Le Manatu o le Tusi Paia

Lau Filifiliga mo Togafitiga Faafomaʻi—Pe e Tāua Ea?

MAʻI, faamaʻi, ma manuʻaga, o mea ia ua masani lelei i ai tagata. Pe a fesagaʻi ma nei fili o le soifua mālōlōina, e toʻatele ua saʻilia se mapusaga e ala i togafitiga faafomaʻi. Na silafia e Iesu Keriso ia aogā e ono maua mai i na taumafaiga, ma taʻutino mai e faapea, “o e malolo e le aoga i ai le fomai, na o e mamai.”—Luka 5:31.

O le tusitala o le Tusi Paia na ia tusia na upu, o Luka, o ia lava o se fomaʻi. (Kolose 4:14) Atonu a o faagasolo le la faigamalaga, sa maua e le aposetolo o Paulo aogā mai i le tomai faafomaʻi o Luka. Ae po o aumaia e le Tusi Paia ni taʻiala mo Kerisiano i ituaiga o togafitiga faafomaʻi e taliaina? Pe tāua lau filifiliga mo togafitiga faafomaʻi?

Taʻiala Faale-Tusi Paia

E mafai ona taʻitaʻia e le Tusi Paia se tagata i le faia o filifiliga atamai e tusa ai ma togafitiga faafomaʻi. Mo se faataʻitaʻiga, ua faamanino mai i le Teuteronome 18:10-12 e faapea, o faiga e pei o valovaloga ma le faataulāitu, e “inosia” e Ieova. O le “fai togafiti faataulāitu,” lea na lapataʻia e Paulo, e aofia ai i nei gaoioiga e faasāina. (Kalatia 5:19-21) O lea, o Kerisiano moni e latou te ʻalofiaina so o se faatulagaga e saʻilia ai auala o māfuaaga o maʻi, po o faiga e faamālōlō ai, ia e mautinoa e aafia ai faiga faataulāitu.

Ua faailoa mai foʻi e le Tusi Paia le tāua tele ua tuuina atu e Lē na Foafoaina Mea i le paia o le ola ma le toto. (Kenese 9:3, 4) O le maumauaʻi e utagia le faatonuga ia ‘faamamao ma le toto,’ e teena ai e Molimau a Ieova faiga faafomaʻi ia e solia ai le faatonuga a le Tusi Paia ia faamamao ma le toto. (Galuega 15:28, 29) E lē o le uiga o lenei mea faapea, e latou te teena togafitiga uma faafomaʻi. Na i lo lena, e latou te saʻilia le tausiga faafomaʻi e aupito sili ona  lelei mo i latou ma a latou fanau. Ae peitaʻi, e latou te talosagaina ē e iai le tomai faapitoa mo le tausiga tau i le soifua mālōlōina mo le mauaina o togafitiga ia e ōgatusa ma lo latou talitonuga faalelotu.

Faautauta i Lou Ala

Na lapataʻi mai le tupu o Solomona e faapea “o le ua faigofie, e talia e ia upu uma; a o le ua mafaufau, ua faautauta o ia i lona ala.” (Faataoto 14:15) E tusa lava foʻi pe e lē o feteenaʻi tuusaʻo filifiliga faafomaʻi ma mataupu silisili faale-Tusi Paia, e tatau i se tagata ona “faautauta o ia i lona ala.” E lē o ituaiga uma o togafitiga faafomaʻi e aogā. Ina ua faapea mai Iesu ‘⁠o e mamaʻi e aogā i ai le fomaʻi,’ sa ia leʻi faamaonia togafitiga uma faafomaʻi sa maua i ona aso. Na ia silafia o nisi ituaiga o faiga faafomaʻi sa lelei ae o nisi faiga sa sesē. *

