SA IAI luʻi na feagai mai Kaio ma isi Kerisiano i le faaiʻuga o le uluaʻi senituri. Sa taumafai ē na faasalalauina aʻoaʻoga sesē ina ia faavaivaia ma faatupu fevaevaeaʻiga i faapotopotoga. (1 Ioa. 2:18, 19; 2 Ioa. 7) Sa faasalalau e Tioterifi “tala taufaaleaga” e faatatau i le aposetolo o Ioane ma isi. Na musu Tioterifi e faaalia le agaga talimālō i Kerisiano na femalagaaʻi, ma na taumafai e uunaʻia isi ia mulimuli i mea na ia faia. (3 Ioa. 9, 10) O le tulaga lenā na tupu ina ua tusi atu Ioane iā Kaio. Pe tusa o le 98 T.A. na tusia ai e le aposetolo lenei tusi ua taʻua “O le Tusi Lona Tolu a Ioane,” o loo iai i Tusitusiga Paia Eleni.

Sa faaauau ona auauna ma le faamaoni Kaio iā Ieova e ui lava i luʻi na ia fesagaʻia. Sa faapefea ona faaalia e Kaio le faamaoni? Aiseā e tatou te mananaʻo ai e mulimuli i lana faaaʻoaʻoga? E faapefea ona fesoasoani le tusi a Ioane iā i tatou ina ia faia faapea?

Ua taʻua e le tusitala o le Tusi Lona Tolu a Ioane ia lava “o le toeaina.” Na lava lenā faaupuga e iloa ai e lona atalii pele faaleagaga o Kaio, o ia o le aposetolo o Ioane. Na taʻua ma le agalelei e Ioane, o Kaio o le “pele, o lē ou te alofa faamaoni i ai.” Sa sosoo ai ma le faapea atu o Ioane talosia o loo lelei le soifua mālōlōina o Kaio e pei foʻi o lona tulaga faaleagaga. Maʻeu ni faalogona māfana ma ni upu faamālō matagofie!—3 Ioa. 1, 2, 4.

E lē o taʻuina saʻo mai i le tusi, ae atonu sa avea Kaio ma se ovasia i le faapotopotoga. Sa faamālō atu Ioane iā Kaio i lona talimālō i uso e ui lava e leʻi masani i na uso. Na manatu Ioane o le faamaoniga lea o le faamaoni o Kaio, auā e matilatila lava auauna a le Atua i le faaalia o le agaga talimālō.—Kene. 18:1-8; 1 Timo. 3:2; 3 Ioa. 5.

O upu a Ioane e talisapaia ai le agaga talimālō o Kaio i uso, e taʻu mai ai sa masani ona femalagaaʻi Kerisiano mai i le vaipanoa na nofo ai Ioane agaʻi i faapotopotoga. E mautinoa foʻi sa faamatala atu e nei Kerisiano femalagaaʻi iā Ioane mea na latou fesagaʻia. Atonu o le auala lea na iloa ai e Ioane tala e faatatau i nei faapotopotoga.

E mautinoa na mananaʻo Kerisiano na femalagaaʻi ina ia api i fale o isi Kerisiano. Sa lē lelei le talaaga ma le auaunaga i faletalimālō, ma sa taatele ai amioga lē mamā. O lea pe a talafeagai, o ē atamamai na femalagaaʻi sa api i fale o a latou uō, ma  o Kerisiano na femalagaaʻi sa api i fale o isi Kerisiano.

Na faalaeiau e Ioane Kaio ia toe faaalia foʻi le agaga talimālō, auā na talosaga atu le aposetolo iā Kaio “ia tapena la latou malaga e tusa ai ma le finagalo o le Atua.” O le uiga o lenei manatu, e ao ona tuuina atu mea uma e manaʻomia e i latou e femalagaaʻi, mo le isi vaega e sosoo ai o la latou faigāmalaga seʻia oo ina taunuu. E manino mai sa faia faapea e Kaio i isi ana mālō na muamua atu, auā na faamatala atu e na mālō iā Ioane le alofa ma le faamaoni o Kaio.—3 Ioa. 3, 6.

O nei mālō atonu o ni misionare, o nisi na auina atu e Ioane, po o ni ovasia femalagaaʻi. Po o ai lava i latou, sa latou femalagaaʻi ona o le tala lelei. Na faapea mai Ioane: “Auā na latou ō atu ona o le suafa o le Atua.” (3 Ioa. 7) Ioe, sa avea nei uso ma vaega o le faapotopotoga Kerisiano, ma na tatau ona talia ma le māfana i latou. O le pogai lea na tusi ai Ioane: ʻE tatau ona tatou talimālō i tagata faapena, ina ia tatou galulue faatasi i le upu moni.’—3 Ioa. 8.

E leʻi tau ina tusi atu Ioane e faafetai atu iā Kaio. Sa manaʻo foʻi Ioane e fesoasoani atu iā Kaio i se faafitauli tugā. E leʻi manaʻo Tioterifi, o se sui o le faapotopotoga Kerisiano, e faaalia le agaga talimālō i Kerisiano na femalagaaʻi. Sa oo lava foʻi ina taumafai e taofia isi mai i le faaalia o le agaga talimālō.—3 Ioa. 9, 10.

