O Tapulaa a Ai e Mafai Ona e Faatuatuaina?

Sa fia iloa e se tagata asiasi atu mo le taimi muamua i Aferika, e faatatau i le vaaiga i se tamāloa o loo tū faasasaʻo i autafa o le auala. Na ia mātauina e faapea, o nai minute uma lava, e seesee mālie ai vae o le tamāloa ma sōsō lemu atu ai i le tasi itu a o tū faasasaʻo pea. Na faatoʻā iloa mulimuli ane e le tagata asiasi le māfuaaga na sōsō ai faapena le tamāloa. O le mea moni, na ia taumafai e faagatusa ma le ata o le pou telekarafi. Sa alualu mālie le ata o le pou, a o suia le tulaga o le lā i le aoauli.

E PEI lava o lena ata ua lafoia e le lā, o loo faapena foʻi ona femoumouaʻi ma fesuisuiaʻi pea mataupu ma tapulaa faaletagata. I le eseesega, o Ieova le Atua, “le Tamā o malamalama,” e lē suia lava. Na tusi mai le soo o Iakopo e faapea: “E le o ia te ia se mea faaletumau, po o sina liliu itiiti.” (Iakopo 1:17) Na faamauina e le perofeta Eperu o Malaki folafolaga a le Atua lava ia e faapea: “Auā o aʻu o Ieova, ou te le liliu.” (Malaki 3:6) Na fetalai atu le Atua i le nuu o Isaraelu i aso o Isaia e faapea: “E oo ina e toeaina, o aʻu lava o ia, e oo foi ina ulusina, o aʻu lava ou te tauave ia te oe; o aʻu na ou faia.” (Isaia 46:4) O lea, e lē avea le faagasologa o le taimi ma mea e suia ai lo tatou talitonuina o folafolaga a Lē Silisili Ese.

 Se Lesona Mai le Tulafono

E pei lava ona faamoemoeina ma e lē masuia folafolaga a Ieova, e faapena foʻi ana tapulaa o mea e saʻo ma mea e sesē. Pe e te faatuatuaina ea se tagata faioloa e na te faaaogāina ni fua se lua, ae e na o le tasi e saʻo lelei? E mautinoa lava e leai. E faapena foʻi la, “o fua faatāutau faaaimago e inosia ia e Ieova; a o le maa e fua aʻi e atoatoa, o lona lea fiafia.” (Faataoto 11:1; 20:10) I le tulafono na ia tuuina atu i tagata Isaraelu, na faaaofia ai e Ieova le poloaʻiga lenei: “Aua tou te faia se mea le tonu i le faamasinoga, i le fua faaloloa, po o le fua faatautau, po o le fua faaofuofu. Ia ia te outou le fua faatautau ua tatau, o maa e tatau, o le efa e tatau, ma le sinu e tatau; o aʻu o Ieova lo outou Atua, na ou au mai ia te outou nai le nuu o Aikupito.”— Levitiko 19:35, 36.

O le usitaia o lena poloaʻiga na mauaina ai e tagata Isaraelu le finagalo malie o le Atua faatasi ai ma le tele o faamanuiaga faaletino. E faapena foʻi i le faamaoni atu i tapulaa lē masuia a Ieova, e lē gata i fua faatautau ma fua faaloloa ae i vala uma o le olaga, e iʻu ai i faamanuiaga mo le tagata tapuaʻi e na te faatuatuaina o ia. Na folafola e le Atua e faapea: “O aʻu o Ieova, o lou Atua, o loo aʻoaʻo ia te oe i mea e aoga, o loo taʻitaʻiina oe i le ala e te ui ai.”—Isaia 48:17.

Aiseā ua Paʻū ai Tapulaa i Aso Nei?

