LE MANATU O LE TUSI PAIA
Faatusa
E faatāua e le faitau miliona o tagata faamaoni ia faatusa, o se vaega o la latou tapuaʻiga. Ae pe o lagolagoina i le Tusi Paia lenei faiga? Pe e fiafia i ai le finagalo o le Atua?
Pe sa faatāua e tagata Iutaia faamaoni i taimi o le Tusi Paia faatusa?
“Aua neʻi e faia se tupua ua tā po o se faatusa o se mea o i le lagi i lugā, po o se mea i lalo nei i le laueleele, po o se mea i le vai i lalo o le laueleele. Aua e te ifo i ai pe auauna i ai.”—Esoto 20:4, 5.
I Tusitusiga Paia Eperu lea e tele ina taʻua o le Feagaiga Tuai, e masani ona taʻusalaina ai le faatāua o faatusa.
SE MANATU TAATELE
Ua taʻua i le New Catholic Encyclopedia, e tele faatusa a tagata Iutaia sa fesootaʻi atu i la latou tapuaʻiga, “ma sa faamamaluina, faaaloalogia ma faatāua nei faatusa.” * O se faaaʻoaʻoga, o loo taʻua i lenā lomifefiloi sa teuteuina le malumalu i Ierusalema i le tele o faatusa o fualaau ʻaina, fugālaau ma meaola sa vaneina.—1 Tupu 6:18; 7:36.
MEA E TATAU ONA E ILOA
E ese mai i faamatalaga na taʻua i le New Catholic Encyclopedia, e leʻi faatāua e tagata Iutaia faamaoni so o se faatusa po o ata na vaneina sa iai i le malumalu. E leai foʻi se vaega o le Tusi Paia o taʻua ai se tagata faatuatua o Isaraelu, na faaaogā se faatusa e tapuaʻi ai.
LE MANATU O LE TUSI PAIA
Na fetalai le Atua e ala mai i le perofeta o Isaia: “Ou te lē avatua loʻu mamalu i se tasi, e lē avatua foʻi loʻu viiga i faatusa ua tā.”—Isaia 42:8.
Pe sa faaaogā e uluaʻi Kerisiano faatusa i a latou tapuaʻiga?
“E faapefea foʻi ona feagai le malumalu o le Atua ma tupua? . . . Aua tou te toe papaʻi atu i se mea e lē mamā.”—2 Korinito 6:16, 17.
Na taʻua i le tusi History of the Christian Church: “Atonu na matuā faateʻia uluaʻi Kerisiano i le manatu e faapea, ia tuu faatusa i totonu o falesā, ma atonu na manatu i le ifo ma tatalo atu i faatusa, e tutusa lava ma le ifo i tupua.”
SE MANATU TAATELE
Ua taʻua i le New Catholic Encyclopedia: ʻE lē mafai ona fesiligia ma le tonu i aso nei le faaaogāina o faatusa i le tapuaʻiga a uluaʻi Kerisiano. O tuugamau o Kerisiano po o auala na eli maulalo ma faaaogā e fai ma fanuatanu, sa iai le tele o ata o faiga faa-Kerisiano. E oo foʻi i potu paia mo tapuaʻiga paia ma falelauasiga, sa teuteuina foʻi i ata faalelotu.’ *
MEA E TATAU ONA E ILOA
O faatusa pito i sili ona tuai na maua i nei tuugamau, o faatusa mai i tuā i le senituri lona tolu. Pe tusa lenā ma le 200 tausaga talu ona mavae le maliu o Iesu. O lea la, o le “tapuaʻiga a uluaʻi Kerisiano” lea e taʻua i le New Catholic Encyclopedia, e lē o le tapuaʻiga lea a uluaʻi Kerisiano na muamua mamao atu, lea sa faia e soo i le uluaʻi senituri ma ua faamatalaina i Tusitusiga Paia Eleni po o le Feagaiga Fou. O le iai o na faatusa i tuugamau, ua faaalia ai e oo ane i le senituri lona tolu, ua talia e i latou na faapea mai o Kerisiano le tū faapaupau o le faaaogā o faatusa, atonu ina ia faatosina mai ai tagata liulotu. *
LE MANATU O LE TUSI PAIA
“Ia sosola ese mai i le ifo i tupua.”—1 Korinito 10:14.
Pe e tatau ona faaaogā faatusa e tau ina avea o se fesoasoani e tapuaʻi atu ai?
“Ia leoleo outou mai i tupua.”—1 Ioane 5:21.
O le faatāua o faatusa o se faiga faalotu e lē o lagolagoina i le Tusi Paia. O le māfuaaga lea e lē faatāua ai e Molimau a Ieova faatusa, pe iai foʻi ni faatusa faalotu i o latou fale po o nofoaga mo tapuaʻiga.
SE MANATU TAATELE
Ua taʻua i le New Catholic Encyclopedia: “Talu ai o le tapuaʻiga e tuuina atu i se faatusa e oo atu ma gata mai i lē o loo faaata mai i le faatusa, e faapena foʻi le tapuaʻiga e avatu i se tasi, e mafai ona avatu i le faatusa o loo faaata mai ai o ia.”
MEA E TATAU ONA E ILOA
Ina ua aʻoaʻo e Iesu ona soo e tatalo, e leʻi faapea atu iā i latou ia faaaogā ni faatusa. E lē o taʻua foʻi i Tusitusiga Paia Eleni lenei faiga, o le faaaogā o se faatusa e tapuaʻi atu ai i le Atua moni.
LE MANATU O LE TUSI PAIA
“E tatau ona e tapuaʻi iā Ieova lou Atua, ma e na o ia foʻi e tatau ona e avatu i ai le auaunaga paia.”—Mataio 4:10.
^ pala. 7 Ua faamatalaina i le New Catholic Encyclopedia le ave o le faatāua i se mea, o se “faiga faalotu ma o se faiga tau tapuaʻiga.”
^ pala. 13 I inei, o faatusa e aofia ai ata, tupua, faatagata, ma so o se mea lava e faatāua.
^ pala. 14 Sa taatele le faaaogāina o faatusa i le tele o aganuu anamua, e aofia ai Aikupito, Eleni ma Initia.
E te Ono Fiafia Foʻi
ALA MAI!
Le Koluse
E toʻatele e manatu i le koluse o se faailoga o le faa-Kerisiano. Pe na maliu Iesu i luga o se koluse? Pe na faaaogā e soo o Iesu le koluse i la latou tapua‘iga?
