Fesili Mai le ʻAufaitau

I nisi vaega o le lalolagi, o se aganuu le avatu o meaalofa i faaipoipoga. O ā mataupu silisili faale-Tusi Paia e tatau ona tatou iloiloina pe a avatu pe mauaina foʻi ni meaalofa faapena?

Ua faamaonia e le Tusi Paia le avatuina o meaalofa pe afai na faia i se uunaʻiga saʻo i le taimi talafeagai. I le tulaga o le foaʻi atu, ua faalaeiau ai e le Tusi Paia Kerisiano moni ina ia faaaʻoaʻo iā Ieova o Lē na Saunia mea ma e limafoaʻi. (Iakopo 1:17) Na faamalosiau le aposetolo o Paulo i uso Kerisiano e faapea: “Aua le galo iā te outou ona agalelei ma alolofa atu; auā o taulaga faapena e fiafia ai le Atua.” O lea, ua faalaeiauina ai Kerisiano ina ia limafoaʻi.—Eperu 13:16; Luka 6:38.

Ae faapefea le faia e se faleoloa o se lisi o meaalofa e mananaʻo i ai le alii ma le tamaʻitaʻi o le a faaipoipo, o se faiga ua taatele i le Iunaite Setete? I Egelani e taʻua lenā faiga o se lisi o meaalofa mo le faaipoipoga. O le mea masani, e ō laʻua i se faleoloa ina ia tilofaʻia po o ā ni meaalofa la te mananaʻo ai ona faia lea o se la lisi o meaalofa. E ō atu i ai aiga ma uō a le alii ma le tamaʻitaʻi lea e valaaulia, i le faleoloa ina ia faatau mai mea o loo i le lisi o mea e la te mananaʻo i ai. O le itu e lelei ai le iai o se lisi o meaalofa, o le a lē tele ai le taimi o i latou e valaaulia e alu i le tau vaavaaia o se meaalofa ma o le a lē manaʻomia ona la toe faafoʻia i le faleoloa meaalofa e lē mananaʻo i ai.

Pe afai e mananaʻo le alii ma le tamaʻitaʻi e faaaogā se lisi o mea e mananaʻo i ai o la laʻua lava lea filifiliga. Peitaʻi, atonu e manaʻo se Kerisiano e ʻalofia faiga e ono solia ai mataupu silisili a le Tusi Paia. O se faaaʻoaʻoga, ae faapefea pe afai e faia e i laʻua se lisi o mea e matuā taugatā lava? I lenā tulaga, atonu o le a lē mafai ai e i latou e lē lava le faasoa ona saunia se meaalofa, pe atonu latou te manatu e sili ai le lē auai i le faaipoipoga na i lo le māsiasi ona o le auina atu o se meaalofa taugofie. Na tusi mai se fafine Kerisiano e faapea: “O le foaʻi atu o meaalofa ua avea o se avega mamafa. Na ou taumafai e limafoaʻi, ae peitaʻi ua mou atu lenā fiafia o le foaʻi atu sa iā te aʻu.” Pagā le faanoanoa pe afai e avea se faaipoipoga ma māfuaaga o le lotovaivai!

O lea la, e lē tatau ai i ē foaʻi atu ona lagona faapea ina ia taliaina a latou meaalofa e tatau ona faatau mai i se faleoloa patino po o se tau patino. Na faaalia mai e Iesu le mea e tāua i le silafaga a le Atua o le loto o lē o loo foaʻi atu, ae lē o le tau o le meaalofa. (Luka 21:1-4) O le tulaga foʻi faapena, e tusa ai ma meaalofa a tagata matitiva, na tusi le aposetolo o Paulo e faapea: “Ia taitoatasi ma foaʻi e pei ona filifili i lona loto; aua ma le tigā, aua foʻi ma le faatauanauina; auā e alofa le Atua i lē ua foaʻi ma le loto malie.”—2 Korinito 9:7.

E tusa ai ma le Tusi Paia e leai se mea e sesē ai le faailoaina o lē na foaʻi atu se meaalofa e ala i le tusia o se tusi faatasi ai ma le meaalofa. Peitaʻi, i nisi atunuu, o se aganuu le faailoaina o lē na foaʻi atu le meaalofa iā i latou uma o loo auai. O lenei aganuu e ono oo atu ai i ni faafitauli. Atonu e lē mananaʻo i latou na foaʻia atu meaalofa ina ia faailoa atu po o ai na auina atu ia meaalofa ina ia ʻalofia ai le soona uaʻi mai iā i latou. O loo gaoioi na tagata e tusa ai ma le mataupu silisili o loo i le Mataio 6:3, lea ua fetalai mai Iesu: “A e avatu ni mea alofa, aua neʻi iloa e lou lima tauagavale le mea ua faia e lou lima taumatau.” Atonu e manatu nisi o le foaʻiina o meaalofa o se mataupu lea a le tagata lava ia ma e tatau ona avea o se mea faalilolilo i le va o lē o foaʻi atu ma lē o le a mauaina. Ae lē gata i lenā, o le faailoaina atu o meaalofa a tagata iā i latou o loo auai e ono iʻu atu ai i le faatusatusaina o meaalofa ma “mitamita vale” ai. (Kalatia 5:26) E mautinoa e mananaʻo Kerisiano e ʻalofia le iai i se tasi o le lagona māsiasi e ala i le faailoa atu i le lautele o suafa o i latou na foaʻi atu.—1 Peteru 3:8.

Ioe, o le gaoioi e ōgatusa ma mataupu silisili a le Tusi Paia, o le a tumau ai ona avea le foaʻi atu o meaalofa o se mea e fiafia ai.—Galuega 20:35.