Isaia 40:1-31
40 “Inā outou faamāfanafana atu ia, inā faamāfanafana atu ia i loʻu nuu,” ua fetalai mai ai lo outou Atua.+
2 “Ia tautatala atu i le loto o* Ierusalema,Ma faailoa atu iā te ia ua māeʻa le taimi sa faamalosia e faigaluega ai o ia,Ua uma fo‘i ona totogi lana agasala.+
Ua ia maua mai i le aao o Ieova le faasalaga atoa mo ana agasala uma.”+
3 O loo alaga se tasi i le toafa:
“Ia outou faalaulelei* le ala o Ieova!+
Ia faasaʻosaʻo le ala tele+ e ui atu i le toafa mo lo tatou Atua.+
4 Ia faatumuina vanu uma,Ma ia faamaulaloina mauga ma aʻega uma.
Ia faalaulelei laueleele lauleaga,Ma ia fai laueleele gaoā ma fanua laugatasi.*+
5 O le a faaalia le mamalu o Ieova,+Ma e vāai faatasi i ai tagata uma,+Auā ua fetalai mai ai le fofoga o Ieova.”
6 Faalogo! O loo faapea mai se tasi: “Ia valaau atu!”
Ona faapea mai lea o le isi: “O le ā le mea ou te valaau atu ai?”
“O tagata uma, e pei o le mutia muʻamuʻa.
Ma o lo latou alofa faamaoni e pei o fuga o laau o le fanua.+
7 Ua mago le mutia muʻamuʻa,Ua mamae fuga o laau,+Auā ua agi atu i ai le mānava a Ieova.+
E moni, o le mutia muʻamuʻa o le nuu lava lea.
8 Ua mago le mutia muʻamuʻa,Ua mamae fuga o laau,Ae o le afioga a lo tatou Atua e tumau lea e faavavau.”+
9 Ia e alu aʻe i le mauga maualuga,O oe le fafine, o lē e aumaia le tala lelei i Siona.+
Ia e matuā leotele atu,O oe le fafine e aumaia le tala lelei i Ierusalema.
Ia e leotele ma aua e te fefe.
Ia faalauiloa atu i aai o Iuta: “O lo outou Atua lenei.”+
10 Faauta! O le a afio mai le Alii Pule Silisili Ese o Ieova ma le malosi,Ma e pule lona aao mo ia.+
Faauta! Ua iā te ia lana taui,Ma ua i ona luma le totogi na te totogiina atu.+
11 E na te tausia* lana lafu mamoe e pei o se leoleo mamoe.+
E na te aoaoina tamaʻi mamoe i lona aao,Ma tauave mamoe i lona fatafata.
E na te taʻitaʻiina ma le alofa mamoe o loo faasusu a latou fanau.+
12 O ai ua ia fuaina le vai i le faaofuofu o lona lima,+Ma fuaina le lagi i le aga o lona lima?*
O ai ua ia aoaoina i totonu o se fua le pefu o le eleele+Pe fuatia mauga i le fuaMa fua aʻega i le fua faatautau?
13 O ai ea ua fuatia* le agaga o Ieova,Ma o ai e mafai ona avea ma ana faufautua e faatonuina o ia?+
14 O ai ua la soālaupule faatasi ina ia mafai ona malamalama ai o ia,Po o ai foʻi e aʻoaʻo atu iā te ia i le ala o le faamasinotonu,Pe e aʻoaʻo iā te ia le poto,Pe e faasino atu iā te ia le ala i le malamalama?+
15 Faauta! Ua pei atunuu o sina vai e sisina ifo mai i le pakete,Ma ua manatu i ai e pei i latou o le pefu i luga o fua faatautau.+
Ua ia siitia foʻi motu e pei o ni pefu ninii.
16 E oo lava i laau o Lepanona, e lē lava e faamumū ai pea le afi,*Ma e lē lava ona manu o le vao e fai ai le taulaga mū.
