O LE ā le mea ua faamatalaina e “aupito i sili ona lavelave i le lalolagi aoao e tatou te lē o malamalama atoatoa i ai,” ae e pe ā ma le tolu pauna (1.4 kilokalama) lona mamafa? O le faiʻai ofoofogia o le tagata. O le tele e tatou te suʻesuʻeina ai, o le a atili ai ona tatou talisapaia galuega “ofoofogia” a Ieova. (Sala. 139:14) Seʻi o tatou iloiloina se tasi o tomai o loo iai i le faiʻai.

O le ā lenei tomai? Ua faamatalaina e se tasi o lomifefiloi e faapea, “o le tomai e faata ai i lou mafaufau ni mea fou, ni mea e olioli ai, po o ni mea foʻi e te leʻi faia muamua.” E tusa ai ma lenā faamatalaga, pe e lē moni e tele taimi o loo e faaaogāina ai lenā tomai? O se faataʻitaʻiga, po o ua e faitau pe faalogo i se tala o se nofoaga e te leʻi oo i ai? Pe na taofia ai oe mai le faaata o lenā nofoaga i lou mafaufau? O le mea moni, o so o se taimi lava e tatou te mafaufau ai i se mea tatou te leʻi vāai, faalogo, tofo, paʻi, pe sogisogi i ai, o le taimi lenā ua faaaogā ai le tomai o le faaata o mea i le mafaufau.

Ua fesoasoani mai le Tusi Paia iā i tatou ina ia iloa na faia le tagata i le faatusa o le Atua. (Kene. 1:26, 27) Pe e lē taʻuina mai ai la iā i tatou e iai foʻi iā Ieova lenā tomai? Talu ai na ia foafoaina i tatou ma tuu i ai lenei tomai, e na te faatalitalia foʻi la i tatou e faaaogā ina ia malamalama ai i lona finagalo. (Fai. 3:11) E faapefea ona tatou faaaogā lelei le tomai e faaata ai mea i le mafaufau? E faapefea ona ʻalofia le faaaogā sesē o lenā tomai?

(1) Faaata o mea i le mafaufau i le taimi sesē po o le faaata i le mafaufau o mea sesē

E iai faamaoniga e iloa ai e iai aogā o le faaata o mea i le mafaufau. Peitaʻi, ua fesoasoani mai le Failauga 3:1 ina ia malamalama ai e ʻiai le taimi mo mea uma,’ o lona uiga e mafai ona tatou faia se gaoioiga i se taimi sesē. O se faataʻitaʻiga, pe afai e faataga o tatou mafaufau e tafatafao solo i le taimi o sauniga, po o a tatou lava suʻesuʻega o le Tusi Paia, po o avea la le faaata o mea i o tatou mafaufau o se fesoasoani, po ua fai ma faalavelave? Na lapataʻi mai Iesu i le mataʻutia o le faataga o o tatou mafaufau e taulaʻi i mafaufauga sesē, e pei o amioga lē mamā. (Mata. 5:28) O nisi o mea e tatou te mafaufau ai e mafai ona faatigā ai le finagalo o Ieova. O mafaufauga lē mamā e iʻu ai i le faia o amioga lē mama. Ia maumauaʻi e aua neʻi faatagaina ou mafaufauga, e faaleagaina ai la oulua faiā ma Ieova.

(2) Mafaufau o le saogalemu moni e maua mai i ʻoa faaletino.

