O le Tusi Muamua o Tupu 7:1-51
7 E 13 tausaga na faia ai e Solomona lona lava fale,+ seʻia oo ina māeʻa lona fale atoa.+
2 Ua ia faia foʻi le Fale o le Vaomatua o Lepanona+ e 100 kupita* lona umi, e 50 kupita lona lautele, e 30 kupita lona maualuga, i luga o laina poutū e fā o laupapa arasi; ua iai foʻi laau faalava o le arasi+ i luga o poutū.
3 Ua ufitia i laupapa arasi luga aʻe o laau faalava o loo i luga o poutū; o lo latou aofaʻi e 45, e ta‘i 15 i le laina e tasi.
4 E tolu laina faamalama e fai o latou faavaa, ma e iai le isi laina faamalama i luga aʻe o le isi. E faafesagaʻi nei faamalama taʻitasi ma isi faamalama i le isi itu.
5 O faitotoʻa uma ma pou o faitotoʻa, e iai faavaa faatafafā e pei o luma o faamalama ia e faafesagaʻi le tasi ma le isi, ma o loo iai i laina faamalama e tolu.
6 Ua ia faia foʻi le Maota* o Poutū e 50 kupita lona umi, ma e 30 kupita lona lautele; sa iai i luma se faapaologa ma ona poutū ma se faataumata.
7 Ua ia faia foʻi le Maota* o le Nofoālii+ po o le Maota o Faamasinoga,+ lea e na te faia ai faamasinoga; ma ua latou ufitia totonu i laupapa arasi e amata mai i le fola e alu aʻe i iviivi.
8 A o le fale e nofo ai o ia i le isi lotoā,+ e i tua o le Maota o le Nofoālii, ma e taitutusa le auala na faia ai. Sa faia foʻi e Solomona se fale e pei o le Maota o le Nofoālii, mo le afafine o Farao lea ua fai ma ana avā.+
9 O nei fale uma, e amata mai i le faavae e oo i maa pito i luga, ma fafo e oo atu i le lotoā tele,+ na faia uma i maa taugatā+ ua tipiina e tusa ma le fua, ma ua ʻiliina i ʻili maa i fafo ma totonu.
10 Na faia le faavae i maa tetele ma taugatā; o nisi maa e ta‘isefulu kupita, a o isi maa e ta‘ivalu kupita.
11 A o luga o nei maa na iai maa taugatā ua tipiina e tusa ma le fua, faapea laupapa arasi.
12 A o le lotoā tele, na si‘o i atu maa e tolu ua tipiina, ma le atu o laau faalava o arasi, e tai pei o le lotoā pito i totonu+ o le fale o Ieova, faapea foʻi le faapaologa o le fale.+
13 Ona alu atu lea o le feʻau a le tupu o Solomona, ma aumai ai Hiramo+ mai i Turo.
14 O ia o le tama a le fafine ua oti lana tane e mai i le ituaiga o Nafatali, ma o lona tamā o le tagata Turo e fai mea ʻapamemea.+ Na tumu Hiramo i le atamai, le malamalama,+ ma le poto e faia ai so o se mea ʻapamemea. Ua sau o ia i le tupu o Solomona, ma faia ana galuega uma.
15 Ua ia faia poutū ʻapamemea e lua,+ e 18 kupita le maualuga o poutū taʻitasi, ma o le tetelē o nei poutū taʻitasi e lua,+ e 12 kupita pe a fuaina faataamilo i se manoa.
16 Na ia faia foʻi ulupou e lua i ʻapamemea ma tuu i tumutumu o poutū. E lima kupita le maualuga o le tasi ulupou, e lima foʻi kupita le maualuga o le isi ulupou.
17 O ulupou o loo i tumutumu o poutū, ua teuteu i ni mea valavala e faia aʻe i ni filifili lāiti ua milo faatasi;+ e fitu mo le tasi ulupou, e fitu foʻi mo le isi ulupou.
18 Ua ia faia ni atu rimoni e lua e faataamilo i mea valavala ina ia ufitia ai ulupou i tumutumu o poutū; ua faapena ona ia faia i ulupou e lua.