E mautinoa e leʻi mananaʻo Kerisiano faamaoni e api iā Tioterifi e tusa lava pe na mafai. Sa fia muamua o ia i le faapotopotoga, e na te leʻi talia ma le faaaloalo se mea mai iā Ioane, ma sa ia faasalalau tala taufaaleaga e faatatau i le aposetolo ma isi. E ui lava e leʻi taʻua e Ioane Tioterifi o se aʻoaʻo pepelo, peitaʻi na teena e Tioterifi le pule a le aposetolo. Na fesiligia le faamaoni o Tioterifi ona o lona fia maua o se tulaga maualuga ma ona uiga lē lelei. O lenei tala iā Tioterifi, e taʻu mai ai e ono taumafai ē e fia mata muamua ma faamaualuluga, ina ia faapogaia le agaga fevaevaeaʻi i totonu o se faapotopotoga. O le pogai lea na faapea atu ai Ioane iā Kaio faapea foʻi i tatou, ia aua neʻi avea i tatou ma ʻfaaaʻoaʻo i mea leaga.’—3 Ioa. 11.

I le lē pei o Tioterifi, na taʻua e Ioane se Kerisiano e igoa iā Temetiu, o sē na avea ma faaaʻoaʻoga lelei. Na tusi Ioane: “Na molimau i latou uma e faatatau iā Temetiu . . . O loo matou molimau foʻi, ma ua outou iloa e moni la matou molimau.” (3 Ioa. 12) Atonu na manaʻomia e Temetiu le fesoasoani a Kaio, ma o le Tusi Lona Tolu a Ioane atonu o le tusi lea a le aposetolo na faailoa atu ai Temetiu iā Kaio. Atonu o Temetiu na alu e ave le tusi iā Kaio. I le avea ai ma sē na auina atu e Ioane pe atonu foʻi o se ovasia femalagaaʻi, sa faamalamalama atili atu e Temetiu mea na tusia e Ioane i lana tusi.

Aiseā na faalaeiau ai e Ioane Kaio ia faaauau ona faaalia le agaga talimālō, ae o le uiga lenā o loo ia faaalia? Pe na iloa e Ioane e manaʻomia ona faamalosia le lototele o Kaio? Pe na popole le aposetolo ina neʻi musu Kaio, ona na taumafai Tioterifi e faateʻa ese mai i le faapotopotoga Kerisiano na faaalia le agaga talimālō? Po o le ā lava le māfuaaga, sa faamautinoa atu e Ioane iā Kaio: “O lē e faia mea lelei e mai i le Atua lava ia.” (3 Ioa. 11) O se māfuaaga sili lenā e faia ai mea lelei ma ia faaauau ona faia faapea.

Pe na uunaʻia ai Kaio i le tusi a Ioane ia faaauau ona faaalia le agaga talimālō? Ioe, auā na faamauina le Tusi Lona Tolu a Ioane  i le Tusi Paia ina ia faalaeiau ai isi ia ʻavea ma faaaʻoaʻo o mea lelei.’

E pau na o faamatalaga ua tatou iloa e faatatau i lo tatou uso pele o Kaio. Peitaʻi, o nei faamatalaga pupuu e faatatau i lona olaga e mafai ona tatou aʻoaʻoina ai ni lesona aogā.

Muamua, o le toʻatele o i tatou na aʻoaʻoina le poto saʻo o le upu moni, ona na lotomalilie ē faamaoni e faimalaga mai ina ia faailoa mai na upu moni. E moni e lē o tagata uma i le faapotopotoga Kerisiano i aso nei o loo femalagaaʻi i vaipanoa mamao ina ia talaʻi atu le tala lelei. Peitaʻi, i le pei o Kaio, e iai auala e mafai ona tatou lagolagoina ma faalaeiau ai i latou o loo femalagaaʻi, e pei o ovasia o matagaluega ma a latou avā. Atonu foʻi e mafai ona tatou avatu se fesoasoani talafeagai i uso ma tuafāfine ua siitia i isi vaipanoa po o isi atunuu, ina ia auauna i le mea o loo tele ai le manaʻoga mo ni tagata talaʻi o le Malo. O lea, seʻi faaauau ona tatou “faaalia le agaga talimālō.”—Roma 12:13; 1 Timo. 5:9, 10.

Lua, e lē tatau ona faateʻia i tatou i se taimi e tulaʻi mai ai ni tulaga e luʻia ai le pule i totonu o le faapotopotoga i aso nei. Sa luʻia le pule a Ioane faapea foʻi le aposetolo o Paulo. (2 Kori. 10:7-12; 12:11-13) O le ā la le auala e tatau ona tatou tali atu ai pe a feagai ma ni tulaga faapea mai i nisi i le faapotopotoga? Na fautua atu Paulo iā Timoteo: “E lē manaʻomia ona faamisa se pologa a le Alii, ae e tatau ona agamalu i tagata uma, ia agavaa e aʻoaʻo atu, ia pulea lelei o ia lava i tulaga leaga, ia faatonu atu ma le agamalu iā i latou o ē e tetee.” Pe a tumau ona tatou agamalu e tusa lava pe e faatigā mai nisi, atonu o le a faasolo ina suia ai uiga o nisi na faitio mai. O le iʻuga, “atonu e tuu atu e le Atua le avanoa ina ia salamō ai i latou, ma iʻu ai ina maua le poto saʻo i le upu moni.”—2 Timo. 2:24, 25.

Tolu, e ao ona faamālō atu ma le agalelei i Kerisiano o loo auauna ma le faamaoni iā Ieova e ui lava i teteega. E mautinoa na faalaeiau e le aposetolo o Ioane Kaio ma faamautinoa atu i ai o loo ia faia le mea saʻo. E tatau foʻi i toeaina i aso nei ona mulimuli i le faaaʻoaʻoga a Ioane, e ala i le faalaeiau i uso ma tuafāfine ina neʻi faavaivai i latou.—Isa. 40:31; 1 Tesa. 5:11.

O le tusi a le aposetolo o Ioane iā Kaio, o le tusi aupito i puupuu lea i le Tusi Paia auā e na o le 219 ona upu i le gagana Eleni. Peitaʻi, e mautinoa ua avea o se tusi e matuā tāua i Kerisiano i aso nei.