O Faapefea Ona Autasia Tagata i le Lalolagi i le Taimi Nei?

E FAAPEFEA ona e faamatalaina le “autasi”? I nisi tagata, o le uiga o lenei upu, o le leai o se feteenaʻiga. Mo se faaaʻoaʻoga, pe a sainia e ni atunuu se lua pe sili atu foʻi se maliega ma malilie i aiāiga o le filemu, e mafai ona faapea o loo latou autasi. Pe e moni lea manatu? E leai.

Seʻi mafaufau foʻi i le mea lenei: A o faagasolo taimi, e faitau afe maliliega sa faia mo le filemu ua faalēaogāina. Aiseā? Ona ua uaʻi tele atu taʻitaʻi o le malo i o latou tulaga maualuluga na i lo le filemu ma le autasi. Ma ua fefefe nisi o atunuu i le mea e ono oo i ai pe a lē tutusa lo latou malosi faaaupega ma le malosi o isi atunuu.

E lē faapea a lē fetauaʻi ni atunuu se lua, ona faapea lea o loo autasi i le filemu. O se faataʻitaʻiga: Afai o tau fai taʻi fana a ni alii se toʻalua i le isi ae e leʻi faapaina, ona o le auala lea e tausi ai le la filemu, faamata o la maua se filemu moni? E matuā lē talafeagai lenā manatu! Peitaʻi, o le tulaga lenā ua oo i ai le tele o atunuu. O le faatupulaʻia o le lē fetalitonuaʻi o atunuu ua tupu ai le matataʻu ona e ono faaaogā nei auupega mataʻutia i se aso. O le ā ua faia e puipuia mai ai i se faalavelave?

Ua Faafaigatā le Autasi Ona o Auupega Mataʻutia

E toʻatele ua faamoemoe atu i le maliega lea na faamalosia i le 1968 (Maliega e Taofi Auupega Mataʻutia). E lē faataga i lenei maliega le fausia o auupega faaniukilia i atunuu e lē o maua ai ma faaitiitia le faateleina i atunuu o loo faia. E silia i le 180 atunuu ua lagolagoina lenei maliega, ma o lo latou sini o le aveesea uma lea o auupega mataʻutia.

Atonu e logolelei lo latou sini, ae ua manatu ē e faitio i lea maliega e faapea, ua na o se taumafaiga e taofi ai atunuu e lē o iai ni auupega mataʻutia mai le gaosiaina o na mea. Peitaʻi, e ono toe liliu le tofā o nisi atunuu na sainia lenei maliega. O le mea moni, ua faapea mai nisi atunuu e lē tonu lea faiga o le faasāsā o i latou e gaosi auupega, auā e manaʻomia mo lo latou puipuiga.

Ua atili ona faigatā le mataupu, ma faatupulaʻia ai lamatiaga, ona e lē faasāina  atunuu mai le faaaogāina o faiga faaniukilia e maua ai le eletise. Ua mataʻu nisi atunuu ona e faapea mai nisi atunuu o loo latou faaaogā faiga faaniukilia i se auala filemu, ae atonu o loo gaosia faananā ni a latou auupega faaniukilia mataʻutia.

E mafai foʻi e atunuu o loo iai auupega faaniukilia ona lē amanaʻia aiāiga o le maliega. O loo faapea mai ē lē auai i le maliega, seʻi iloga e vālea atunuu ia e matuā tele a latou auupega faaniukilia, faatoʻā aveese lea pe faaitiitia a latou faaputuga o meatau. E tusa ai ma faamatalaga, “ina ia taulau lenei mea . . . e manaʻomia ona lelei le va ma fetalitonuaʻi nei atunuu, ae o lo latou feteenaʻi tele [e faigatā ona talitonu] e ono tupu lenei mea.”

E ui i taumafaiga maumauaʻi a tagata ina ia autasi, ae ua iʻuvale uma. E lē faateʻia tagata aʻoga o le Tusi Paia i lenā mea, auā na faapea mai le Afioga a le Atua: “E lē o i le tagata lona ala, e lē o i le tagata e savali ona faatonuina le mea e ui ai o ia.” (Ieremia 10:23) Ua faamatala saʻo mai foʻi e le Tusi Paia: “O i ai le ala ua tonu i le manatu o le tagata; a o lona taunuuga, o ala ia e oti ai.” (Faataoto 16:25) E gata mai le mafai o faigāmalo i le ausiaina o le autasi. E ui i lea, o loo iai pea lo tatou faamoemoe.