19 O ulupou sa i tumutumu o poutū sa i luma o le faapaologa, sa faia e foliga i le fugālaau o le lili, e ta‘ifā kupita le maualuluga.
20 O nei vaega o ulupou sa i luga o poutū e lua, i luga teisi a‘e o le mea lautele faataamilo o loo sosoo ai i mea valavala; e 200 foʻi rimoni i atu rimoni e faataamilo i ulupou taʻitasi.+
21 Ua ia faatutū foʻi poutū o le faapaologa o le malumalu.*+ Ua ia faatū le poutū i le itu taumatau* ma faaigoa iā Iakinu,* ua ia faatū foʻi le poutū i le itu tauagavale* ma faaigoa iā Poasa.*+
22 Na faia foʻi tumutumu o poutū e pei o fugālaau o le lili. Ona māe‘a ai lea o le galuega o poutū.
23 Ona ia faia lea o le faatanoa vai telē* ʻapamemea,+ e faataaliʻoliʻo ma e 10 kupita e amata mai i le tasi augutu i le isi augutu. E 5 kupita lona maualuga, ma e 30 kupita le umi o le manoa e fua faataamilo ai.+
24 Sa iai foʻi teuteu o vine vao+ sa si‘o ai lalo ifo o lona augutu, e ta‘isefulu teuteu o vine vao i le kupita e faataamilo i le faatanoa vai, e taʻilua laina o vine vao na teuteuina ai.
25 Ua faatū le faatanoa vai i luga o povi poʻa e 12,+ e 3 e faasasaga i le itu i mātū, e 3 e faasasaga i le itu i sisifo, e 3 e faasasaga i le itu i saute, ma e 3 e faasasaga i le itu i sasaʻe; ua tuu i o latou luga le faatanoa vai, ma o loo ū o latou tua i le ogatotonu.
26 O lona mafiafia e tusa lea ma le lautele o le alofilima,* ma o lona augutu e faia e pei o le augutu o le ipu tī, e tai pei o le fugālaau o le lili. O le tele o le vai e iai e 2,000 paita.*
27 Ona ia faia lea o taavale toso ʻapamemea+ e sefulu, e fā kupita le umi o le taavale toso e tasi, e fā foʻi kupita lona lautele, ae e tolu kupita lona maualuga.
28 Ua faapenei ona faia o taavale toso: Na iai o latou puipui i autafa, ma o na puipui sa iai i vā o ʻapamemea na felavasa‘i.
29 O luga o puipui i autafa ia e i le vā o ʻapamemea na felavasa‘i, e iai ata o leona,+ o povi poʻa, ma kerupi,+ e faapena foʻi i luga o ʻapamemea na felavasa‘i. Na iai foʻi teuteu e foliga o ni fugālaau ua fili faatasi, i luga aʻe ma lalo ifo o leona ma povi poʻa.
30 E fā uili ʻapamemea o le taavale toso e tasi, e iai uʻamea i le vā o uili; e iai foʻi i ona tulimanu e fā o lagolago mo le taavale toso. I lalo ifo o le faatanoa, e iai lagolago ua teuteuina itu taʻitasi i mea e pei o ni fugālaau ua fili faatasi.
31 O le gutu o le faatanoa, sa i totonu o lona vaega pito i luga, e lapotopoto ma e kupita le maualuga mai i lona vaega pito i lalo. E iai teuteu i le vaega pito i luga, ma e faatafafā ona puipui i autafa, e lē lapotopoto. O le vaega pito i luga ma lagolago, na faia aʻe ai se tulaga e tasi ma le ʻafa kupita lona maualuga.
32 O uili e fā e i lalo ifo o puipui i autafa, a o lagolago o uili e pipii i le taavale toso; o le maualuga o le uili e tasi, e tasi ma le ʻafa kupita.
33 O le faiga o uili e pei o le faiga o uili o le kariota. Na faia uma i uʻamea o latou lagolago, o uili, o uʻamea i totonu o uili, ma ogatotonu o uili.
34 E fā lagolago i tulimanu e fā o le taavale toso e tasi; e pipii lagolago i le taavale toso.
35 I le tumutumu o le taavale toso, sa iai se vaega pito i luga e ʻafa kupita le maualuga, e faataaliʻoliʻo ai; sa pipii faatasi le vaega pito i luga, o ona itu, ma ona puipui i autafa.