Ua taʻu mai e le Tusi Paia le māfuaaga mo le paʻū o tapulaa i aso nei. Ua faamatalaina e le tusi mulimuli o le Tusi Paia, o Faaaliga, se taua i le lagi, o lona taunuuga ua aafia ai tagata uma seʻia oo mai i aso nei. Na tusi mai le aposetolo o Ioane e faapea: “Ua tau foi le taua i le lagi; o Mikaele ma ana agelu ua latou tau ma le tarako, ua ʻau foi le tarako ma ana agelu e tau ai le taua, a ua latou le manumalo, e le toe maua foi i le lagi se mea latou te nonofo ai. Ua lafo foi le tarako tele, o le gata tuai lea, ua igoa i le tiapolo, i le ma Satani, o le faasese i le lalolagi uma; ua lafo ifo i le lalolagi, ua lafo foi ana agelu faatasi ma ia.”—Faaaliga 12:7-9.

O le ā le aafiaga tuusaʻo o lena taua? Na faaauau le faamatalaga a Ioane e faapea: “O le mea lea ia outou olioli ai, le lagi e atoa ma e ua nonofo ai! Oi talofa ia te oulua le fanua ma le sami, aua ua alu ifo ia te oulua le tiapolo ua lotoa tele, aua ua na iloa ua saasaa ona po.”—Faaaliga 12:12, LF.

Na oo mai le ‘oi i le fanua’ ina ua pā le Taua Muamua a le Lalolagi i le 1914, ma aumaia ai le iʻuga i se vaitaimi o tapulaa ia sa matuā ese lava mai tapulaa o loo iai i aso nei. Na faaalia e le tusitala o talafaasolopito o Barbara Tuchman e faapea: “O le Taua Tele i le 1914-1918 na suia ai le tulaga o mea, ua pei ai o se tuaoi ua faaesea mai ai lena taimi mai o tatou aso. O le faaumatiaina o le tele o ola lea atonu na ono aogā i tausaga mulimuli ane, le faaleagaina o talitonuga, le suia o manatu, ma manuʻa ua lē matogafitia o faamoemoega lē taulau, na faatupu moni aʻe ai se eseesega tele i amioga ma mafaufauga i le vā o tagata na soifua a o leʻi pā le Taua Tele, ma i latou ina ua mavae le Taua.” Ua ioeina e le isi tusitala o talafaasolopito o Eric Hobsbawm e faapea: “Talu mai le 1914, ua matuā iloga le iai o se paʻū maulalo tau tapulaa mai i le tulaga sa  manatu e masani ai ia atunuu ua lelei le latou tamaoaiga . . . E lē faigofie ona faavasega i le mafaufau le tele, ma le vave, o le toe foʻi atu i le tulaga, lea e ono taʻua e o tatou tuaa o le senituri lona sefuluiva, o tulaga faanuupō.”

I lana tusi o le Humanity—A Moral History of the Twentieth Century, na faaalia ai e le tusitala o Jonathan Glover e faapea: “O se tasi o vala o o tatou aso, o le mou atu lea o tulafono i amioga tatau.” E ui lava ina ia lē talitonuina le iai o se tulafono i amioga tatau mai i se puna e ese mai le tagata ona o le fai ifo o lotu i atunuu i Sisifo, ae sa ia lapataʻi mai e faapea: “O i tatou e lē talitonu i le tulafono o amioga mamā e tusa ai ma lotu, e tatau lava ona popole ona o loo mou atu.”

O le mou atu o le tulaga faatuatuaina i aso nei—pe i tulaga faapisinisi, faapolotiki, po o lotu, e oo lava foʻi i faiā faaletagata faapea ai ma faiā faaleaiga—faapea ma ona iʻuga mataʻutia, o ni vaega ia o faufauga leaga a le Tiapolo ina ia aumaia ai puapuaga i ē o nonofo i le lalolagi. Ua matuā tinoū Satani e tauina lana taua seʻia faaumaina ma faafanoina ai faatasi ma ia i latou uma o ē e taumafai e ola i tapulaa a le Atua.—Faaaliga 12:17.