Le Puna o le Autasi Moni

O loo i le Tusi Paia folafolaga a le Atua i le autasia o le lalolagi, ae lē mai taumafaiga a tagata. O le a faataunuu e Lē na Faia mea lana fuafuaga, ina ia ola filemu tagata i le lalolagi, o se mea e lē o mafai e tagata ona fai. E faigatā ona talitonu nisi e mafai ona tupu lenei mea. Peitaʻi, o le fuafuaga a le Atua mai lava i le amataga, ia ola tagata i le filemu ma le autasi. * E tele mau i le Tusi Paia e faamaonia ai e leʻi suia le fuafuaga a le Atua mai le amataga ina ia autasia tagata uma. Seʻi tagaʻi i faaaʻoaʻoga nei:

• “Inā ō mai ia, inā vaavaai i galuega a Ieova, o lē ua faia faatafunaga i le lalolagi. Ua faaiʻua e ia o taua e oo lava i tuluʻiga o le lalolagi; ua gagau e ia le aufana, ma vavae le tao; ua susunuina foʻi e ia kariota i le afi.”—SALAMO 46:8, 9.

• “Latou te lē faia se mea leaga, latou te lē faaumatia foʻi se mea i loʻu mauga paia uma; auā e tumu le lalolagi i le malamalama o Ieova, e pei ona ufitia o le iliti tai i le suāsami.”—ISAIA 11:9.

• “E faaumatia e ia le oti e faavavau; e soloiesea foʻi e le Alii o Ieova o loimata i mata uma lava; e faateʻaeseina foʻi e ia le gao o lona nuu i le lalolagi uma lava; auā ua fetalai mai ai Ieova.”—ISAIA 25:8.

• “A e faatalitali i tatou i le lagi fou ma le lalolagi fou, pei o lana na folafola mai, e mau ai le amiotonu.”—2 PETERU 3:13.

 • “E soloiesea foʻi e le Atua loimata uma i o latou mata; e leai foʻi se toe oti, po o se faanoanoa, po o se auē, e leai foʻi se toe puapuaga; auā ua mavae atu mea muamua.”—FAAALIGA 21:4.

E maufaatuatuaina nei folafolaga. Aiseā? Ona o ia o Lē na Faia mea, o Ieova le Atua, e iā te ia le malosi ma le tomai e autasi ai tagata. (Luka 18:27) E iā te ia foʻi le faanaunauga e faia ai. E lē gata i lea, o loo faapea mai le Tusi Paia e faatatau i le Atua, o ‘lana lava pule tunoa . . . ina ia na faaopoopoina iā Keriso o mea uma lava o i le lagi, atoa ma mea o i le lalolagi.”—Efeso 1:8-10.

O le folafolaga a le Atua mo se “lalolagi fou, e mau ai le amiotonu,” e lē o ni moomooga faivavale. (2 Peteru 3:13) E tusa ma mea na ia folafola mai, na faapea mai ai Ieova le Atua: “E lē foʻi mai fua iā te aʻu; a e peitaʻi e faia le mea ou te loto i ai, e manuia foʻi i le mea ou te auina atu ai.”—Isaia 55:11.

Autasi Ona o le Afioga a le Atua

E pei ona taʻua i le mataupu ua mavae, ua faapogaia e lotu nisi o feeseeseaʻiga ae lē o le autasia o tagata. E ao ona tatou mafaufau loloto i lenei mea, auā afai tatou te talitonu e iai Lē na Faia mea, pe ua lē talafeagai ea la ona faatalitalia ona tagata tapuaʻi ia filemu ma autasi? O se mea tatau!

E lē tuuaʻia Ieova le Atua ma lana Afioga ona o feeseeseaʻiga e māfua mai lotu. Peitaʻi, ua taʻuleagaina ai lotu o loo lagolagoina fuafuaga a tagata mo le autasi, ae lē lagolagoina fuafuaga a le Atua. Na taʻu e Iesu taʻitaʻi lotu o “tagata pepelo” ma na faapea atu iā i latou: “E tatau lava iā te outou le valoaga a Isaia, ua faapea mai. ‘Ua faalatalata mai iā te aʻu lenei nuu i o latou gutu, ma vivii mai iā te aʻu i o latou laugutu, a o latou loto ua taumamao iā te aʻu. E tapuaʻi fua mai i latou iā te aʻu i lo latou fai ma mataupu o poloaʻiga a tagata.’”—Mataio 15:7-9.