E aogā ma e manaʻomia ʻoa faaletino. Peitaʻi, e mautinoa e tatou te faanoanoa pe a mafaufau, o le saogalemu moni ma le fiafia e maua mai i ʻoa faaletino. Na tusi le poto o Solomona: “O le oloa tāua a lē e mauʻoa o  lona aai malosi lea, ua pei o se pā malupuipuia i lona lava manatu.” (Faata. 18:11) O se faataʻitaʻiga, ia manatu i le mea na tupu ina ua lofia le 80 pasene o Manila i Filipaina, i lologa ona o timuga mamafa iā Setema 2009. Pe na sao mai i latou e tele a latou meafaitino? Na faapea mai se tamāloa mauʻoa na leiloloa le tele o ana meafaitino, “O lenei mala na aafia ai tagata uma. Na aumaia ai foʻi faigatā ma mafatiaga i tagata mauʻoa ma tagata matitiva.” E ono faigofie ona mafaufau e maua le puipuiga ma le saogalemu moni i meafaitino. Peitaʻi, e lē moni lenā manatu.

(3) Soona popole e faatatau i mea atonu e lē tutupu.

Na fautua mai Iesu iā i tatou e aua le soona “popole.” (Mata. 6:34) O le soona popole i taimi uma e lē mālōlō ai le mafaufau. E faigofie ona alu vale ai le malosi i le popole i ni faafitauli e leʻi tutupu po o ni faafitauli atonu e lē tutupu. Ua faaalia mai e le Tusi Paia, o le soona popole e mafai ona faavaivaia ai tatou pe iʻu ai foʻi i le lotomafatia. (Faata. 12:25) Maʻeu le tāua o le faatatauina o le fautuaga a Iesu e aua le soona popole, ma taulima tau lava o faafitauli e tutupu i aso taʻitasi.

(1) Iloa mamao atu tulaga e lamatia ai ma ʻalofia.

Ua faalaeiauina i tatou e le Tusi Paia ia mafaufau muamua ma ia iai le utaga mamao. (Faata. 22:3) O le faaata o mea i le mafaufau e mafai ona tatou iloa ni āuga leaga a o leʻi faia se filifiliga. O se faataʻitaʻiga, afai ua valaaulia oe i se faatasitasiga, e faapefea ona faaaogā lenei tomai e fesoasoani iā te oe e faia ai se filifiliga atamai pe e te auai? Pe a uma ona e iloiloina vala taʻitasi e pei o i latou e valaaulia, le toʻatele o le ʻauvalaaulia, le taimi ma le nofoaga e faia ai, ona mafaufau lea: ʻO ā ni mea e ono tutupu?’ Pe e mafai ona e faaata se faatasiga lelei e ōgatusa ma mataupu silisili o le Tusi Paia? O lenei faiga, o le a fesoasoani iā te oe e faaata ai lenā faatasiga i lou mafaufau. O le faaaogāina o lenei tomai e faia ai se filifiliga saʻo, o le a fesoasoani iā te oe e ʻalofia ai lamatiaga faaleagaga.

(2) Muaʻi manatunatu i auala e taulima ai faafitauli.

O le faaata o mea i le mafaufau e aofia ai le “tomai e faafesagaʻia ma taulima ai se faafitauli.” Seʻi faapea e iai se mea lua te lē femalamalamaaʻi ai ma se tasi o le faapotopotoga. E faapefea ona e talanoa atu iā te ia ina ia faatumau le filemu? E tele vala e manaʻomia ona iloiloina. O le ā lana auala e  masani ona talanoa ai? O le ā le taimi e sili ona talafeagai e talanoa ai i le faafitauli? O ā upu ma le leo e sili ona lelei e te faaaogāina? O le taumafai e faaata i le mafaufau lenā tulaga, o le a e muaʻi manatunatu ai i auala eseese e taulima ai le faafitauli, ma filifili mai le auala e sili ona lelei e foʻia ai le faafitauli ma e taliagofie e le isi. (Faata. 15:28) O le taulimaina o faafitauli i se auala faapena, o le a tausia ai pea le filemu i le faapotopotoga. O le auala saʻo lenā e faaaogā ai lenei tomai.

(3) Faaʻoaina lau faitauga ma suʻesuʻega o le Tusi Paia.

