieova taumafaiga uma e fesoasoani ai i ē lē o toe talaʻi, ina ia toe foʻi iā Ieova (Tagaʻi i le palakalafa 16, 17)

18. Aiseā e tatau ai ona tatou lagolagoina ē o loo taʻimua?

18 Ia lagolagoina ma le faamaoni ē o loo taʻimua. O Ieova o se Leoleo Mamoe alofa, ua ia taʻitaʻia ma puipuia i tatou, ma tofia lona Alo o se Leoleo Mamoe Sili o le lafu. (1 Pete. 5:4) Ua galulue toeaina i le leoleoina o mamoe taʻitoʻatasi a le Atua, i le silia i le 100,000 faapotopotoga. (Galu. 20:28) Pe a tatou lagolagoina ma le faamaoni ē o loo taʻimua, e faaalia ai lo tatou talisapaia o Ieova ma Iesu i sauniuniga uma ua la faia mo i tatou.

19. E faapefea ona tatou mafuta vavalalata ma isi?

19 Ia mafuta vavalalata le tasi i le isi. O le ā le uiga? Pe a osofaʻia e le fili se ʻautau malosi, e taumafai fitafita e tutū vavalalata le tasi i le isi, ma lē mafai ai ona sao atu le fili. Ua faateteleina osofaʻiga i tagata o le Atua. E lē o se taimi lenei e tatou te femisaaʻi ai. O le taimi lenei e mafuta vavalalata ai le tasi i le isi, ma ia lē amanaʻia tulaga lē lelei atoatoa o isi, ae ia maufaatuatuaina Ieova.

O le taimi lenei e mafuta vavalalata ai le tasi i le isi e tetee atu i le Tiapolo ma temoni (Tagaʻi i le palakalafa 19)

20. O le ā e tatau ona tatou faia i le taimi lenei?

20 Tau ina ia tatou mataala pea faaleagaga ma faatalitali ma le onosaʻi. E manaʻomia foʻi ona tatou faatalitali ma le onosaʻi i le taimi e taunuu ai le alaga “Ua filemu ma saogalemu!,” ma le faamaufaailogaina faaiʻu o le ʻaufaauuina. A māeʻa lenā, ona tatalaina loa lea e agelu e toʻafā matagi o le faaumatiaga, ona faaumatia lea o Papelonia le Aai Tele. A o tatou faatalitali i le taimi e tutupu ai na mea uma, seʻi o tatou gauaʻi atu i le taʻitaʻiga mai i ē ua tofia e taʻimua i le faalapotopotoga a Ieova. Ia mafuta vavalalata le tasi i le isi e tetee atu i le Tiapolo ma temoni. O le taimi lenei e utagia ai le fautuaga a le faisalamo: “Ia outou lototetele ma tau ina ia malolosi o outou loto, o outou uma o ē o loo faatalitali iā Ieova.”​—Sala. 31:24.

^ pala. 13 Ina ia iloa le eseesega o le uluaʻi faamaufaailogaina o le ʻaufaauuina, ma lo latou faamaufaailogaina faaiʻu, tagaʻi i Le Olomatamata o Ianuari 1, 2007, itulau e 30-31.