Ua ese mai ai le tapuaʻiga moni, auā e autasi ona tagata. Na valoia e le perofeta o Isaia: “O aso e gata ai, e oo ina faatumauina ai o le mauga o i ai le fale o Ieova i tumutumu o atu mauga, e faamaualugaina foʻi e sili i mauga, ona gasolo ane ai lea o nuu uma i ai. E faamasino foʻi o ia i nuu ese, ma aʻoaʻi atu i nuu e tele; ona latou tuʻi ai lea i a latou pelu e fai ma uʻamea o suōtosina, o latou tao foʻi e fai ma polo e teu aʻi vine; e lē sii atu le pelu e le tasi nuu i le tasi nuu, latou te lē toe aʻoaʻo foʻi i taua.”—Isaia 2:2, 4.

E sili atu i le 230 atunuu i aso nei, ua utagia e Molimau a Ieova le faatonuga mai iā Ieova le Atua e tusa ai o le autasi. O le ā le faavae o lo latou autasi? Na faapea mai le aposetolo o Paulo: “A o le alofa, e lautua lea i nei mea uma, o le fusi lea e atoatoa ona lelei ai.” (Kolose 3:14) O le upu na faaaogā e Paulo mai le gagana Eleni mo le “fusi” e mafai ona faasino atu i uaua o sooga o le tino o le tagata. O nei uaua e malolosi e pei o ni maea, ma e lua ona aogā. E mau lelei ai totoga i vaega o le tino o iai, ma pipii faatasi ai ponaivi.

E faapena foʻi le alofa. O le alofa lea sa faaalia e Keriso, e lē gata ina taofia ai o le fefasiotiaʻi, ae ua mafai ai e tagata e eseese tulaga ona ola faatasi i le filemu. Mo se faaaʻoaʻoga, ua mafai ai e tagata ona ola e tusa ai ma le taʻiala ua lauiloa, o loo i le Mataio 7:12, na fetalai ai Iesu: “O mea uma foʻi tou te loto i ai ia faia e tagata iā te outou, ia faapea lava ona outou faia iā te i latou.” O le mulimuli i lenei taʻiala, ua fesoasoani ai i le toʻatele ia foʻia le faailogatagata.

“Ua Outou Fealofani”

E lotomau Molimau a Ieova e faaalia lo latou faamaoni o ni soo o Keriso i le mulimuli i ana fetalaiga: “O le mea lea e iloa ai e tagata uma lava o oʻu soo outou, pe afai ua outou fealofani.” (Ioane 13:35) Ua faaalia lea ituaiga o alofa i se auala sili, i taimi o vesiga ona  o le faailogalanu ma faiga faapolotiki. Mo se faataʻitaʻiga, i le fasiotiga tagata i Rwanda i le 1994, na faaalia e Molimau a Ieova lo latou fealofani. Na lamatia ola o Molimau Hutu ona o le puipuiga o o latou uso Tutsi!

E lē talafeagai le faatalitalia o atunuu o le lalolagi e ati aʻe le alofa mo tuaoi, ma autasia ai le lalolagi. E tusa ai ma le Tusi Paia, o le a tupu lenā mea i le taimi atofaina a le Atua. Peitaʻi, e mafai e tagata taʻitoʻatasi ona oofu i le alofa ma maua ai le autasi.

A o faagasolo le tausaga ua teʻa, na faaalu ai e Molimau a Ieova le sili atu i le piliona itula e asia ai tagata, ma talatalanoa e faatatau i le Tusi Paia ma ona aogā i le olaga i le taimi nei. Ua autasia le faitau miliona o tagata ona o le poto saʻo mai le Afioga a le Atua, o nisi o i latou nei na ita i isi. O nisi sa faapea, e aofia ai tagata mai Arapi ma Iutaia, o Aminia ma Take, o Siamani ma Rusia, ae e lē pau ai lenā.

Afai e te fia malamalama atili i aogā o le Tusi Paia ina ia autasia ai, faafesootaʻi Molimau a Ieova i la outou vaipanoa, po o le tusi atu i le tuatusi talafeagai o loo i le itulau e 2.

[Faaopoopoga i lalo]

[Faamatalaga faaopoopo i le itulau 4]

E faitau afe maliliega mo le filemu sa faia ua faalēaogāina

[Faamatalaga faaopoopo i le itulau 7]

O le faatatauina o taʻiala o le Tusi Paia e mafai ai ona taulau i mea ua lē taulau ai faigāmalo a tagata

[Ata i le itulau 5]

Ua taʻu mai e le Afioga a le Atua le Puna o le autasi moni

[Ata i le itulau 7]

Fausia faatasi e Molimau a Ieova Hutu ma Tutsi le Maota e tapuaʻi faatasi ai