E tāua le faitauina o le Tusi Paia i aso taʻitasi. Peitaʻi, e iai se isi mea e manaʻomia nai lo o le tau ina faitau. E manaʻomia ona tatou iloa lesona aogā o loo iai i le Tusi Paia ma taumafai e faatatau i o tatou olaga. E tatau ona faatuputele lo tatou talisapaia o ala o Ieova e ala i le faitauina o le Tusi Paia. O le faaata o mea i le mafaufau, o le a fesoasoani iā i tatou e faia ai faapea. E faapefea? Seʻi manatu i le tusi Faaaʻoaʻo i lo Latou Faatuatua. O le faitauina o tala o loo i lenei tusi, o le a faagaee ai o tatou mafaufauga e ala i le faaata o le siʻomaga ma le talaaga o tagata taʻitoʻatasi o loo taʻua i le Tusi Paia. O le a mafai ai ona tatou iloa atu mea na latou vaaia, lagona leo, sosogi le manogi ma malamalama i faalogona o i latou o loo aofia ai. O le iʻuga o le a tatou aʻoaʻoina mai ai ni lesona aogā, ma manatu faalaeiau o loo i nei tala o le Tusi Paia, lea na tatou mafaufau ua tatou malamalama lelei i ai. O le faaaogāina o lenei tomai i se auala faapena, o le a faaʻoaina ai a tatou faitauga ma suʻesuʻega o le Tusi Paia.

(4) Atiaʻe ma faaalia le tigā alofa.

O le tigā alofa o se uiga matagofie ma e faamatalaina e faapea, o lou lagonaina i lou loto o faalogona tigā o le isi tagata. Talu ai e faaalia e Ieova ma Iesu lenei uiga, tatou te taumafai malosi ai e faaaʻoaʻo iā i laʻua. (Eso. 3:7; Sala. 72:13) E faapefea ona tatou atiaʻe lenei uiga? O se tasi o auala sili e atiaʻe ai lenei uiga o le faaata lea o mea i o tatou mafaufau. Atonu e leʻi tupu iā i tatou tulaga o loo fetaiaʻi ma o tatou uso ma tuafāfine. O lea, ia fesili ifo: ʻO ā ni oʻu faalogona pe afai o aʻu lea e tupu ai? O ā mea ou te manaʻomia?’ O le faaata i o tatou mafaufau o tali o fesili nei, o le a fesoasoani e tatou te faaalia ai le tigā alofa. O le mea moni, e aogā tele le tigā alofa i vala uma o lo tatou olaga faa-Kerisiano, e aofia ai la tatou faiva ma le faiā ma isi Kerisiano.

(5) Faaata le olaga o le a iai i le lalolagi fou.

E tele faamatalaga auʻiliʻili o loo i le Tusi Paia, ua faamatala ai le olaga i le lalolagi fou ua folafola mai e le Atua. (Isa. 35:5-7; 65:21-25; Faaa. 21:3, 4) O loo iai i a tatou lomiga le tele o ata matagofie o loo faamatala mai ai lenā olaga. Aiseā? O ata e faagaee ai o tatou mafaufauga, ma fesoasoani e iloa atu ai i tatou o loo tatou olioli i na faamanuiaga. Na foafoaina e Ieova lenei tomai, ma e na te silafia lelei le malosi o lenei tomai e faaata ai mea i o tatou mafaufau. O le faaaogāina o lenā tomai e tatou te mafaufau ai i ana folafolaga, e faamalosia ai lo tatou mautinoa o le a faataunuu, ma fesoasoani e faatumau ai lo tatou faamaoni e ui lava i luʻi o loo tatou fesagaʻia.

O le alofa o Ieova ua ia foaʻi mai ai lenei tomai ofoofogia, o le faaata o mea i le mafaufau. E fesoasoani tele e tatou te auauna ai ma le faamaoni iā te ia i aso taʻitasi. Tau ina ia tatou faaalia le loto faafetai i Lē na foaʻiina mai lenei meaalofa matagofie, e ala i le faaaogā lelei i aso taʻitasi.