17 Ua pei atunuu uma o se meanoa i lana silafaga;+Ua matuā leai lava, ma e lē aogā i latou i lona manatu.+
18 O ai tou te faatusaina i ai le Atua?+
Po o le ā foʻi se faatusa tou te faatusa i ai o ia?+
19 E gaosia e le tufuga se faatusa,*E ufiufi foʻi i le auro e le tagata fai ʻapamemea,+Ma e na te faia filifili siliva e teuteuina ai.
20 E filifilia e se tasi se laau e fai ai lana taulaga,+O se laau e lē pala.
E na te saʻilia se tufuga atamaiIna ia saunia se faatusa ua tā e lē maluelue.+
21 Pe e tou te leʻi iloa ea?
Pe e tou te leʻi faalogo foʻi ea?
Pe e leʻi taʻuina atu ea iā te outou mai i le amataga?
Pe e tou te leʻi malamalama ea talu ona faavaeina le lalolagi?+
22 Ua iai Lē o loo afio i luga o le faataaliʻoliʻo o le lalolagi,+Ma o ē o loo nonofo ai ua pei o ni sē.
O loo ia fofola le lagi e pei o se ʻie valavala,E na te faamafolafola foʻi e pei o le faleʻie e nonofo ai.+
23 E na te aveesea alii sili,Ma faia faamasino* o le lalolagi e pei o meanoa.
24 E lē totōina i latou,E lē lūlūina lava i latou,E lē mauaa foʻi o latou pogati i le eleele.Pe afai e feula atu i ai, ona mamago ai lea o i latou,Ma e pei i latou o tagutugutu o saito e lelea ese i le matagi malosi.+
25 “O ai tou te faatusaina i ai aʻu ina ia ma tutusa?” ua fetalai mai ai Lē e Paia.
26 “Ia outou tetepa aʻe i le lagi ma vāai.
O ai ua na faia ia mea?+
O Lē o loo taʻitaʻia nei mea e pei o se ʻautau e tusa ma lo latou faitau aofaʻi;E na te valaau i latou uma i o latou igoa.+
Ona o le tele ma le mataʻutia o lona malosi, ma le matuā tele o lona mana,+E leai se mea o nei mea ua leiloa.
27 Iakopo e, aiseā ua e faapea ane ai, ma Isaraelu e, aiseā ua e faapea atu ai,‘Ua lilo loʻu ala mai iā Ieova,Ma e lē o faia e le Atua se faamasinogatonu mo aʻu’?+
28 Pe e te leʻi iloa pe faalogo foʻi?
O Ieova o Lē na foafoaina tuluʻiga uma o le lalolagi, o le Atua e soifua e faavavau.+
E lē vaivai pe lē lavā foʻi o ia.+
E lē masuʻesuʻeina* lona poto.+
29 E na te avatu le malosi i lē ua vaivaiMa faaatoatoaina le malosi o lē ua leai sona malosi.+
30 E vaivai ma lē lavavā tama talavou,Ma e tautevateva ma paʻuʻū tauleleʻa,
31 A o ē e faamoemoe iā Ieova o le a toe malolosi i latou.
E latou te ō aʻe e pei ua iā i latou ni apaʻau o aeto.+
E latou te taufetuli ae e lē vaivai;E latou te savavali foʻi ae e lē taitai lē lavavā ai.”+
Faamatalaga Pito i Lalo
^ Po o le “Ia faamāfanafana iā.”
^ Po o le “saunia.”
^ E faasino atu i le fanua laugatasi i le pito i lalo o se vanu.
^ Po o le “leoleoina.”
^ O le vā lea mai i le tumutumu o le limamatua agaʻi i le tumutumu o le limatamatama pe afai e tatala le alofilima. Tagaʻi i le Faa. E14.
^ Pe atonu “ua malamalama i.”
^ Po o le “e lē lava ai ni fafie.”
^ Po o “se faatagata ‘apamemea.”
^ Po o “taʻitaʻi.”
^ Po o le “lē mafai ona fuatia.”