O loo faapena foʻi i aso nei, o nisi o togafitiga atonu e lē aogā, e oo foʻi ina taufaasesē. O le leai o se faautaga lelei, e mafai ona tuuina ai le tagata i lamatiaga lē talafeagai. E tatau foʻi ona mafaufauina faapea, o se togafitiga e lelei i le tasi tagata e mafai ona lē aogā—pe āfaina ai—le isi tagata. Pe a fesagaʻi ma se filifiliga faafomaʻi, o le a fefuafuataʻi ma le faaeteete e le tagata poto lana filifiliga na i lo o le “talia e ia o upu uma,” e tusa lava pe mauaina mai i ni uō o loo iai le faanaunauga lelei ia ni fautuaga. O le a ia faaalia le “faautauta” e ala i le saʻilia o faamatalaga maufaatuatuaina ina ia iai i se tulaga e faia ai se filifiliga atamai.—Tito 2:12.

Ia Maua le Vaaiga Talafeagai ma le Fetuutuunaʻi

O se mea tatau le manatu mamafa o se tasi i lona tulaga tau i le soifua mālōlōina. O le iai o se vaaiga paleni i le soifua mālōlōina lelei, e faaalia ai le talisapaia mo le meaalofa o le ola ma lona Puna tauatua. (Salamo 36:9) E ui lava o loo saʻili ina ia maua ni togafitiga talafeagai faafomaʻi, ae e mananaʻo Kerisiano ina ia paleni i mataupu tau i le soifua mālōlōina. Mo se faataʻitaʻiga, pe afai e oo ina soona pupū se tagata o loo i se tulaga lelei lona soifua mālōlōina i lona soifua lelei ma le tino malosi, e ono faapogaia ai o ia e leiloa atu lana vaai i “mea e sili ona tāua.”—Filipi 1:10, NW; 2:3, 4.

O se fafine sa matuā atuatuvale i lona maʻi i aso o Iesu ‘na uma atu ana oloa’ i le saʻilia o se fesoasoani mai i fomaʻi mo le togafitia o lona maʻi faaumiumi. O le ā le iʻuga? Na i lo o le malosi ai, na oo ina sili atu ona leaga le tulaga o lona maʻi, lea atonu na faapogaia ai lona fiu. (Mareko 5:25, 26) Na ia faia mea uma i lona malosi ina ia maua ai se mapusaga, ae leai se mea na aogā. O mea na tutupu ia te ia, ua manino mai ai le faatauvaa tele o le poto faafomaʻi i ona aso. E oo lava i aso nei, e ui lava i le faaauilumaina o saʻiliʻiliga faafomaʻi ma le malamalamaga faa-tekinisi, ae o le toʻatele o tagata ua oo i ai le tulaga lava lea e tasi e pei ona oo i le fafine i aso o Iesu. O lea la, e tāua ai le iai o se vaaiga talafeagai e faatatau i mea e mafai ona faataunuuina e le poto faafomaʻi. Ua lē mafai ona mauaina le soifua mālōlōina lelei atoatoa i le taimi nei. Ua iloa e Kerisiano faapea o le taimi a le Atua mo ‘le faamalolo ai o nuu’ o loo i le lumanaʻi. (Faaaliga 22:1, 2) O lea, e tatau ai ona tatou atiina aʻe se vaaiga paleni e faatatau i togafitiga faafomaʻi.—Filipi 4:5.

Ua manino la, e tāua moni filifiliga tatou te faia. Ona o lena māfuaaga, pe a fesagaʻi ma filifiliga e faatatau i togafitiga faafomaʻi, e tatau ona atagia atu i a tatou filifiliga e lē gata o lo tatou faanaunauga mo le soifua mālōlōina lelei, ae o lo tatou faanaunauga ina ia tausia se faiā lelei ma le Atua. A o tatou faia faapea, e mafai ona faaauau ona tatou vaai atu ma le mautinoa i le faataunuuga o folafolaga a Ieova lea e i totonu o le lalolagi fou matagofie o loo sau, o le a “le fai mai foi se tasi ua mau ai, Ou te maʻi.”—Isaia 33:24.

[Faaopoopoga i lalo]

[Ata i le itulau 30]

Tate Gallery, London/Art Resource, NY

[Ē Ana le Ata]

“The Doctor,” 1891, tusia e Sir Luke Fildes