36 Ua ia vaneina foʻi i luga o mea mafolafola i ona itu ma puipui i autafa, o ata o kerupi, o leona, ma laau o pama, e tusa ma avanoa mo mea taʻitasi, ma fugālaau ua fili faatasi.+
37 O le auala lenā na ia faia ai taavale toso e sefulu;+ e tutusa o latou fausaga,+ o latou fua, ma o latou foliga.
38 Ua ia faia faatanoa ʻapamemea e sefulu,+ ma e 40 paita le fua o vai i faatanoa taʻitasi. O le fua o le faatanoa e tasi, e fā kupita. Sa tofu taavale toso e sefulu ma le faatanoa e tasi.
39 Ona ia tuu lea o taavale toso e lima i le itu taumatau o le fale, ma le lima i le itu tauagavale o le fale; ae ua ia tuu le faatanoa vai telē i le itu taumatau o le fale, e faasaga i le itu i saute i sasa‘e.+
40 Na faia foʻi e Hiramo+ o faatanoa, o suō,+ ma ipu faaofuofu.+
Ua faamāe‘a e Hiramo galuega uma na ia faia mo le tupu o Solomona i le fale o Ieova:+
41 o poutū e lua+ ma ulupou faaofuofu i luga o tumutumu o poutū e lua; o mea valavala+ e lua e ufiufi ai ulupou faaofuofu e lua, i luga o tumutumu o poutū;
42 o rimoni e 400+ mo mea valavala e lua, e lua laina o rimoni i le mea valavala e tasi, e ufiufi ai ulupou faaofuofu e lua i luga o poutū e lua;
43 o taavale toso e sefulu+ ma faatanoa lāiti e sefulu+ i luga o taavale toso;
44 o le faatanoa vai telē+ ma povi poʻa e 12 i lalo ifo o le faatanoa vai telē;
45 o ʻapa, o suō, o ipu faaofuofu, ma ipu uma, na faia e Hiramo i le ʻapamemea iila, mo le tupu o Solomona mo le fale o Ieova.
46 Na faia e le tupu nei mea i le itumalo o Ioritana i le vā o Sukota ma Saretana, e faaaogā ai ipu omea.
47 E leʻi fuaina e Solomona ipu uma, ona na matuā tele lava. E leʻi iloa foʻi le mamafa o le ʻapamemea.+
48 Na faia e Solomona mea uma mo le fale o Ieova: o le fata faitaulaga+ auro; o le laulau auro+ e tuu ai le falaoa e laulauina;
49 o tuugāmolī+ auro māoʻi, e lima i le itu taumatau, ma le lima i le itu tauagavale i luma o le potu pito i totonu; o fugālaau,+ o molī, ma iofi, e faia uma i le auro;+
50 o faatanoa, o seleulu,*+ o ipu faaofuofu, o ipu tī,+ o salefu,*+ o auro māoʻi ia; o faamau o faitotoʻa o le potu pito i totonu,+ o le Mea e Sili Ona Paia lea, o faitotoʻa foʻi o le fale o le malumalu,+ o auro ia.
51 Ona māeʻa ai lea o galuega uma na faia e le tupu o Solomona mo le fale o Ieova. Ona aumaia lea e Solomona o mea na faapaiaina e lona tamā o Tavita,+ ma tuufaatasi siliva, o auro, ma ipu i potu teuoloa o le fale o Ieova.+
Faamatalaga Pito i Lalo
^ Po o le “Faapaologa.”
^ Po o le “Faapaologa.”
^ O loo faasino atu i le Mea Paia.
^ Po o “i le itu i saute.”
^ Lona uiga “Tau Ina ia Matuā Faamausalīina e Ia [e faasino atu iā Ieova].”
^ Po o le “itu i mātū.”
^ Atonu e uiga atu “I le Malosi.”
^ Epe., “Sami.”
^ O se mea e pei o se tamaʻi suō e aveese ai malala mai i le afi.
^ Tagaʻi i le Uiga o Upu.
