O le soona popole e mafai ona faaleagaina ai lou itu faaletino ma taufaalogona. E ono oo atu ai lava ina faateteleina faafitauli, nai lo o le faafitauli na e muaʻi popole ai.

•  Faaitiitia le matamata, faitau, pe faalogologo foʻi i le tele o tala lē lelei o mea o loo tutupu. E lē manaʻomia ona tatou iloa faamatalaga uma o se mea o loo tupu. O le soona uaʻi atu i tala lē lelei o le a oo ai ina e atuatuvale ma leai ai se faamoemoe.

   Mataupu silisili o le Tusi Paia: “O le loto e momomo e mamago ai ivi.”—Faataoto 17:22.

   “E faigofie ona tatou fiafia i tala fou ma tala e faateʻia ai, ae o se masaniga e lē lelei. Na faaitiitia loʻu popole ina ua faaitiitia loʻu faalogo i tala fou.”—Ioane.

   Mea e mafaufau i ai: O le ā le tele e te manaʻo ai ia iloa tala fou?

•  Ia tausisi i se faasologa. Ia taumafai e faatulaga se taimi e ala ai, tausami, fai feʻau ma moe ai. O le iai o se faasologa o le a e masani ai i au mea e fai ma faaitiitia ai lou popole.

   Mataupu silisili o le Tusi Paia: “O fuafuaga a le tagata toʻaga e manuia ai o ia.”—Faataoto 21:5.

   “Ina ua amata le KOVITI-19, na matuā ou lē ano a i aʻu faasologa ma iʻu ai ina faaalu le tele o loʻu taimi i faafiafiaga. Na ou manaʻo e faaaogā tatau loʻu taimi, o lea, na ou faia ai se faasologa o aʻu mea e fai i aso taʻitasi.”—Iosefa.

   Mea e mafaufau i ai: Pe e iai sau faasologa e fesoasoani iā te oe e te lagona ai na e faataunuuina se mea aogā i aso taʻitasi?

•  Ia uaʻi atu i mea lelei. O le soona mafaufau i mea e leʻi tutupu ma mea e ono tutupu e atili ai ona popole. Nai lo o lea, ia mafaufau i ni mea se lua pe tolu e te lotofaafetai ai.

   Mataupu silisili o le Tusi Paia: “Ia faaalia foʻi lo outou loto faafetai.”—Kolose 3:15.

   “O le faitau o le Tusi Paia e ʻalofia ai le faatumu o o tatou mafaufau i tala lē lelei, ae e tatou te uaʻi atu ai i mea lelei. E pei e foliga e faigofie lenā manatu ae e aogā!”—Lisa.

   Mea e mafaufau i ai: Pe e masani ona e mafaufau i mea lē lelei e tutupu i lou olaga ae faalēano i mea lelei na tutupu?

•  Ia mafaufau i isi. Pe afai e te popole i le tele o taimi, atonu e faigofie atu ona e faaesea oe lava. Nai lo o lea, ia mafaufau po o ai e mafai ona e fesoasoani i ai.

   Mataupu silisili o le Tusi Paia: “Ia vaavaai ma le naunau e lē gata i au lava mea, ae i mea foʻi e lelei ai isi.”—Filipi 2:4.

   “O le faia o mea mo isi ou te maua ai le fiafia. O loo oʻu faia mea e faafiafia ai isi, a o le taimi e tasi e tuuitiitia ai oʻu popolega. O le mea moni, pe a ou pisi e fesoasoani i isi o le a leai la se taimi ou te lagona ai le popole.”—Maria.

   Mea e mafaufau i ai: Pe e te iloa se tasi o loo manaʻomia moni lava se fesoasoani, ma o le ā e te faia e fesoasoani ai iā te ia?

•  Ia maua pea le soifua mālōlōina lelei. Ia lava le faamalositino ma le mālōlō. Ia ʻai i meaʻai paleni. O le tausia o le soifua mālōlōina e te maua ai le faamoemoe ma fesoasoani e tuuitiitia ai le popole.

   Mataupu silisili o le Tusi Paia: ʻE aogā le faamalositino.’—1 Timoteo 4:8.

   “Ua lē mafai ona ma toe faia ma laʻu tama tama faamalositino sa masani ai, o lea ua avea ma vaega o le ma faasologa le faia o faamalositino i totonu o le fale. O le faia faapea e lelei ai pea le faalogo i le tino ma onosaʻi ai le tasi i le isi.”—Catherine.

   Mea e mafaufau i ai: Pe e manaʻomia ona faaleleia lau taumafa i meaʻai paleni ma le faia o faamalositino ina ia maua ai pea le soifua mālōlōina lelei?

 E lē gata e fesoasoani nei fautuaga e tuuitiitia ai le popole, ae ua maua e le toʻatele aogā mai i le aʻoaʻoina o folafolaga maufaatuatuaina i le Tusi Paia e faatatau i se lumanaʻi e sili ona lelei. Tagaʻi i le mataupu “O le ā o le a Faataunuuina e le Malo o le Atua?”