Skip to content

Skip to table of contents

 MATAUPU AUTŪ | O LE Ā LE TAULAU MANUIA MONI?

Auala e Maua ai le Taulau Manuia Moni

Auala e Maua ai le Taulau Manuia Moni

O loo faamatilatila i le Tusi Paia se vaaiga talafeagai e faatatau i le taulau manuia. E o faapea mai e na o ni nai tagata ua fiti se laki e mafai ona taulau manuia. E lē o lagolagoina foʻi i le Tusi Paia le manatu e masani ona taʻua i tusi faitau a tamaiti e faapea, pe afai e te ʻmulimuli i le mea o loo fai mai ai lou loto,’ o le a taunuu mea uma o loo e moomoo i ai. Ua masani ona totō i mafaufau o tamaiti lenā manatu mai lava a o lāiti, ma e iʻu ai i ni iʻuga lē fiafia.

O le mea moni, e mafai e so o se tasi ona maua le taulau manuia moni, peitaʻi e manaʻomia ni taumafaiga. Seʻi iloilo mataupu silisili o loo mulimuli mai.

  • LE MANATU O LE TUSI PAIA:

    “O lē e fiafia i siliva, e lē faamalieina i siliva, o lē e fiafia i le ʻoa e lē faamalieina i ana tupe maua.”​—Failauga 5:10.

    LONA UIGA. E lē mafai ona maua le faamalieina i le tele o ni meafaitino. Na taʻua e Dr. Jean M. Twenge i lana tusi Generation Me: “O tagata o lo latou faanaunauga autū o tupe, e sili atu ona popole ma mafatia nai lo o tagata e faatāua faiā lelei ma isi.” Na ia taʻua atili: “E masani ona iloa mai i suʻesuʻega, e lē mafai ona maua le fiafia e ala i tupe​—e leai se tāua o tupe i le mauaina o se olaga faamalieina, pe afai ua e maua meaʻai ma isi mea e ola ai.”

    LE MEA E MAFAI ONA E FAIA. Ia taulaʻi atu i se mea e sili ona tauia nai lo o ʻoa ma meafaitino. Na fetalai Iesu: ʻIa leoleo iā te outou i le manaʻo tele, auā e lē ola se tasi i le tele o ana mea ua iā te ia.’​—Luka 12:15.

  •  LE MANATU O LE TUSI PAIA:

    “E muamua le faamaualuga i le paʻū, e muamua foʻi le agaga faualuga i le tautevateva.”​—Faataoto 16:18.

    LONA UIGA. O le matapeʻapeʻa ma le fiasili, e lē fesoasoani iā te oe e maua ai le taulau manuia moni. Ua taʻua i le tusi Good to Great, ua taulau manuia mo se taimi umi faauluuluga o nisi kamupani, ona e latou te “faaalia le agamalu, e lē faaalialia vale, ma e lē mananaʻo e uaʻi atu pe talanoa tagata e faatatau iā i latou. Ae o le isi lua vaetolu o kamupani, e matuā faatāua e o latou taʻitaʻi i latou lava, ma ua avea ma itu e gau pe paʻū maulalo ai le tulaga o le kamupani.” O lea, o le soona uaʻi atu iā te oe lava, e iʻu ai i le lē taulau manuia.

    LE MEA E MAFAI ONA E FAIA. Ia atiaʻe le lotomaulalo nai lo o le saʻilia o le mamalu. Ua faapea mai le Kalatia 6:3: “Afai e manatu se tasi o ia o se tagata tāua ae e leai, ua faasesēina ai e ia o ia lava.” E lē o se faailoga lenā o le taulau manuia.

  •  LE MANATU O LE TUSI PAIA:

    “E leai se mea e sili i le tagata nai lo o le . . . iloa e ia mea lelei ona o lana galuega mamafa.”​Failauga 2:24.

    LONA UIGA. Pe afai e te atiaʻe se masaniga o le galue malosi, o le a atili ai ona e fiafia i au galuega. Na tusi Dr. Madeline Levine i lana tusi Teach Your Children Well: “E te lagona le taulau manuia i se mea pe afai e te lelei i lenā mea, ae e māfua ona e lelei i se mea ona e fai faatasi ma ni taumafaiga ma le finafinau.” E aofia ai le maumauaʻi e feagai ma faafitauli e tulaʻi mai i nisi o taimi.

    LE MEA E MAFAI ONA E FAIA. Ia taumafai malosi e avea oe ma sē e talenia, ma aua le faavaivai pe a feagai ma faigatā. Pe afai e iai sau fanau, ia tuu le avanoa iā i latou (e fua i o latou tausaga ma mea e mafai ona fai) e taulima ai o latou faafitauli. Aua e te taumafai e vave ona e foʻia o latou faafitauli uma. Pe a atiaʻe e talavou se uiga maumauaʻi, o le a latou maua le faamalieina moni ma se toleniga lelei e aogā mo i latou pe a matutua.

  • LE MANATU O LE TUSI PAIA:

    “E sili le taʻifau ua ola nai lo o le leona ua mate.”​—Failauga 9:4.

    LONA UIGA. Pe afai e iai sau galuega totogi, e tatau ona avea lau galuega ma vaega o lou olaga, ae e lē o lou olaga atoa. E faapefea ona e taulau manuia pe afai e maualuga lou tulaga i lau galuega, ae e te maʻi ai pe e lē amanaʻia oe e lou aiga? O tagata e taulau manuia moni lava, e taumafai e faapaleni a latou galuega, le soifua mālōlōina ma aiga.

    LE MEA E MAFAI ONA E FAIA. Ia tausia lelei oe lava, ma ia lava lau mālōlō. E itiiti aogā e maua mai i le faigaluega faasoloatoa ma faataulaga mea uma e aofia ai le soifua mālōlōina, aiga ma faauōga, ae e lē o taulau manuia moni.

  • LE MANATU O LE TUSI PAIA:

    “E fiafia o ē e naunau i mea faaleagaga.”​—Mataio 5:3.

    LONA UIGA. Ina ia taulau manuia moni, e tāua tele ona suʻesuʻe le Tusi Paia ma faatatau ona mataupu silisili. Ua iloa e le faitau miliona o Molimau a Ieova, o le faamuamua o mea faaleagaga i o latou olaga, ua faaitiitia ai lo latou popole i meafaitino.​—Mataio 6:31-33.

    LE MEA E MAFAI ONA E FAIA. Ia iloilo pe faapefea ona fesoasoani le Tusi Paia iā te oe ina ia maua le taulau manuia moni. Mo nisi faamatalaga, faafesootaʻi Molimau a Ieova i lou vaipanoa, pe tagaʻi i la matou upega tafaʻilagi i le www.jw.org/sm.