Po o iai ea se auala e sao mai ai, se vaifofō i le tele o le lē maufaatuatuaina ua iai nei? Ua tali mai le aposetolo o Peteru e faapea: “A e faatalitali i tatou i le lagi fou ma le lalolagi fou, pei o lana [le Atua] na folafola mai, e mau ai le amiotonu.” (2 Peteru 3:13) E mafai ona tatou faatuatuaina lena folafolaga ona e lē gata e i le Atua le malosi e faataunuuina ai ana fuafuaga, ae na te faamaonia foʻi lona faataunuuina. E tusa ai ma so o se ‘upu e alu atu ai lona fofoga’ ua folafola e Ieova e faapea: “E le foi mai fua ia te au; a e peitai e faia le mea ou te loto i ai, e manuia foi i le mea ou te auina atu ai.” O se folafolaga e maufaatuatuaina moni!—Isaia 55:11; Faaaliga 21:4, 5.

Ola i Tapulaa a le Atua

A o iai i se lalolagi e fesuisuiaʻi ma le paʻū o tapulaa, o loo taumafai Molimau a Ieova e ola i tapulaa tau amio lea o loo ofoina mai e le Tusi Paia. O le iʻuga o le faia faapea, ua ese ai i latou mai le toʻatele o tagata, ma ua masani ona tosina i ai le uaʻi atu—ma le ʻinoʻino—o isi.

I se tauaofiaga a Molimau a Ieova na faia i Lonetona, na fesiligia ai se sui e se tusitala a le TV, po o ni Kerisiano moni ia Molimau a Ieova. Na ia tali ane e faapea: “Ioe, o le tulaga moni lena, ona o Iesu o lo matou faaaʻoaʻo. O loo tele le manatu faapito i le lalolagi, ae matou te tepa taulaʻi atu i a Iesu Keriso o le ala, o le upu moni, ma le ola. E matou te talitonu o ia o le Alo o le Atua, ae e lē o se vaega o le Tolutasi, o lea o lo matou talitonuga i le Tusi Paia, e ese mai i lotu masani.”

Ina ua faasalalauina le faatalanoaga i le televise a le BBC, na faaiʻu e le tusitala o le televise le polokalame i le faapea mai: “Ua tele mea ua ou aʻoaʻoina e faatatau i le māfuaaga e tuʻituʻi ai Molimau a Ieova i lo matou faitotoʻa. Ou te lē manatua foʻi le vaaia muamua o ni tagata e toʻa 25,000 o matuā laʻei lelei ma amio lelei uma i se nofoaga e tasi i le taimi lava e tasi.” Maʻeu se taʻutinoga lea e sili ona lelei mai i se tagata e lē o se Molimau a Ieova o loo mātauina le atamai o le ola e tusa o tapulaa lē masuia a le Atua!

A o tetee nisi i le tulaga o le ola e ala i tapulaa e latou te leʻi faia, e matou te fautuaina oe e tilofaʻia lau Tusi Paia ma aʻoaʻoina po o ā moni lava tapulaa a le Atua. Ae aua le faamalieina i se saʻiliʻiliga papaʻu. Ia mulimuli atu i le fautuaga a le aposetolo o Paulo: “Aua foi tou te amio faatasi ma lenei lalolagi, a e peitai ia liliuina i le toe fuataiina o outou loto, ina ia outou suesue pe se a le finagalo o le Atua, o mea ua lelei, ma le mālie, ma le atoatoa.” (Roma 12:2) Ia asiasi atu i le Maota o le Malo i lou vaipanoa, ma ia taumafai e iloa lelei Molimau iinā. O le a e iloaina ai o i latou o ni tagata e pei foʻi o isi o loo tuu atu lo latou faatuatuaga i folafolaga a le Tusi Paia, ma faaalia lo latou faatuatuaina o le Atua e ala i le taumafai e ola i ana tapulaa.

O le pipii atu i tapulaa lē masuia ma le maufaatuatuaina a le Atua i lou lava olaga, o le a faamautinoa ai lou mauaina o faamanuiaga. Ia utagia le valaaulia a le Atua: “E! ana uai mai ou taliga i aʻu poloaiga, po ua tusa ma se vaitafe lou manuia; ma lau amiotonu, e tusa lea ma peau o le sami.”—Isaia 48:18.

[Ata i le itulau 5]

I aso nei, o loo mou atu le faatuatuaina i tulaga faapisinisi, faapolotiki, lotu, ma faiā faaleaiga